tlhIngan-Hol Archive: Thu Sep 20 18:25:32 2001

Back to archive top level

To this year's listing



[Date Prev][Date Next][Thread Prev][Thread Next]

Re: chunbe' USA



batlh ghItlhta' Clayton Rodrigo Cardoso quv:

>>SorghwI''a''e', qum HoS'e' ghap: DaH tlhach
>>DaQutlhbogh yIwIv.
>DaH chotIch jay'. HIvmeH, HoS lo' SorghwI''a'. noDmeH, HoS lo'qang USA.
>pIm'a'? jaS ta''a'? vaj jIHvaD yIQIj. muQoghbe' vay' 'e' vItlhobbe'. vuDwIj
>vI'ang neH.

Qu'vatlh. bong mu'mey qu' vIbaHpu', jIQay'DI'. DopDaq qul yIchenmoH QobDI'
ghu'. 'ach jIH mucholqu' Qughvetlh 'e' vIqeH. USADaq HungHeymajmo' majeQ 'e'
lunISqu' HeSwI'. jIHDaq Sumqu' Qugh Daq'e'. loQ jIlengchugh, vaj pa' QIH'a'
vIleghlaH 'ej 'op SaD lommey vIlarghlaH. naDev berghtaH 'ej bIttaH nuv law'.
qaStaHvIS ram pIj QongHa' qorDu'wIj ghotpu'. Manhattan Dab jupwI' nI'.
qaSDI' Qugh, rIQbe' ghaH 'e' vI'olmeH jIvumqu'lI'. qaSpu'DI' 'op rep, tagha'
DotlhDaj vI'ol: Do' rIQbe'. Boston Dab latlh jupwI' nI'. wa'wen ghaH vISuch.
Logan yaHvo' raQpo' vImoj. loQ pImchugh SorghwI''a' nab, chaq jIHvaD Seng
chaH pagh muHoH chaH. HeH rap lughaj Pennsylvania, SepwIj (Ohio) je. rut
Ohio DungDaq puvbejtaH muDDuj loSDIch Sorghlu'bogh, tagha' PennsylvaniaDaq
pumpa'. Do'Ha', USA Hoch yoSHommeyDaq vID 'e' lughur je SorghwI'Hompu'.
Qughmo' pIllaw' chaH. chaHmo' jIpuQ. naDev Muslim pum 'op, 'ej USA qum lupum
latlh. naDev latlhDaq je may'Hommeyvam jojDaq Subbe' SuvmeH meq, 'ej vogh
QIH lughIb nuv puSqu'. QIH vIghIbbe' jIH jay'.

>lugh SorghwI''a' 'e' vIHarbe'. 'ach lugh USA qum 'e' vIHarbe' je.
>vuDwIj DawIv 'e' yInIDQo' je. bInIDchugh, chomawbej.

chIch QI' vuS USA, roD 'e' vIwIv. tlhoy' Sach 'oH 'ej Hubbeq neH wIpoQ, 'e'
vIHar. 'ach USA nganna' jIHmo', wa'maHHu' vIbuQlu', 'ej yInwIj Qanbogh
QI''e' DaH QutlhnISba' vuDwIj. rIQ pagh vIneH, 'ach ruv tlhobtaHvIS
jachlu'ba'. toH, DuHvam vItul jIH: Bin Laden ghImmeH wuq Arab quprIp ru',
ghaH pumchu' bo'DIj, 'ej bIghHa'Daq yIntaH, nem tagha' Heghpa'. rIQ pagh
rewbe', pagh mang joq 'e' vItul je, 'ach jInajbe'nIS. Sub mojbe'meH je
HeSwI', Heghbe'jaj.

yoSmey SeHtaH 'e' nup USA qum net tul, 'ej Sepmey law' Danbe'choH net tul,
'ach vIDDI' Bin Laden QI'Hom, ghu' 'arghmoHbej, DaH HubmeH neH
SachnISqa'law'lI'mo' USA QI'. ben'a' Sepmaj SeHqu' latlh -- England wo'.
meqvammo' ngochmey lIS USA cherwI'pu'. Monroe Doctrine qunlut yIlaDlI', 'ej
'oH pabHa'choHmeH USA meqmey yIqellI'.

>latlh puHmey SeH reH 'e' nID USA 'e' vImuS.

'e' vImuS je jIH. nIQochbe' je Manhattan lommey law', jatlhlaHchugh.

Andrew H. Strader
  http://www.cis.ohio-state.edu/~strader



Back to archive top level