tlhIngan-Hol Archive: Tue Sep 18 13:38:48 2001

Back to archive top level

To this year's listing



[Date Prev][Date Next][Thread Prev][Thread Next]

chunbe' USA



jaj wa'maH wa'DIch yuQ naQ lumer HaSta jabbI'IDmey. SIbI' Hegh bID netlh pIjHa' 'e' wIlegh. law'qu'bogh mIpvam'e' luQaw' vaQqu'bogh Dapmey pIjHa' 'e' wIleghlaH. USA yer DungDaq loS Dujmey luquchbogh pummoH HoH'eghwI'pu' ngotlh 'e' bIH Dapmeyvam'e'. 'IQ yuQ net Sovbej, Human yInmey luQaw'lu'mo'. Hegh bID netlh. yInmeychaj yInbogh nuvpu''e' chun chaH. pagh lunuQ. merqu' 'ej 'IQmoH New York Heghmey, Washington Heghmey je. QaQ rock 'n roll, blues, hotdog, Disney, cham 'Itlh je. povqu' USA yIn tIgh 'e' 'oH vIt'e'. Dunqu' USA nganpu', puHchaj je. 'ach QaQ je botlh chan tIgh, botlh chan Sov je 'ej luvuvnISlu'. 'ach Do'Ha' jaS cha' Dopmeyvam lupojlu'taH. yInmeyvam luQaw'meH ghIjmoHbogh mIw lo'lu'. 'ach qatlh nuHotqu' ngoDvam, yuQ latlh DopDaq Heghmey DIbuSHa'chugh? SIbI' USA luHubchoH Hoch, 'ach  wanI'vam qaSmoH wIHbogh 'ej HIghbogh 'ej HoHbogh ghatlhtaHghach nI' 'e' lulIj Hoch. yuQ HochHomDaq ghatlhtaHghachvamvaD ngoy' USA. Hiroshima-Daq Nagasaki-Daq je bIp chun HoHbogh jorwI'mey'e' woD USA 'e' wIlIj'a'? Vietnam noH mIghtaHghachmey DIlIj'a'? Korea noH, Laos noH, Kampuchea noH je DIlIj'a'? qaStaHvIS noHmeyvam Hegh nuvpu' law'qu' 'e' luqaSmoH USA negh. ta'vam luta'DI' wIH 'ej yIn lo'laHghach luqelbe'. Israel QutlhmeH, Palestine vengHommey HIv USA 'e' wIlIj'a'? <novpu' muS Palestine nganpu'> jatlh Israel nuvpu' 'ach pImbe'qu' chaH. qaStaHvIS DISmey law', Central America-Daq, South America-Daq je HI'tuy'mey Qutlh 'ej DIl USA 'e' wIleghbe'choH'a'? ngugh ngab Qochbogh woQ nuvpu' 'ej lujoy'lu' 'e' wIlIj'a'? 'ItlhchoH Cuba malja' 'e' botmeH, nuch Da USA 'e' wIlIj'a'? qumchajmo' Hegh bIp Africa nganpu'. qummeyvam moH CIA 'e' wIlIj'a'? mIw wIvbogh pablu' 'e' raD USA. qo' wejDIch puHmeyDaq, Hoch jaj ghungmo' vatlh vatlh je HeghmoH raltaHghach'e' qaSmoHbogh Daghachvam 'e' wIqelHa''a'? nuHqaD, Napalm, Mustard SIp tIqaw. wa' puH Dol QIH Qaw'meH nuHmey 'ogh USA. nuHmeyvam chenmoH USA. 'ej qo' SeH USA 'e' qawlu' 'e' raDnISDI' USA, reH nuHmeyvam lo' USA 'e' wIlIjbe'jaj. 'ej Osama Bin Laden ret wIlIjlaHbe'. nubwI' wa'DIch ghaH, 'a Soviet Union HIvmeH, Bin Laden po'moH CIA 'ej ghaHvaD nuHmey nob. <latlhpu' mInDu'Daq pey jaDlu'chugh jISaHbe' 'ach mInDu'wIj luqIplu'chugh jIQeH jay'>. DaH Bin Laden HoHqang USA, 'ach qatlh ben puS HoHQo'? terrorism vIHubbe'. reH terrorism luqIch capitalism luHubbe'bogh Lenin-'e', Marx-'e', latlh DevwI'pu' law''e', QubmoHbe'mo' terrorism 'ej ja'chuqmoHbe'mo'. Hub'eghlaHbe'bogh nuvpu' HoH terrorism. 'ach QI' terrorism-'e', malja' terrorism-'e' je ta'bogh USA wIlIj net pIH'a'? 'ach bepQo' mIpbogh puHmey, Dap 'oH 'e' luHarbe'. DaH HIvwI' Qaw'rupchoH USA, 'ach Hochlogh terrorism-vam ta'taH 'e' lIj USA. tagha' juHDajDaq noH waHlaH USA. tagha' QIH'e' qaSmoHbogh noH qaDlaH USA. tagha' DI tlhIch tlhuHlaH. New York muD lungImmoH He'So'bogh lommey. chaq DaH Human yIn lo'laHghach ghovchoH USA. chaq bortaS 'oHbe' ta' nIvqu''e'. Heghpu'wI'pu' lumollu' 'ej vengmey luchenqa'moHlu' 'ej rojqa'lu' chaq 'e' bIH qechmey QaQ'e'. vuDDaj pojnIS USA 'ej jaS qo', Seghmey, nughmey, tIghmey leghchoHnIS.



Back to archive top level