chovnatlh cha'maH vagh

DIS cha'SaD cha', jar cha'

ghItlhvam HIDjolev

jajvam batlh maSopbej jay'!

nuqDaq tlhIngan Soj SamlaH ghungwI'? Qo'noSDaq ngeD Qu'vam. tera'Daq tlhoS qItbe'. 'ach qen maDo' juppu'wI' jIH je. yuQvamDaq maSopchu'meH 'eb povqu' wIjonta'. jIvIt! bo'Dagh'a' vIlo'be'! qepHom wIjeStaHvIS Waiblingen, GermanyDaq Do Qe' wItu' 'ej DuQbogh megh wISop. chay'? lutwIj yIlaD 'ej ghoghalchoH!

maghungchoHDI' Qe' wInejchoH. le'be'law' Qe' wItu'pu'bogh 'ach Qe' lojmIt DungDaq le'bejbogh HaSta wIlegh. HaStaDaq «moD Soj» cha'lu'pu'! nutlhu'moHqu' mu'meyvam. lojmIt wIpoSmoH 'ej maSeyqu'choH. Dat tlhIngan 'aH wIlegh. jaqmoHbogh QoQ wIQoy. 'eybogh Soj wIlargh: pe'vIl He', jejbej pach! majQa'! loQ motlhbe' Do Qe'vam: tebwI'pu' lutu'lu'be'law', jabwI'pu' DIlegh. 'ach tlhIngan Qe' 'oHbej Daqvam'e'. qejqu'bej jabwI'pu'. mana'qu': tugh maSopchu'!

nom ma'el, raS retlhDaq maba' 'ej … 'ej … maloS. qaS nuq? Soj wInoblu"a'? ghobe'! maloS. maloSqu'. qaStaHvIS tup law' maloSqu' jay'! qaS pagh! nubuSHa'chu' jabwI'pu'.

tagha' maQubchoH. toH! megh wISuqmeH mavangnIS! jabwI'pu' DIvangmoHmeH nujDu'majDaq DISIqtaHvIS majachchoH, majatlh: «maghung! Soj wIneH!» qaS nuq? Soj nuqem'a'? ghobe'! maloS. maloSqu'. qaStaHvIS tup law' maloSqu' jay'! qaS pagh! nubuSHa'chu'taH jabwI'pu'. 

pe'vIl maQubchoH. toH! megh wISuqmeH mavangnISchu'! HIDjolev tIn wIlaDchoH. nay' tetlh DungDaq «vay' DaneHchugh vaj ghora'» ghItlhlu'pu'. mavangchoHchu' 'e' wInID. jabwI' cholmoHmeH jach veSveb, jatlh: «jabwI', HIghoS!» Qap to'vam: veSveb ghoS HI'jat, jabwI' wa'DIch. «nuq DaneH?» tlhob. HIDjolevDaq SIq veSveb. nay' wIv. jatlh: «Dochvam vIneH.» qaS nuq? loS veSveb. loSqu'. qaStaHvIS 'op poH loStaHqu' jay'! qaS pagh! vIHbe' jabwI'. QamtaH neH montaHvIS, naSwI' rur. lujpu' veSveb.

'oy'qu' Qay'wI'maj. pe'vIl maQubtaH. toH! tlhIngan Qe'Daq maHtaH. nuqImchoHmeH jabwI'pu' tlhInganpu' DIDanIS! HIDjolev wIlaDqa'. nay' tetlh wIHaDchoH. tIqbe'. Do Qe'Daq Soj Seghmey puS neH lujablu'. nuq wISoplaH? qagh, ghevI', raHta', QIm, naHlet je jablu'. HIq, qa'vIn, Dargh je jablu' je. loQ jum nay' tetlh, cha'maH cha' joQDu' ghajlaw': «DaHjaj gheD» tu'lu'be', «wa'Hu' gheD» tu'lu'! Huj, qar'a'? naDev HaDI'baH ghoQ jabbe'lu'ba'. nay' tetlh wIHaDtaH 'ej latlh ngoD jum wItu': tlhatlh Soplu'taHvIS motlh 'uSu' je Soplu' net Sov. 'ach naDev 'uSu' neH jablu' 'ej tlhatlh jablu'be'! taQ, qar'a'? 'ach mayaj. tera'Daq tlhIngan tIgh pablaHchu'be' vay'.

nay'mey DIwIvchoH. jach SIne'Iq, jatlh: «jabwI', HIghoS! HIq HIqem!» Qap SIne'Iq. ghaHvaD HIq bal qem rav'uQ, jabwI' cha'DIch. Qapla'Dajmo' belqu' SIne'Iq. qagh SuqmeH jabwI' ra', jatlh: «qaH vIneH». mu' "qagh" jatlhHa'bej 'ach valchugh jabwI' yajchu', qar'a'? qarbe' jay'! lujqu' SIne'Iq. qaS nuq? loS SIne'Iq. loSqu'. qaStaHvIS 'op poH loSqu' jay'! qaS pagh! yajlaHbe'law' jabwI'. SIne'Iq bejtaH neH. ghIq Ho'Du'Daj 'ang, tlhIS. the"egh. HeD. Qu'vatlh!

