chovnatlh cha'maH cha'

DIS cha'SaD wa', jar wa'maH

ghItlhvam HIDjolev

jatlh lengwI'

qonta' ghunchu'wI'

motlh mob chunDab. nIteb tera' muD mup. tujqu'choHmo' wew. chal SIj qulHom 'e' legh bejwI'. muD 'elpa' chunDab, HeDaj SovlaHbe' vay'. qaStaHvIS wa' rep, chaq vagh chunDabmey luleghlu'.

'ach rut pIm ghu'. roD DI tlhuD lIy. lIy tlhej DIvam, bavtaHvIS. nIbbe'mo' DI Do lIy Do je, lIy tlha'choH 'op DI. nungchoH latlh. tlhetlhtaHvIS poH'a', lIy He teb DI.

bavtaHvIS tera', rut lIy He ngo' ghom. qaSDI', chunDabmey moj DI law'. wa' lurgh ghoSmo' Hoch chunDabmey, wa' Hov Sepvo' narghlaw'. chunDabmey per Sep. August Perseus Sepvo' nargh Perseid chunDabmey. November Leonid chunDabmey lInglaw' Leo Sep. chunDabmeyvam pIHbej Hov tejpu', Hov bejwI'pu' je. wanI'vamvaD «SIS chunDabmey» ponglu'. SISDI' chunDabmey, qaStaHvIS wa' rep, chaq vaghmaH chunDabmey
luleghlu'.

Sumchugh lIy, loQ qev DI. vaj law'qu' chunDabmey, DI ngeQtaHvIS tera'. Leonid lIng P/Tempel-Tuttle lIy. tera' DIS 1965, Sumqu' lIyvam tera' je. qaStaHvIS cha'maH tup, vagh netlh chunDabmey luleghlu'! qaStaHvIS wa' lup, rut nargh loSmaH chunDabmey! wanI'vamvaD «jev chunDabmey» ponglu'.

tera' DIS 2001 jev Leonid chunDabmey net pIH. cha' wanI' lupIHlu'. November 18, taghpa' jajlo', ghaytan chunDabmey lawqu' legh America bejwI'pu'. vagh vatlh rep (chan mIch) qaS 'aqroS. Dachmo' maSwov, Dunbej bejmeH ghu'. qaStaHvIS wa' rep, ghaytan nargh wej vatlh chunDabmey; chaq nargh wa' SaD.

November 19 Pacific bIQ'a' bejwI'pu'vaD jevqa'. loS vatlh wejmaH rep chal bejnIS Australia chan nganpu'; JapanDaq cha' vatlh wejmaH rep tagh; Australia 'ev tIngDaq, PhilippinesDaq, China chanDaq je wa vatlh wejmaH rep tagh. qaStaHvIS wa' rep, chaq chalDaq ghoS wej SaD chunDabmey.

Do'Ha' Europe nganpu'. pem qaS 'aqroSmey. puSqu' Leonid chunDabmey'e' leghlaHbogh vay'. 'ach rInpa' ram, 'op leghlu'bej. chaq 'ang'egh loSmaH Leonid chunDabmey, qaStaHvIS wa' rep.

le'qu' 'ebvam. tlhetlhpa' wejmaH vagh DIS qaSqa'be'. QuvlIj DaSovchugh, http://www-space.arc.nasa.gov/~leonid/estimator.html yIHotlh. chunDabmey Dabejchu'meH De' lI' DaSam.

batlh vangta'bogh jagh

qonta' 'ISqu'

lutmey vIqonmeH qechmey vIHutlhbe' 'ach ramlaw' HochHom. DaH lutmey ram luja'be'nISlu' 'e' vIHar. wa' wen nuv law'qu' HoH HIvwI'pu' mIgh. wanI'vammo' 'IQqu' 'ej QeHqu' ghot law'. noDmeH ngoy'wI'pu' luHIvlu'pu'. Saghbej poHvam 'ej lut Sagh ja'nISlu'. vaj nuq vIqellaH? jot yInwIj. not veS vISIQpu'. wej jaghna' vIghobnISpu'. 'ach veS Delbogh lut'e' vISov. be'Hom mach jIHtaHvIS lutvam muja' 'e'mamwI'. Hegh yIn je qel lutvam. vIQoypu'DI' batlh pung je mubuSchoHmoH.

ben law' qaStaH noH'a'. «qo' noH cha'DIch» lupong tera'nganpu'. qaStaHvIs noHvam SepwIj Poland, latlh Sepmey je DantaH jagh qu'. ngugh vengHom Dab vavwI' qorDu' 'ach latlh veng Dab 'ej vum wa' be'nI'Daj. vengvamDaq jagh law' lutu'lu': negh yaSpu' je. German Hol jatlhmo' 'e'mamwI', pIj mughwI' Da 'e' poQ DanwI'. lobHa'laHbe'. Doch 'ej jeQqu' jaghpu'. pIm wa' yaS neH. Dochbe'. 'e'mamwI'vaD jatlhtaHvIS ra'be', tlhob. vuvlaw' 'ej rut jawchuq. 'ach jaghDaj ghaH yaSvam'e' 'ej Hoch jaghpu' muSqu' 'e'mamwI'. wa' jaj yaSvaD jatlh: «DaH charghwI' tlhIH 'ach wa' jaj bojeylu'bej. SeprajDaq SucheghnIS. yermey boDanpu'bogh bolonnISbej.»

