tlhIngan-Hol Archive: Sun Aug 29 17:21:57 1999
[Date Prev][Date Next][Thread Prev][Thread Next]
Re: Why I speak Klingon
- From: [email protected] (Christiane Scharf)
- Subject: Re: Why I speak Klingon
- Date: Sat, 28 Aug 1999 17:30:35 +0200
jatlh charghwI':
>
>Sayajmo' ghaytan tlhIHvaD neH qechvam vIQIjnISbe' 'ach DaHjaj
>qechvam vIQIjmeH mIw vIjon.
>
>bIbom'a'? bompu' Dajon'a'? qatlh bIbom?
>
>tlhIngan Hol vIjatlhmeH mIw rur bom vIjonmeH mIw. qechmeywIj
>qengnIS mu'mey le' 'ej mu' lu' vIwIvnIS 'ej vIwuqnIS.
[{mu' le'} {mu' lugh} ghap DaghItlh 'e' DaHechba'.]
qechlIj vIyaj. tlhIngan Hol vIHaDchoHDI', Hov leng muchwI'pu' vIyajmeH
vIHaD. qaStaHvIS poHvetlh Hov leng vItIvqu', vaj wa' jaj tlhIngan Hol
mu'ghom vIje'. jIghojmeH jabbI'IDghomvamvaD jIjeSchoH. Hoch jaj law'qu'
QInmey tugh 'e' vItu'.
nom cha' ngoDmeyna' vItlhoj:
ngoDna' wa': QIvchu' mu'ghomqoqwIj. DOW 'oH mu'ghomqoqvetlh chaq 'e' Daqaw.
vaj mu'tay' lugh vInaw'laHmeH <pojwI'> vISuq.
ngoDna' cha': Qatlhbe' tlhIngan Hol 'e' vIpIH. le'be' tlhIngan Hol 'e'
vIpIH. jImujchu' 'e' vItu'! wa' QIn vIlaDmeH poH nI' vIpoQ. QInmey vIqonDI'
roD jIQaghqu'.
pab vIyajmeH laH vIDubta'DI' 'eyqu' tlhIngan Hol pab 'e' vItlhojchoH.
pImchu'. qech le' ngaSlaH wa' mu'tlhegh mach. HoSghajqu' Hoch mu' Hoch moHaq
Hoch mojaq je. potlhmey neH qel tlhIngan Hol. ram mu'mey, potlh qechmey.
qechmeywIj vIpojnISchoHchu'.
DIvI'Hol vIlo'taHvIS rut mu'tlheghmey QaQ vIqonmeH mu'mey QaQ vISamlaHbe'
'ach SIbI' yabwIjDaq chen tlhIngan Hol mu'tlhegh qaq. yInwIj SIghba' Holvam.
DaH TKD, KGT, TKW je vIghaj 'ej tlhoS Hoch jaj jabbI'IDghomvam QInmey
vIlaD... 'e' vItIvqu'chu'. loQ ramchoHpu' Hov leng 'ach potlhqu'choHpu'
tlhIngan Hol.
>
>pIj tlhIngan mu'mey 'ey law' DIvI' mu'mey 'ey puS.
Daj mu'tlheghvam. qechmo' Dajbe'. qech vIyajchu'. 'op jarmey poQ qechvetlh
vItlhojmeH Qu', 'ach vItlhojpu' 'ej vItlhojtaH.
Daj pablIj. tlhIngan Hol qellu'DI' motlh <tlhIngan Hol> jatlhlu'. <tlhIngan
mu'mey> neH DaghItlh. <Hol> Danop, 'ach Qapba' mu'tlhegh. loQ pIm
mu'tlheghlIj, loQ nIv. Hol neH qelbe', ghotpu' tayqeqmeychaj je qel. Hol
SIgh tayqeq 'e' qel mu'tlheghlIj.
>
>charghwI' 'utlh
>
HovqIj