tlhIngan-Hol Archive: Sun Aug 29 17:28:47 1999
[Date Prev][Date Next][Thread Prev][Thread Next]
Re: Why I speak Klingon
ja' HovqIj:
>nom cha' ngoDmeyna' vItlhoj:
>
>ngoDna' wa': QIvchu' mu'ghomqoqwIj. DOW 'oH mu'ghomqoqvetlh chaq 'e' Daqaw.
>vaj mu'tay' lugh vInaw'laHmeH <pojwI'> vISuq.
maj. lugh "DOW" pab 'e' vIvoq...
>ngoDna' cha': Qatlhbe' tlhIngan Hol 'e' vIpIH. le'be' tlhIngan Hol 'e'
>vIpIH. jImujchu' 'e' vItu'! wa' QIn vIlaDmeH poH nI' vIpoQ. QInmey vIqonDI'
>roD jIQaghqu'.
'ach DaH yIqelchu': Qatlhbej'a' tlhIngan Hol? ghobe'! pIm neH.
Holna' 'oH, 'ej Hol ghojlu'meH poH poQlu'ba'. pupbe' ghojwI' pab.
napbe'ba' tlhIngan Hol, 'ach ngeDlaw'.
>pab vIyajmeH laH vIDubta'DI' 'eyqu' tlhIngan Hol pab 'e' vItlhojchoH.
>pImchu'. qech le' ngaSlaH wa' mu'tlhegh mach. HoSghajqu' Hoch mu' Hoch moHaq
>Hoch mojaq je. potlhmey neH qel tlhIngan Hol. ram mu'mey, potlh qechmey.
>qechmeywIj vIpojnISchoHchu'.
mughnISlu'DI', qech yajnISlu'chu'. meqvammo' tlhIngan Hol vIparHa' je jIH.
>DIvI'Hol vIlo'taHvIS rut mu'tlheghmey QaQ vIqonmeH mu'mey QaQ vISamlaHbe'
>'ach SIbI' yabwIjDaq chen tlhIngan Hol mu'tlhegh qaq. yInwIj SIghba' Holvam.
jIyajchu'. (Lately, I find myself saying things like "I don't know that
the bottle is full" instead of "I don't know if the bottle is full.")
>DaH TKD, KGT, TKW je vIghaj 'ej tlhoS Hoch jaj jabbI'IDghomvam QInmey
>vIlaD... 'e' vItIvqu'chu'.
wej Hamlet Gilgamesh joq DaSuqpu''a'? :)
>loQ ramchoHpu' Hov leng 'ach potlhqu'choHpu' tlhIngan Hol.
chaq HochHom tlhIngan Hol nongwI' Del ghu'vetlh.
>>pIj tlhIngan mu'mey 'ey law' DIvI' mu'mey 'ey puS.
>
>Daj mu'tlheghvam. qechmo' Dajbe'. qech vIyajchu'. 'op jarmey poQ qechvetlh
>vItlhojmeH Qu', 'ach vItlhojpu' 'ej vItlhojtaH.
ghoQtaH tlhIngan Hol. wej raghpu' mu'tay. wej mu'mey pujmoHpu' poH.
HoSmo' tlhIngan mu'mey, HoSghaj tlhIngan Hol mu'mey. ngo' DIvI' Hol.
tIQmo' DIvI' Hol mu'mey. le'be' mu'mey law'. qetlh. qech Sar 'oS.
>Daj pablIj. tlhIngan Hol qellu'DI' motlh <tlhIngan Hol> jatlhlu'. <tlhIngan
>mu'mey> neH DaghItlh. <Hol> Danop, 'ach Qapba' mu'tlhegh. loQ pIm
>mu'tlheghlIj, loQ nIv. Hol neH qelbe', ghotpu' tayqeqmeychaj je qel. Hol
>SIgh tayqeq 'e' qel mu'tlheghlIj.
qech Daghovmo', bIvalbej.
chIch qechvam qelchugh charghwI', valqu'ba' ghaH.
bong Delchugh, chaq yabDaj val law' ghaH val puS. :)
tlhIngan jIHbe'. tlhIngan tIghmey vIpabbe'. tlhIngan nughHeyDaq jIjeSbe'.
'ach tlhIngan Hol, tlhIngan mu'mey je vIjatlhqangbej.
qatlh tlhIngan Hol vIjatlh jIH? jItaghtaHvIS, qaD neH 'oH Qu''e'.
jatlhchu'mo' latlhpu', vIyajmeH jIvumnIS. Dajlaw'mo' qechmeychaj,
vIyaj vIneHbej. vaj jIvum. mu'mey ngo' vIlaDDI', jIHagh. QIvpu'bej
laHwIj. DaHjaj qatlh tlhIngan Hol vIjatlh? 'Itlh laHwIj net noHmo'. :-)
DaH QaQmo' jatlhmeH laHwIj, jIjatlhnISqu'law'.
-- ghunchu'wI' 'utlh