tlhIngan-Hol Archive: Thu Sep 20 02:23:57 2001
[Date Prev][Date Next][Thread Prev][Thread Next]
Re: chunbe' USA
mu'oy'moH ngachtaHghachvam. mu'oy'moH je, lughmo' cha' qabDu'.
'ej loQ jupna'vaD jItlhochmo'.
Doch, DaH USA qum qIchlu'chugh. 'ach chaq 'ut je.
reH chun qumvetlh 'e' vIHarbe'. reH lugh wIvDI' 'e' vIHarbe' je.
'ej SorghwI''a'pu', USA ghap vIwIvmeH net poQDI',
vaj jIwIvQo'laHchugh, jIwIvQo'. chISwI', qIjwI' je vIleghQo'.
pIch lughaj ghot 'Iq. Soviet wo' SuvmeH po'meH Bin Laden, baj 'Iv?
Iran SeHmeH, Saddam DIl 'Iv? CambodiaDaq Hegh 'ar?
'ach jIwIvnISchugh, jIwIv net raDchugh,
vaj Hochlogh QaQ USA qum 'e' vIHonmeH DIbvaD vIqaptaHvIS je,
jIchID je: QaQbe', 'ach qaq. tlhachDajDaq vItu'lu'ba', jIboghDI'.
vIqapmeH, DIb chaw' je qo'vam. wanI'vetlhmo' Dun.
'ach qIch luQoyQo'DI' HochHom, ramba' DIb.
QomDI' wo', democracy toblu'. QaDDI' toblu'be'.
wo'vam vIDab 'ej 'oHDaq vIvummeH wejben chaw'mo',
'ej juppu'wI' Doj lIngmo', qo'vam vItlho' 'ej vIHIvbe'.
cha'waQ vItlheD, 'ej vIDabmo', jIghoj 'ej jIchoH.
('ay' lugh vIDabmeH vIwIvbe'; 'a ram.)
ben qo'vamDaq qaS wanI'mey'e' Ho'bogh Hoch. nem qaSjaj je.
'ej New York, Pentagon, Pennsylvania je, DaH qaStaH je.
ghu'mey law'mo' ngoy' qo' qum, 'ej qummo' ngoy' wIvbogh roghvaH.
'ach Hegh bajbe' 6000. Hegh baj pagh.
Hegh bajbe' je Kabulnganpu'. (ghaytan Hegh yajbe' je,
wanI''e' wej Qoychugh, Se' HablI' QoymeH 'ul Hutlhmo'.)
Hegh bajbe' je Israelnganpu'; Hegh bajbe' je Palestinenganpu'.
('e' vIjatlhnIS je, 'ej chaq juppu'wI' muSmoH mu'tlhegh; 'e' vISuDnIS.)
bIp baj HeS vangwI' neH;
'ej Hegh tu'chugh, vaj yon, 'ej tlhachDajvaD Sub moj.
vaj lI' bIpchaj, 'ach ghaytan lI'Ha' Heghchaj.
Hegh baj pagh wo' rewbe'.
baj net qapchugh, vaj mut naQvaD jagh moj.
'ach cha'leS, cha'nem joq, vay' wuqbogh USA qum wuqQo'DI'
USA latlh rewbe', latlh wo'mey joq, meq lutu'mo' wuqQo'.
DaH tlhach vIwIv.
'ach KabulDaq nuke jorwI' pummoHchugh tlhachwIj, chaq vIwIvHa'.
jangmeH val qumvam, 'ej Hoj, 'ej nemmey qelchu', 'e' vItul.
lot vIpIH, 'ach wej jItulHa'. wej jIHvaD 'e' vIchaw'.
'ach ngachmeH wej chol poH.
tugh qaS wanI'mey'e' SeHlaHbogh pagh.
tugh nIteb ghob He DIwIvnIS Hoch maH.
Qom wanI'mey law'; Qom je yej'anmaj. potlhbe'; 'a Qom je 'oH.
leS 'utDI', chaq maqaDchuq. 'utpa', perojneS. 'ej peHojlI'.
--
== == == == == == == == == == == == == == == == == == ==
Nick Nicholas, Breathing I REJECT {gumri}
[email protected] (Lojban Wiki, Resurrected Gismu)