chovnatlh wej'maH loS
DIS cha'SaD cha'maH cha', jar Hut
ghItlhvam HIDjolev
- Ukraine Sep 'oDeSa' veng, qonta' cha'Qargh
- munuQ wa' buSHach, mughta' Magyar Pál
- mu' qaD, qonta' Holmey wam
chegh Qo'noS QonoS!
tagha' cheghpu' Qo'noS QonoS. chovnatlh chu' vImuchtaH, tlhIngan Hol lutHom, ghuQ, Quj joq vIHevtaHvIS. taH Qo'noS QonoS DaneHchugh, latlh lutHommey, ghuQmey, Qujmey joq yIqon 'ej DaqDaq yIngeH! – qurgh
Ukraine Sep 'oDeSa' veng
qonta' cha'Qargh
(peqIm: lutna'wIj 'oHbe'. lutvam vI'oghpu' neH)
Ukraine SepDaq qaS noH 'ach qaSpa' cha'Hu' 'oDeSa' vengDaq qaS pagh. 'oDeSa' veng vIDab 'e' vItIvqu'. 'ach vengvam vImej vIneHbe'. vengvam vImejDI' jI'ItchoH 'ej latlh Sepmey vengmey joq vIDabchoH vIneHbe'. naDev wej HIvpu' raSya'ngan negh 'ach reH qIyIw maryu'pol lIvIw je vengmey HIv chaH.
reH tayqeq chun neH peq raSya'ngan negh. vengmajDaq puS Haw'meH Dujmey 'ach wa'Hu' ram pay' vengmaj HIvpu' 'ej choltaHvIS noH mughIjchoHqu' wanI'. pay' jISaQchoH 'ej tugh jIHaw'nIS DaH 'e' vItlhoj. 'opleS rInDI' noH vengwIj vIcheghbej. pel'aQDaj ghorpa' Hoch nuH vIqelnIS 'ej Haw'meH lupwI' Qav tIjmeH 'eb vIjonnIS. toH.
DaH 'oDeSa' luHIv chaH 'ach qaStaHvIS poH ru' po'lISqa' SepDaq jIratlh vIneH UkraineDaq Summo' po'lISqa' Sep. jIratlhlaH'a'? jISovbe'. qaqlaw' pa'logh.
pItlh!
munuQ wa' buSHach
(Egy gondolat bánt engemet…)
qonta' Petőfi Sándor
mughta' Magyar Pál
QongDaq buqHommey jojDaq jIHeghmeH
vIraDlu'chugh, munuQ wa' qechvetlh neH!
luchoptaHmo' ghargh Ho',
QIt Heghbogh 'InSong vIrurQo';
pa' chImDaq QIt nupbogh weQ'e'
vIrur, Qu'vatlh, vIneHbe'.
Heghvam HI'oghQo', Qun'a'wI',
jIHvaD yI'oghQo' jIHeghDI'!
'o, Sor'e' mupbogh pe'bIl HoSghaj,
vungmo' pumbogh Sor joq vIrurjaj
qoj chal, yav je QommoHbogh tuD HoSmo',
HuDvo' ngechDaq ronbogh qoj'e' vIrurchugh, vItlho'! –
QopmoHmo' mIrmeychaj, QuD
taghDI' Hoch toy'wI"a' chuD,
DoqchoHbogh qevpobDu'
rurbogh joqwI'mey DoqDaq mu' quv ghItlhlu':
«tlhab» 'oH mu'vam'e'
'ej HochvaD qa' je'.
qo' naQDaq mu'vam lujachDI' law' 'uy'
'ej chaH ghobDI' wIHqu'bogh HI'tuy:
ngugh che'ronvetlhDaq
muHoHjaj mevaq,
pa' reghchu'jaj Qupbogh tIqwIj,
'ej ngabjaj mu'wIj'e' HochDIch
lujachbogh wuSDu'wIj Do'
nuH, gheb, tal je wabmeymo',
'ej lomwIj lugho'jaj
jevtaHbogh Sarghmeymaj,
yaymaj luchavmeH lIghDI' nawlogh,
'ej pa' ratlhjaj porghwIj ghorlu'pu'bogh. –
pa' HommeywIj luboSlu'jaj
qaSbeHDI' nol Dun jaj.
ngugh QoQ SeQ lutlhej
nol joqwI'mey 'ej
mol tlhInHa'Daq SoHvaD Heghpu'bogh Sub lumollu',
'o, qo' tlhab quvqu'!
jatlhpu' neHbe', ghuQvam qonta'bogh Petőfi Sándor'e'; vangta'. Doch neHpu'bogh, Suqpu': che'ronDaq Heghpu', maDyar tlhab noH ghobtaHvIS. 26 DIS yInpu'.
mu' qaD
qonta' Holmey wam
HuD wu' lutoS ghojmoHwI' ghuv je. Qatlhqu' leng 'ej qaSpu' rep law'. tagha' yorDaq Qam 'ej nagh tIn legh. naghDaq ngutlhmey teyta' vay'. jatlh ghojmoHwI'.
<<HuDvam DatoSpu'mo', HoS Da'agh. nIlajmeH DuSaQ pIn'a', bIval 'e' Da'aghnIS je. jIHvaD nagh QIn yIlaD.>>
<<'ach, qaH. tlhIngan Hol lo'be' QIn>> jatlh ghuv.
<<ngutlhmeymajvaD lIw bIH raSya' ngutlhmey'e'. tlhIngan wab naQ 'oS raSya' wab naQ. 'ej tlhIngan wab poD 'oS raSya' wab poD.>> jatlh ghojmoHwI'. <<cha'logh cha' ngutlhmaj 'oS wa' raSya' wab naQ. <ar>, <ay> je bIH ngutlhmaj'e'. raSya' ngutlhmey pIm bIH.>>
<<tlhIngan vIttlhegh vIpIH. wa' mu' neH vIlegh.>>
<<wej mu' ngaS vIttlheghvam. mu' 'olQanmey 'uch je wa' raSya' ngutlh.>>
* * *
ghuv SoH 'e' yIghet. QIn yIlaD.
QIn: ЖЙЬЪМЫЦЯФГЁХЪЧЭШИХ