tagha' mayajchoH. jabwI'pu' DIra'taHvIS, mayepqu'nIS. majatlhHa'chugh pagh wISuq. pupnIS tlhIngan Hol QIch. qaStaHvIS 'op tup Soj pongmey DIqeqtaH. QIt DubchoH QIchmaj. Soj wISuqchoH. qagh ghevI' je Suq nIQta', veSveb je. raHta' 'uSu' je vISopchoH jIH. meghDaj Soppa' tIngtal ghuDaj je'. Human Soj Sop puqloDDaj. 'oHvaD "Baby Food" ponglu'. wej SopchoH SIne'Iq. ghungqu'taH, qagh rur. juppu'Daj ngop bej. SuD veqlargh mInDu'! SopmeH QIch wabmey qeqnIStaH SIne'Iq. tagha' Qap. qaghDaj 'ey Suq.

raHta' SopchoH tIngtal. yIQqu' SojDaj. baghneQ poQbej 'ach mu' «baghneQ» qawchu'be'. ghungqu'mo' mu'ghomDaj poSmoHQo'. SopmeH ghopDu'Daj lo'. tugh qabDajDaq ghopDajDaq je Soj tu'lu'. meghDaj tIvba' tIngtal.

tIr Soj neH veSveb. 'ach ngeDbe' Sojvam SuqmeH Qu'. mu'mey «roll» «bread» joq QoyDI' jabwI'pu', yajbe'law', mon neH. tagha' tamchoH veSveb. vangnIS 'e' wuq. vutpa' 'el 'ej «roll» tlhap 'e' wuq. vutpa' 'elchoHDI' jachchoH jabwI'pu'. nuHmeychaj lel. jatlh «Qo'! vutpa' yI'elQo'! vay' DaneHchugh vaj ghora'!» baQa'! jabwI' ra' 'e' nID veSveb. «nov Soj vISop vIneH» jatlh. yajbe' jabwI'. tlhob: «nov Soj yIngu'! nov yIngu'!» Human ghu legh veSveb 'ej ghaHDaq SIq. yajchoHlaw' jabwI'. vutpa' ghoS. ghIq chegh ….. Human "Baby Food" ngaSbogh bal mach qengtaHvIS! veSveb vonlu'chu'! Qu'vatlh! Hu'tegh! baQa'. ra'Ha'lu'chugh qaS Seng!

belra'vaD qagh ghevI' je qemta' jabwI'. 'ey qagh 'ach bIQ 'Iq ngaSmo' jeDHa' ghevI'. belHa' belra'. bepchoH. jengva'DajDaq SIqtaHvIS jabwI'vaD jatlh: «bIQ 'oH». jengva' legh jabwI'. Soj nuD. merlu'law'. «nuqjatlh?» jatlh «bIQ vIleghbe'. Soj vIlegh. bImaw"a'? chaq quvwIj DatIch DaneH jay'!!!» QIjbe' belra'. chImtaH burghDaj. Soppu'pa' Suvqangbe'. nom jatlh «'IwwIj jeD law' 'IwlIj jeD puS». vIDbe'choH jabwI'. Do'Ha' jeDchoHbe' belra' ghevI'.

qa'vIn neH veSveb. jabwI'vaD jatlh: «qa'vIn HIqem». quSDaq ba'qangbe'mo' «HIvje' HIqem je» jatlhbe'. qa'vIn qem rav'uQ jabwI' cha'DIch, montaHvIS, nISwI'na' rur. tlhoS raSDaq qa'vIn qang. Do' pel'aQDaj ghorpa' «Qo'!» jatlhlaH veSveb, «HIvje' vIpoQ!» ra'Ha'lu'chugh qaSbej Seng!!

SIne'IqvaD yapbe' SojDaj. HIDjolevDaq mu' «QIm» Sam. maj. jatlh «jabwI', QImmey tIqem!». yajchu' jabwI'. tlhob: «'ar?» cha' nItlhDu' 'ang SIne'Iq 'ach luj to'vam. tlhobqa' jabwI': «'ar?» jangnIS SIne'Iq. Do'Ha', jangtaHvIS, jatlhHa'qa': «ja'» jatlh. yajbe' jabwI'. QubchoH. tagha' yajlaw'. jav QIm tlhap 'ej SIne'IqvaD bIH jaDchoH. morgh SIne'Iq. jachtaHvIS «Qo'! Qo'!» jatlh. cha' QImmey SuqmeH ra'nISchu'.

maSoptaHvIS Soj jaDchoH ghu 'ej Soj may' tagh. Do'Ha' Soj Qor neH 'oH. buy'chu'pa' burghDu'maj Soj Daj potlh may' Daj ram. tagha' maghungbe'choH. SopwI'pa' 'elqa' HI'jat Quvar je. 'ach qatlh betleHmeychaj 'uch? DaH qejHa'law'. mon, tlhoS Humanpu' rur. Qap'a' mInDu'maj?! nughel jabwI'pu': «Suyon'a'?» QI'yaH! Qap'a' teSDu'maj?! qejtaHvIS jabwI'pu' DIvuvlaHpu'. qejHa'choHDI' nuQay'moH. malulchoH. tugh che'ron rurchoH Qe'! reH meghvam wIqawbej!

ghaytan qarchu'be' lutvam. ngoDvammo' loQ juppu'wI' pongmey vIchoHta'. juppu'wI' vImaw vIneHbe'bej. vIquvmoHmeH lutvam vIqonta'. quvjaj juppu'wI': T'Ntal, nI'taQ, taj'IH, Snake, Quvar, B'Elora, veSbe' je. povvetlh batlh maSopbej!