tlhIngan-Hol Archive: Thu Jun 24 09:57:59 1999
[Date Prev][Date Next][Thread Prev][Thread Next]
weekend-wIj'e'
- From: Alan Anderson <[email protected]>
- Subject: weekend-wIj'e'
- Date: Thu, 24 Jun 99 11:13:23 EST
lopno'Hey Dellaw'mo' Hoch, wanI'wIj vIDelnISlaw' je jIH.
vaghHu' nay be'nalwI' SoS loDnI' puqbe'. tlhoghtay bejmeH qorDu'wIj,
"Louisville"-Daq wIleng. ngajbe' leng 'ach tIqqu'be'. manabchu' 'ej
mapawDI' tugh tagh tay.
tlhetlhtaHvIS tay, ngojchoH puqloDwI'. Sor Hap quSDaq QebDaj chuSmoH.
ba'taHvIS loQ nogh. tay buSHa'. muberghmoH. jIH be'nalwI' jojDaq
ba'taH. jItlhup; vIjatlh yItamtaH! 'ach ghaH tlhopDaq quS 'o' mupmeH
QebDaj lo'qa' 'ej chuSqa'. nom jItuvHa'choH. nItlhDajvo' QebDaj
vIteq. SaQruplaw' 'ach DuQtaHvIS mInDu'wIj tambej. jIQay'be'meH Daq
tam ghaH be'nalwI' je. Hopmo' ghaH loQ munuQbe'choH.
rInDI' tay, naychu'DI' 'ej Sawchu'DI' SIQwI'pu', qach pImDaq wIjaH.
pa' maSop 'ej majatlh. QoQ muchlu' 'ach wej mI'ta'mo' SIQwI'pu',
mI'qangbe'law' latlhpu'. 'ey QoQ 'ej qaStaHvIS cha' rep nargh mI'meH
'eb law'. "Rumba" "cha-cha" joq DIta' wIneH. mI'nISqu' SIQwI'pu';
chaHvaD 'e' pon vay'. vaj wa'logh nIteb mI'DI' chaH, 'ej mI'DI'
naywI' vavDaj je, tugh Hoch mI'rup.
mI'wI' Daq wIghoS jIH be'nalwI', 'ach mamI'choHlaHpa' SIbI' choH QoQ
jay'! chung QoQ 'ej chuSqu'choH. HurghchoH pa'. qaStaHvIS wej rep
"swing" neH muchlu' jay'! wejpuH. mamI'bej, 'ach vItIvbe'chu'.
lopno'Daq Sopta'DI' puqloDwI', paq laDchoH. raSDaq ba'taH 'ej laDtaH.
QoQ buSHa'. latlhpu' buSHa'. pagh nuQmo' jIbepbe'.
mejtaHvIS SIQwI'pu', chaHDaq pagh wIjaD. tIr chIS wIbaHbe'. Dalchu'.
rInDI' lopno' mebpa'mey wIghoS. pa' be'nalwI' vav SoS je DItlhej.
chaH tlhej je be'nalwI' be'nI' cha' puqbe'pu'. qaStaHvIS wej rep
"swim" puqpu' be'nalwI' je. tlhoS ngengHom yoS wI'ellaHbe', ngaQmo'
lojmItmey. ngaQHa'Qo' loHwI'pu', 'ach tlhoy' wItoS net chaw'.
ghungqa' puqpu'. choS "church picnic" ghoS HochHom 'ach pa'Daq
jIratlh jIH 'ej jIDum. jaj veb juHDaq wIchegh.
-- ghunchu'wI'