rut

'ay' 1

1che'taHvIS noHwI"a'pu', SepDaq vey'Ha'choH Soj. yeHu'Daya'Daq betlhe'Hem Dabbogh loD tu'lu'. mo'av leng 'ej pa' ratlh qaStaHvIS poH ngaj 'e' wuq. be'nalDaj, puqloDpu'Daj je qemta' je. 2'elImeleH 'oH loDvetlh pong'e' 'ej nayo'mI' 'oH be'nalDaj pong'e' 'ej maHlon qIlyon je bIH puqloDpu'Daj pongmey'e'. yeHu'Daya'Daq betlhe'Hem luDabbogh 'evra'yIm tuqnIghpu' chaH. 'ej mo'av Sep lujaH 'ej pa' ratlhpu'. 3'ej Heghpu' 'elImeleH, nayo'mI' loDnal. ratlh nayo'mI', cha' puqloDpu' je. 4'ej mo'avnganpu' Sawpu' puqloDpu'. 'orpa' 'oH wa' pong'e' 'ej rut 'oH cha'DIch pong'e'. 'ej pa' ratlh qaStaHvIS wa'maH DIS. 5'ej Heghpu' je maHlon qIlyon je. vaj loDnalDaj, puqloDpu'Daj je weSpu' be'. 6nughDaj QorghmeH chaHvaD tIr ngogh nobchoH joH'a' 'e' ghojmo' nayo'mI', mo'avvo' cheghmeH lengrupchoH ghaH, puqloDpu'Daj be'nalpu' je. 7vaj Daq'e' Dabpu'bogh ghaH lutlheDta' ghaH, puqloDpu'Daj be'nalpu' je 'ej yeHu'Daya' ghoSbogh tawDaq lengchoH. 8ghIq puqloDpu'Daj be'nalpu'vaD jatlh «tlhIH'e', SoSpu'ra' juHmey tIchegh. Heghpu'wI'vaD, jIHvaD je SunaHHa'pu'; jaSHa' tlhIHvaD naHHa'jaj joH'a'. 9lulIghmeyraj moj loDnalpu' chu' juHmey 'e' chaw'jaj joH'a'.» 'ej chaH choppu' 'ej nItebHa' SaQpu' chaH chuStaHvIS. 10'ej ghaHvaD jatlhpu' chaH «nughlIj DacheghtaHvIS pItlhejbej.» 11'ach jatlhpu' nayo'mI' «pechegh, puqbe'pu'wI'. qatlh tutlhej? chorwIjDaq loDnalpu'ra' chaHlaHbogh latlh puqloDpu"e' lutu'lu"a'? 12pechegh. pejaH, tlhoy jIqanmo'; latlh loDnal vISuqlaHbe'. jItultaH net jalchugh 'ej ramvam loD vInaylaH net jalchugh je 'ej latlh puqloDpu' vIboghmoHlaH net jalchugh je, 13nen puqloDpu'vetlh 'e' boloSqang'a'? chaHvaD pagh latlh bonayqang'a'? Qo', puqbe'pu'wI'. muqaD joH'a' ghop; jI'IQqu' lIbechmoHmo' wanI'vam. 14'ej jach chaH SaQqa'taHvIS. loDnalDaj SoS vanmeH ghaH choppu' 'orpa' 'ach mejQo'pu' rut. 15'ej jatlhpu' nayo'mI' «yIqIm! nughDaj, QunDaj je cheghchoH loDnallI' loDnI' be'nal. yItlhej.» 16'ach jangpu' rut; jatlhpu' «qamej qoj qatlha'Ha' 'e' yIra'Qo'. ghochwIj 'oH ghochlIj'e'. nughwIj 'oH nughlIj'e'. Qun'a'wI' ghaH Qun'a'lI"e'. 17HeghmeH DaqwIj 'oH HeghmeH DaqlIj'e' 'ej pa' vImollu'. yItlhtaHvIS muDIghjaj joH'a', nuchevchugh Hegh 'oHbe'bogh vay"e'. 18tlhej 'e' Hechqu' rut 'e' tlhojDI' nayo'mI', mej 'e' ra' 'e' mev. 19vaj jaHpu' cha'; betlhe'Hem lupawta'. 'ej betlhe'Hem lupawta'DI', Seyqu' veng Hoch cha'vammo'. 'ej jatlhpu' Hoch be'pu' «nayo'mI' ghaH'a' be'vam'e'?» 20'ach chaHvaD jatlhpu' nayo'mI' «nayo'mI' HIpongQo'; mara HIpong, yInwIj wIbqu'moHpu'mo' joH'a'. 21jImejDI' jIbuy' 'ach DaH jIchIm. juHwIjDaq muqemta' joH'a'. qatlh nayo'mI' tupong? mu'ompu' joH'a' 'ej mubechmoHpu' HoSghajwI"a'.» 22vaj mo'avvo' cheghta' nayo'mI' tlhejtaHvIS rut—mo'avngan, puqloDDaj be'nalDaj je. betlhe'Hem lupawta'DI', barlI' tIr yobchoHlu'.