Do'qu' 'e'mamwI'. mu'meyvammo' HoHlaH yaS 'ach Hagh neH. jatlh: «bIyoHba', bImatlhba' 'a bIDoghqu' je.» qeS: «jaghlI'vaD bIjatlhtaHvIS, bIyepnIS. bIjatlhHa'chugh bIHeghba'». ghIq jatlh: «vay' qa'ang vIneH». HIpDajvo' navHom lel. Russia chIrghvo' nagh beQ rur. latlh DopDaq mu'mey puS lughItlhlu'pu'. «Russian Hol DalaDlaH'a'?» tlhob yaS. «HIja'» jang 'e'mamwI' 'ej laD: «batlh vangta'bogh jaghvaD»

yajbe' 'e'mamwI'. «chay' Dochvam DaSuq?» tlhob. «mu'meyvam tIQIj!»

motlhbe'ba' yaS lut.

 

chanDaq SuvtaHvIS QaSDaj, vengHomDaq mev. chImlaw' 'oH. chaq Hoch nganpu' luHoHlu'pu' qoj lunge'lu'pu'. tagha' wa' be' qan tu' yaS negh. ratlh ghaH neH 'ej QIt HeghlI'ba'. Soj Hutlh. peDqu'pu' 'ej bIrqu' muD. Sor Hap Hutlhmo' ghaH, qul chenmoHlaHbe'. mobqu'. pujqu'mo' mejlaHbe'. yIntaHlaHbe'bej.

chay' vang yaS? be' qan HoH neghDaj 'e' ra"a'? ghobe'. be' buSHa"a'? ghobe'. ghaHvaD Soj nob neghDaj 'e' ra'. Sor Hap law' meQbeHmoH 'ej qul tuj luchenmoH 'e' ra'. tlheDpa' chaH tlho'Daj 'ang neH be'. navHom lel. lalDanDajmo' ghaHvaD potlh 'oH. DopDajDaq mu'mey le' ghItlh 'ej yaSvaD navHomvam nob.

lutvam Qoypu'DI' tIqDaj nuD 'e'mamwI'. yaS muStaHba' 'a chIDnIS: «batlh bIvangta'bej.»

rIntaH noH. wa' jaj QIn Hev 'e'mamwI'. Germanyvo' ghItlhta' yaS: «bIyIntaH 'ej yIntaH qorDu'lIj je 'e' vItul. Hoch mangpu'wI' luHoHlu'ta'. SenwI'Du' rIlwI'Du' je lumuHlu'ta'. jIyIntaH jIH neH. be'vetlh qanmo' jIyIntaHbej. chay'? rInpa' noH, nutlha'taH Soviet QaS. maHeDtaHvIS may' law' DIghob. tagha' nuDech jaghpu'wI'. mavayqu' 'ach nujey. nuHmeymaj nge'pu'DI' nulIq. qama'pu' jonta' luneHbe'bej. bortaS neH luneHqu'. jachtaHvIS QeHqu': «peHegh, toDSaH! qorDu'meymaj bochotta', juHmeymaj bomeQta', vengmeymaj boQaw'ta'! DaH manoD jay'!!»

baHchoH. pum wa' mang. pum latlh. pum latlh je…. mumuHchoHDI' HIpwIjDaq potlh nej. nagh beQ rurbogh navHom neH lutu'. 'oH'e' nuDchu' 'ej mu'mey laD. «nuq 'oH Dochvam'e'? Dunob 'Iv?» mughel. chaHvaH lutwIj vIja'. yay'qu' Hoch. tamchoH, ghIq qaStaHvIs poH nI' ja'chuq. SanwIj luwuqtaHvIS, jIloS. nuq luwuq? Dat Qot mangpu'wI' lommey. tugh bIH muv'a' porghwIj?

tagha' muchol jagh ra'wI'. navHom munobHa' 'ej mujatlh «pung Da'angta'bej. SoH'e' pIHoHQo'. naDevvo' yIghoS!» mej chaH. jIyIntaH jIH.»

rIn 'e'mamwI' lut.

rut jIghel'egh. toDujwIj vItob net poQDI', batlh jIvanglaH'a'? mIghwI' neH vIqaDlaH'a'? jagh QIHlu'pu'bogh vIghomchugh, ghaHvaD pung vI'anglaH'a'? wej jIjanglaH.