Qo'noS QonoS

chovnatlh wa'maH wa'

DIS cha'SaD, jar wa'maH wa'


ghItlhvam HIDjolev


tera'vo'

Sarbogh Qujmey law' tIv tera'nganpu' 'e' vIghojpu'. Huj bIH law'
'ej lo'laHbe'. bIH puS vIyajbe'bogh tu'lu'. 'ach rut 'upbe'bogh
wa' tu'luH. qen wa' vItu'pu' jIH. lutIvqu'law' tlhInganpu' 'e'
vIHar.

yotlh tInDaq ghom may'luch tuQbogh SuvwI'pu"e' law'. cha' mangghom
chen chaH. wov wa' mangghom HIp, Hurgh latlh HIp. yotlh HeHmeyDaq
mIchmey le' tu'lu'; mangghommey waw'mey bIH. waw'Daj Hub mangghom
'ej jagh waw' jon 'e' nID. waw' jonmeH, nuH le' lo'nISlu'.
motlhbe' janvam. ghopDu'Daq qengmeH mach 'oH 'ej moQ
beQmoHlu'ta'bogh rur. 'ach HoSghajqu' 'oH: jagh waw'Daq nuHvam
lanlaHchugh mang, SIbI' jegh jagh mangghom! vaj jornub jorwI"a'
vay' joq 'oSba', 'ach jorlaHbej 'e' vIHon jIH. Ha'DIbaH DIr neH
'oHlaw'.

'ach ngeDbe' waw'Daq jornub lanmeH Qu'. wej' mIw tu'lu'. waw'
mIchDaq 'oH qenglaH mang qettaHvIS qoj waw' mIchDaq 'elpu'bogh jup
chuHlaH mang qoj waw'Daq jornub puplaH mang.

waw'Daq jornub qeng 'e' nIDchugh mang, lumevmoH HubwI'pu' 'e'
lunIDba'. lumevmoHmeH, lupumnISmoH. nuHmey ro'mey ghap lo'laHbe',
'ej ghaH lupuplaHbe' 'ach mub Hoch latlh mIwmey. lu'uchlaH,
luyuvlaH, luqIplaH volchaHDu'chaj lo'taHvIS. yavDaq ghaHDI' jornub
ghajbogh mang'e', rIn may' ('ach taH noH!). toH, nom qetnIS qengwI'
'ej luroQlaHpa' waw' mIch yotnIS ghaH. 'ach luboQ mangghomDaj latlh
mang. HubwI'pu' bot chaH. vaj nItebHa' QapnIS mangghom.
qengwI'vaD waw'Daq He HuvmoHnIS botwI'pu' 'ej Hevam tlha'nISchu'
qengwI'.

chuH 'e' maSchugh mangghom, pIm Qu'. chuHwI' QanmeH tlhoy'
chen'eghmoH botwI'pu'. pumpa' tlhoy', chuHnIS chuHwI'; chuHlaHpa' ghaH
luroQlaHchugh HubwI'pu', rIn may'. vaj HIv HubwI'pu'! Quj pov!
jornub woDlaHchugh, vaj wej Qap yot; 'uchnISchoHchu' HevwI'; yavDaq
pumchugh jornub, luj yot. vaj qarnIS chuHwI' 'ej po'nIS HevwI'
ghopDu'.

pup 'e' maSchugh mangghom, pImqu' Qu'. waw'Daq Qam cha'
naQmey tIq 'ej pupchugh mang, QapmeH tuHDaj, naQmey jojDaq
puvnIS jornub. tIq yotlh, 'ej Qatlh pupchu'ghach, vaj waw' SumnIS
mangghom puppa'. puprupDI', tlhoy' chenmoHqa' botwI'pu'. tlhoy'
veghlaHchugh HubwI'pu', jornub puplu'pu'bogh lubotlaH, 'ej luj tuH.