'ay' 2

1'ej loDnalDajmo' chuD ghaj nayo'mI'. 'elImeleH tuqnIgh ghaH chuDvam'e' 'ej bo'eS 'oH pongDaj'e'. 2vaj nayo'mI'vaD tlhobpu' rut, mo'avngan; jatlh «yotlhmey vIjaH 'ej pa' wa' vIbelmoHlaHbogh 'emDaq tIr chuv vIyIr 'e' yIchaw'.» 'ej jangpu' nayo'mI'; jatlh «yIjaH, puqbe'wI'.» 3'ej mejpu' 'ej yobwI'pu' 'emDaq tIr chuv yIrchoH. 'ej bong bo'eS yotlh 'ay'Daq vum. ghaH'e', 'elImeleH chuD ghaH. 4'ej ngugh betlhe'Hemvo' pawta' bo'eS 'ej yobwI'pu' vanpu'; jatlhpu' «lItlhejjaj joH'a'!» ghaHvaD jangpu' chaH; jatlh «DuquvmoHjaj joH'a'!» 5yobwI'pu'Daj vu'bogh toy'wI'DajvaD jatlhpu' bo'eS «'Iv be' ghaH be'vam Qup'e'?» 6vaj jangpu' yobwI'pu' vu'bogh toy'wI'; jatlh «mo'avngan ghaH be'vam Qup'e'. mo'avvo' cheghta'DI' nayo'mI', tlhejta'. 7jatlhpu' ghaH ‹tIr Qechjemmey tay'Daq yobwI'pu' 'emDaq tIr chuv yIr 'e' yIchaw'neS.› vaj yotlh 'elta' 'ej po DaH je qubbID vumlI'. 'a loQ lulIghDaq yevpu'. 8'ej rutvaD jatlhpu' bo'eS «HI'Ij, be' Qup. latlh yotlhDaq tIr chuv yIyIrQo' 'ej Daqvamvo' yIjaHQo'. naDev yIratlh 'ej mutoy'bogh be'pu' tItlhej. 9yotlhDaq yoblI' chaH; tItlha'. lIHotQo' loDpu' Qup 'e' vIra'. 'ej bI'ojDI', bal'a'mey'e' tebta'bogh loDpu' tIjaH 'ej bIHvo' yItlhutlh. 10ngugh lavchoH rut 'ej yavDaq qabDaj Qeq je 'ej ghaHvaD jatlhpu' «qatlh jIHvaD bInaHHa'qu'? nov jIH; qatlh choqIm?» 11'ej jangpu' bo'eS; jatlhpu' «Heghpu' loDnallI' 'ej SoSDajvaD Qu'mey law' Daturta' 'e' vIghoj. vavlI', SoSlI' je, munglIj Sep je Damejta' 'ej nugh DaSovbe'pu'bogh DaghoSta'. 12ta'meylIjmo' SoHvaD pop nobjaj joH'a'. SoHvaD tev'a' nobjaj joH'a', yISra'el Qun'a': lulIghlIj lumoj telDu'Daj bIng.» 13'ej jatlhpu' rut «qabelmoH 'e' vImevbe'jaj, 'o joHwI'; chobaw'moHpu' 'ej toy'wI'lI'vaD bIjatlhpu'DI', bInaHHa'. 