tlhIngan-Hol Archive: Thu Dec 09 15:16:31 1999
[Date Prev][Date Next][Thread Prev][Thread Next]
ramwI'pu'
- From: "William H. Martin" <[email protected]>
- Subject: ramwI'pu'
- Date: Thu, 9 Dec 1999 18:15:57 -0500 (Eastern Standard Time)
- Priority: NORMAL
rut potlh vIjatlh vIneH 'ach rut potlh Hutlh yInwIj. vaj jItam.
rut jItam vIneHbe'. tlhIngan Hol jatlhlaHbogh juppu'wI''e' vIja'
vIneH. tu'HomI'raH vIjatlhqang'a'? rut vIjatlhqangbe' 'ach
DaHjaj jIloSnIS vaj yItuv. DunuQchugh QInvam yIlojmoH. yIbechQo'.
rut be'pu' vIqel. vIDel 'e' vInID 'ach pIj jImIS 'ej ghaytan
vIDelHa'. be'pu' vIyajlaHbe'ba'. qay'be'. jIram.
loQ jImISHa'choHta'. be' vIpoQ 'e' vImev. jIjotchoH.
QoQ vImuchmeH jIghojlI'. jan Sar vIlo'. leSpalmey vIchu'chu' 'ej
volchaHDaq HurDagh mach vIchu' 'e' vIghojchoH. SIrgh tun ghaj
wa' leSpal. leSpalvamvaD nItlhpachDu' neH vIlo'. baS SIrgh ghaj
latlh leSpal. leSpalvetlhvaD wa' nItlhpachqoq vI'uchbogh vIlo'.
beQqu' nItlhpachqoqvam 'ej langqu'. nav let rur. wej HeH ghaj.
HurDagh machvaD jIbnaQ vIlo'. Sor Hapqoqvo' chen naQ 'ach Sargh
tlhuQna'vo' chen jIb. pupbe' 'ach yap. jIghojchoHmo' neH yap
qutlhwI'.
roD Hoch jaj nIQHom megh'a' je vISop. 'uQ vISopbe'. Hoch jaj
cha' rep vIpol. 'uQ vIvutbe'. 'uQ vISopbe'. 'uQmo' jIghIH 'e'
vIjun vaj raS vISay'nISbe'moH. QoQ vImuch. jIqeqlaH.
roD wa' Qe' vISuch. <<taS>> 'oH pongDaj'e'. taSDaq *salad*
*sandwich* je vISop. *smoothie* tIn vItlhutlh. pa' 'eychu' Hoch.
pa' juppu' vIghaj. Hoch jaj juppu'vam vISuch. jIbel.
juppu'na' chaH'a'? be' vIqIH 'e' luqaSmoH. bang moj be'vam 'e'
luHech. qaSbe' 'ach nIDmo' vIvoq. be'vam vIparHa' 'ej poHmaj
vItIvbej 'ach reH vum be'vam 'ej reH Doy' be'vam 'e' Del be'vam.
not bangvaD poH ghaj. qay'be'. wanI' vItIv. yap.
qaStaHvIS Hoch Hogh, vagh jaj taSDaq jISop. qaStaHvIS cha' latlh
tlhoS jISopbe'. jIlangtaHmo' jIbel. jIHoStaH. jIQuchtaH.
pIj jImI'. jImI'chu' 'e' vItIvchu'. mI'meH wanI' qaq law' Hoch
qaq puS. jImI'DI' puv tIqwIj. cha'Hu' jImI'laH. wejHu'
jImI'qa'laH. QaQ ghu'vam.
'ach DaH jIloSnIS. 'uQ wISopmeH be' vIghom. roD 'uQ vISopbe'
'ach maSuchchuqmeH 'uQ mach vISopqang. SoQmo' taS lojmIt, latlh
Qe' wIghoS. naH neH Sop be'vam vaj vengvamDaq puS Qe' QaQ.
mI'laH be'vam 'ej mI'qang. mamI'DI' maQuch. latlh DuH DIqel.
jIjot. pagh vIpIH.
pItlh.
charghwI'