toH, HIvmeH mIw Sar tu'lu'. taHtaHvIS noH qaS maymayvam
law'. HIv wa' mangghom 'ej Hub latlh. qaStaHvIS Hoch may', jornub
luDuvmoH HIvwI'pu' 'ej may' HubwI' waw'Daq chol 'e' lunID. choltaH
net poQ; loSlogh HIvwI'pu' mevmoHchugh HubwI'pu"e', vaj jornub lujon
'ej HIvwI'pu' moj chaH. waw' yotDI' wa' mangghom, pe"eghlu', 'ej
qaSqa' noH.

pov Qujvam. ral. naS. rIQchoH QujwI'pu'. gholpu' 'oy'moH
QujwI'pu'. roQmeH 'ej botmeH, pe'vIl ghol qIpnISlu'. QujlaHbe'
pujwI'pu'. 'ach Dup poQ je. chay' HIv HIvwI'pu' not 'e' Sov
HubwI'pu'. rut HubwI'pu' tojlaH HIvwI'pu' (rut HIvwI'pu' tojlaH
HubwI'pu'!). rut HoS neH lo'. QatlhlaH Dup pagh naplaH. vajna' tIq
yab porgh je poQ Quj. toH, veS rurqu'. puH jonlu' 'ej waw'
charghlu' 'ej batlh yay chavlu'.

vajna' Quj 'oHbej. lu'oghta'mo' Humanpu' vImerlu'chu'.


nuq vIqel?

butlh. butlh vIghaj, 'ach butlh vIHutlh. bImIS'a'? lambe'
nItlhpachDu'wIj. 'ach ghItlhvam vIqonmeH, butlh vIghajnIS. HIja', batlh
bIloy: woQ vIqel.

jImoghqu'. wa' Hogh ret vuD qon rewbe' law'. 'ach maloStaH. wej DevwI'
chu' ngu'lu'. FloridaDaq wIvmey toghtaH. togh
jo'. toghqa' jo'. DaH, 'op yoSDaq togh Humanpu'. bep cha' ghom: mayHa'!
'ach toghtaH.

batlhHa' nIH

  1. togh Humanpu' neHbe' nIH woQ. 'ach chut qI' DevwI'chaj. QatlhDI'
    toghmeH mIw, wIvmey togh Humanpu' 'e' chaw' chutvam. nIv mIwvam 'e' maq
    chutvam. 'ach nIvchugh, qatlh FloridaDaq mIwvam
    luqaD?

  2. wa' yoSDaq wIvmey togh Humanpu', 'ej nIH woQ ghu' Dublu'. toghDI' Sep
    DevwI', yoSvam wIvmey togh je. 'ach latlh yoS wIvmey togh neHbe' nIH woQ,
    poS woQ ghu' Dubchugh.

  3. latlh SepDaq wIvmey toghqa' Humanpu' 'e' buQ nIH woQ. qatlh?
    Sepmeyvam luj, 'ach tlhoS Qap. chaq toghqa'chugh, QaplaH. 'ach
    FloridaDaq togh Humanpu' luneHbe' chaH. yuDlaw'
    mo'chaj.

batlhHa' poS

  1. pupbe' wIvmeH mIw, 'ach may. Florida yoSDaq
    pupbe', 'ej Dat pupbe'. FloridaDaq toghqa'
    Humanpu', chaq Dat toghnIS Humanpu'. qatlh yoS puSDaq togh Humanpu'?
    yoSmeyvamDaq toghqa'chugh, chaq poS woQ ghu' Dublu'.

  2. chut pab yoS toghwI'. 'ach mI' lajbe'chugh poS woQ, bo'DIjDaq morgh. rewbe' ghogh QoynIS.
  3. Suvchugh poS woQ 'ej Qapchugh, woQ DevwI' laj'a' Hatlh rewbe'?

bej qo'

SoltaHvIS woQmey, bej qo'. DevwI'na' Dabe' woQ DevwI'. DoghwI' Da. bech
'Iv? bech nIH woQ; bech poS woQ; 'ej bech Hatlh roghvaH. malubej.
nubejtaHvIS, nuq qel? qaja': butlh wIHutlhbej.

nIH woQ: Republican Party
poS woQ: Democratic Party


[HeD]

Qo'noS QonoS juH chegh

[juH]

tlhIngan Hol yejHaD juH chegh

[Duv]