'a toy'wI'pu'lI' vIrurbe'.» 14'ej nay' rep ghaHvaD jatlhpu' bo'eS «naDev yIghoS 'ej tIr ngogh yISop 'ej pIchSIvDaq tIr ngogh yIyIQmoH.» vaj yobwI'pu' retlhDaq ba'pu' rut 'ej ghaHvaD tIr QaD nobpu' bo'eS. Soppu' 'ej yonpu' 'ej chuv 'op Soj. 15'ej tIr chuv yIrmeH Hu'pu'DI' rut, toy'bogh loDpu' ra'pu' bo'eS; jatlh «tIr Qechjemmey tay'Daq tIr chuv yIr be'vam 'e' yIchaw' 'ej yItuHmoHQo'. 16'ej tIr Dojmeyvo' pum tIr chIch ghaHvaD 'e' yIbotQo'. pumbogh tIr yIlon; yIrjaj ghaH. 'ej yInaDHa'Qo'.» 17vaj ngugh tlhom je qubbID yotlhDaq tIr chuv yIrlI'. ghIq barlI' tIr yIrta'bogh tlhappu' 'ej 'oHvo' raS'ISmey chevta'. jav chebmey ngI'. 18'ej tIrvam woH 'ej veng 'elta' 'ej Hoch tIr chuv yIrta'bogh rut leghpu' rut loDnal SoS. 'op Soj chuv polta'bogh lelpu' je rut 'ej nayo'mI'vaD nobpu'. 19rut ghelpu' loDnalDaj SoS; jatlhpu' «DaHjaj nuqDaq tIr chuv DayIrta'? nuqDaq bIvumta'? quv Dutu'pu'bogh loD!» ghIq loDnalDaj SoSvaD yotlh SeHwI' pong ja'pu' rut; jatlh «DaHjaj loDvaD jIvumta'; bo'eS 'oH pongDaj'e'.» 20'ej puqloDDaj be'nalvaD jatlhpu' nayo'mI' «quvmoHjaj joH'a'! yIntaHwI'pu'vaD, Heghpu'wI'pu'vaD naHHa' 'e' mevbe'.» 'ej ghaHvaD jatlhpu' nayo'mI' «tuqnIghma' ghaH loDvam'e'; nu'avnISbogh QanwI'ma' ghaH.» 21ghIq jatlhpu' rut, mo'avngan; jatlhpu' «vabDot mujatlhpu' ‹vumwI'pu'wI' tItlhejtaH rInbe'taHvIS tIrwIj yobmeH mIw.›» 22'ej puqloDDaj be'nalvaD jatlhpu' nayo'mI'; rutvaD jatlhpu' «ghaH lutoy'bogh be'pu' Qup Datlhejmo', nIv ghu', 'o puqbe'wI'. chaq latlh yotlhDaq lItu'mo' chaH. 23vaj tIr chuv yIrmeH bo'eS be'pu'Daq SumtaH rut, barlI' tIr wIt tIr je luyoblu'taHvIS. 'ej loDnalDaj SoS juH qach Dab rut.

