tlhIngan-Hol Archive: Fri Nov 02 20:17:26 2001
[Date Prev][Date Next][Thread Prev][Thread Next]
norgh DungDaq Suppu' *'entepray'* much
- From: Robyn Stewart <[email protected]>
- Subject: norgh DungDaq Suppu' *'entepray'* much
- Date: Fri, 02 Nov 2001 11:31:05 -0800
nuqjalth? norgh DungDaq Sup vay'? English vIttlhegh
vImugh. boyajbe'chugh, http://www.jumptheshark.com/ yIlaD.
much bom vIparHa'. taghtaHvIS much qunHom vItIv. *Yuri Gagarin* Hutlhbej,
'ach chaq *Gagarin* lughovlaHbe' *America*ngan.
Do'Ha', nom jol lulajchoH. SIbI' luqel, pIj lulo'. lutlh chamvam,
qar'a'? nuv jol net tuch, qar'a'? jol lulo'pa' yevnIS. HojnIS. 'ach
vIlIjlaH. Hov lengvaD reH jol lo'lu'.
HoD vIparHa'. tlhol ghaH. rut qIp, HojHa', mul. *Archer* ... *Kirk* ...
*Picard* ... tlhetlhbej nugh, tlhetlhbej HoD. HoDpu' chu' vImaS jIH, 'ach
Hoq wa'DIchvaD qar Archer. maj.
SaS T'Pal. vulqangan qa' HoS Hutlhlaw'. vulqanganvaD He'So' Human 'e'
vItIv. qa'Daj SeHchu'be' T'Pal. bovvetlh vulqangan Sagh law' bov chu'
vulqangan Sagh puS 'e' vIpIH, 'ach puj vulqangan qa'Daj. chay' HoSghaj
vulqangan? SovDajmo' HoSghaj. Sov'eghmo' 'ej SeH'eghmo'
HoSghaj. vulqangan mISmoH qoj belHa'moH qoj Suj ghu', 'ach vulqangan nur
nISbe'lu'. chaq pujmo' T'Pel DawI' vulqangan qa' muchlaHbe'. Do'Ha'.
DaHjaj <<'anDorngan wanI'>> vIbej. 'anDorngan HotlhwI'Du'Hey
vIparHa'. pup. nIb 'anDornganpu' ngo' 'anDornganpu' chu', 'ach
Dub. majQa'. mIghbe' 'anDornganpu'. yIqaw: 'anDorngan ghaHbe' 'anDorngan
chotwI' muchbogh Hov leng wa'DIch. 'anDorngan ngeb ghaH. 'anDornganpu'vam
vIHarlaH. vItIv. pIH, QeH, loQ Soy'.
'ach vulqanganpu' vIHarlaHbe' jay'! Segh vuvqangbe'chugh, qoj
Qulqangbe'chugh chenmoHwI'pu', vaj lulo'be'nIS. mu' vIHutlh ... chaq qech
DellaH <wIch Sov>. Sov Hutlh vulqanganpu'vetlh. chIrgh Hubqangbe', 'ach
pu' nobmo' HoD, pay' HubqangchoH. vIbejtaHvIS vulqangan ngeb chaH 'e'
vIpIH jay'. puqpu' rur *Kolinahri*. lut DoghvaD Segh potlh lughong
chenmoHwI'pu'.
Qoch'a' vay'? yIngach.