'ay' 3

1ghaHvaD jatlhpu' loDnalDaj SoS; jatlhpu' nayo'mI' «puqbe'wI', SoHvaD juH vInejlI'. juHDaq DaQorghlu'bej. 2DaH yIqIm: chuDma' ghaHbe"a' bo'eS'e'? vabDot lutoy'bogh be'pu'Daj Datlhejta'. ramvam raS'IS chevmeH ravDaq barlI' tIrDaj yughmoH. 3yISay"eghmoH. SoHDaq He'So'Ha'moHwI' yIqang. 'ej SutlIj nIv yItuQchoH. ghIq raS'IS chevmeH rav yIjaH. 'a pa' bISaH 'e' Sov 'e' yIchaw'be', Soppu'pa' 'ej tlhutlhpu'pa'. 4'ej QotchoHDI', QotmeH DaqDaj yItu'. ghIq yIchol 'ej qamDu'Daj tISo'Ha' 'ej yIQotchoH. ghIq Dura' ghaH.» 5'ej ghaHvaD jatlhpu' rut «Hoch Dara'bogh vIturbej.» 6vaj raS'IS chevmeH rav jaHta' 'ej Hoch'e' poQpu'bogh loDnalDaj SoS turta'. 7Soppu'DI' 'ej tlhutlhpu'DI' 'ej Quchqu'DI' bo'eS, tIr Doj retlhDaq QotchoH. tamtaHvIS ghaH cholta' rut. qamDu'Daj So'Ha' 'ej QotchoHpu'. 8DorDI' ram bID, pe'vIl vempu' loD 'ej tachpu'—qamDu'Daj retlhDaq QottaH be'. 9'ej jatlhpu' bo'eS «SoH 'Iv?» vaj jangpu' rut «rut, toy'wI'lI', jIH. chovelmeH SutlIj po'oH yIlo', qorDu'maj 'avnISbogh QanwI' SoHmo'.» 10'ej jatlhpu' bo'eS «DuquvmoH joH'a', be' Qup. bI'reS DaH je qubbID ghurpu' naHHa'qangghachlIj: loDpu' Qup DaSuq 'e' DanIDbe'; vabDot mIpmeychaj, mIpmeychaj 'en je DaqImHa'. 11'ej DaH, be' Qup, yIbaw'Ha'Qo': Hoch DapoQbogh vIturqang; be' quv SoH 'e' luSov vengwIj Hoch nganpu'. 12'ej 'avbogh QanwI' jIH; teH. 'a Du'avmeH QanwI' vIgheSpa', gheSqangbe'nIS wa' latlh. 13ramvam naDev yIratlh 'ej po Qu'Daj tur neHchugh, maj. Durangjaj ghaH. 'a Qu'Daj turqangbe'chugh, vaj qarangqang jIH. yIntaH joH'a'; teHchu'. jaSHa' teHchu' ngoDvam. qaSpa' po, naDev yIQottaH.» 14vaj ngugh po je qubbID qamDu'Daj retlhDaq QottaH ghaH. 'ej Hu'pu', vay' ghovlu'pa'. 'ej jatlhpu' bo'eS «raS'IS chevmeH rav ghoSpu' be' 'e' SovnIS pagh.» 15'ej jatlhpu' je «nach velwI' tlhImlIj HIqem 'ej SoH tlhopDaq yI'uch.» 'ej ghaH tlhop tlhInDaq tlhIm 'uchDI', wa'vatlh chorghmaH cheb ngI'bogh barlI' tIr Doj juvta' bo'eS ghIq rutvaD Dojvam nobta'. ghIq veng cheghta' bo'eS. 16loDnalDaj SoS ghoSta'DI' rut, tlhob nayo'mI' «qaSpu' nuq, puqbe'wI'?» ghIq nayo'mI'vaD Hoch ta'ta'bogh bo'eS ja'pu' rut. 17'ej mu'tlheghvam chelpu': «wa'vatlh chorghmaH chebmey ngI'bogh barlI' tIr munobpu' 'ej mujatlhpu' ‹loDnallI' SoS DacheghDI', pagh Daqembe'jaj.›» 18ghIq jatlhpu' nayo'mI' «yIba'choH 'ej ghu'vam bertlhamna' yIloS, puqbe'wI'; leSQo' loDvam, jajvam rInpa' ghu'vam.

'ay' 4

1'ej lojmIt'a' jaHta' bo'eS 'ej pa' ba'choHDI' pawpu' 'avbogh QanwI' rIchpu'bogh. vaj jatlhpu' bo'eS «naDev yIghoS 'ej yIba', jupwI'!» vaj ghoSpu' 'ej ba'choH. 2'ej wa'maH veng quppu' rItta' 'ej ba'choH chaH 'e' ra'. vaj pa' ba'choHpu' chaH. 3ghIq 'avbogh QanwI'vaD jatlhpu' bo'eS «mo'avvo' cheghta' nayo'mI' 'ej yotlh'e' ghajpu'bogh 'elImeleH, tuqnIghma', ngevlI'. 4'ej qaSovmoH 'e' vIwuq. SoHvaD ghu'vam vIchup vIneH: SaHwI'pu'vam tlhopDaq, nughwIj quppu' tlhopDaq je 'oH yIje'. Daje'qangchugh, vaj yIje'. 'ach Daje'Qo'chugh, jISovmeH HIja'. je'meH DIb Daghaj SoH neH. 'a Daje'Qo'chugh, vIje'meH DIb vIghaj jIH'e'.» 'ej jatlhpu' QanwI' «vIje'.» 5ghIq jatlhpu' bo'eS «nayo'mI'vo' yotlh Daje'DI', Heghpu'wI' pong DataHmoHmeH rut—mo'avngan—DaSuq je net poQ.» 6'ej jatlhpu' 'avbogh QanwI' «yotlh vIje'laHbe', yerwIj tlhIn qalmoHlaH 'oH.» SoH'e', yIje'. vIje'laHbe'. 7ben law' yISra'elDaq vay' tamchu'meH waqDaj tlhIn teq loD 'ej latlhvaD 'oH nob. 'ej HuqmeH mIw 'oH tIghvam'e'. 8vaj bo'eSvaD jatlhpu' 'avbogh QanwI' «SoH'e', yIje'.» 'ej waqDaj tlhIn teqpu'. 9'ej quppu'vaD, Hoch SaHwI'pu'vaD je jatlhpu' bo'eS «jantorpu' tlhIH: DaHjaj nayo'mI'vo' 'elImeleH, qIlyon, maHlon je yer Hoch vIje'pu' 'e' bolegh. 10rut— mo'avngan, maHlon weSpu'bogh be'nal'e' je—vISuqpu' 'ej yerDajDaq Heghpu'wI' pong taHmoHmeH be'nalwI' moj: tuqDajvo', mungDaj vengvo' je ngabbe' pongDaj. DaHjaj jantorpu' tlhIH!» 11ghIq lojmIt'a'Daq jatlhpu' Hoch SaHwI'pu', Hoch quppu' je «jantorpu' maH. raHel, leyya je rur juHlIj 'elbogh be"e' 'e' qaSmoHjaj joH'a'. nItebHa' yISra'el tuq luchenmoH raHel, leyya je. 'evratDaq bIchepjaj 'ej betlhe'HemDaq bInoyjaj.» 12SoHvaD puqpu' boghmoHpu' be'vam Qup 'e' qaSmoHDI' joH'a', peretlh puqpu' rurjaj puqpu'lI': yeHu'DavaD ghaH boghmoHpu' tamar.» 13vaj rut tlhappu' bo'eS 'ej be'nalDaj mojpu' ghaH. 'ej ghaH ngaghpu'DI', yatlhchoH rut 'e' chaw' joH'a' 'ej puqloD boghmoHpu' rut. 14'ej nayo'mI'vaD jatlhpu' be'pu' «joH'a' naDlu'jaj! DaHjaj 'avbogh QanwI' DaHutlh 'e' lajQo'. yISra'elDaq Dat noyjjaj pongDaj. 15yInlIj chu'qa'moH 'ej bIqantaHvIS Durach. boghmoHpu' puqloDlI' be'nal. ghaH qaq law' Soch puqloDpu' qaq puS.» 16ghIq ghu woHpu' nayo'mI' 'ej ghaH Qorgh. 17'ej lupongpu' jIlpu'; jatlhpu' «puqloD Suqpu' nayo'mI'!» 'ej ghaHvaD 'oveD lupongpu'. yeSay vav ghaH. DawID vav ghaH yeSay'e'. 18'ej peretlh quH 'oH quHvam'e': Hetlhron vav ghaH peretlh'e'. 19ram vav ghaH Hetlhron'e'. 'amIna'Dav vav ghaH ram'e'. 20naHSon vav ghaH 'amIna'Dav'e'. SelaH vav ghaH naHSon'e'. 21bo'eS vav ghaH SelaH'e'. 'oveD vav ghaH bo'eS'e'. 22yeSay vav ghaH 'oveD'e' 'ej DawID vav ghaH yeSay'e'.