tlhIngan-Hol Archive: Sun Mar 02 07:16:35 1997
[Date Prev][Date Next][Thread Prev][Thread Next]
Re: jIHub'egh
- From: Holtej <[email protected]>
- Subject: Re: jIHub'egh
- Date: Sun, 2 Mar 1997 10:14:16 -0500 (EST)
DaH jabbI'IDghomvam jeSlaw' *Glen*, 'ej jIHvaD ghItlh. wejpuH.
> *Holtej* qavan!
muvan 'Iv? yIngu''egh! jabbI'IDvam vIlaD 'e' vIrInDI', ngeH *Glen* 'e'
vItlhoj. 'ach, *Ken* pong ngaS jabbI'IDvam. muvam 'Iv 'e' vISov vIneH jay'.
> jabbI'IDlIj mungeHta' *qaqen*. qatlho'. jabbI'ID wa'DIch chongeHbogh 'oS
> Dochvam 'e' vIHar. vIquvmoHlu'.
/vIquvmoHlu'/? qatlh /choquvmoH/ DaghItlhbe'? bIghItlhtaHvIS Human
Darur. tlhIngan Hol DajatlhtaHvIS, pe'vIl yIjatlh! chIch yIjatlh!
bIquvchugh qaghItlhmo' jIH, yIjatlhchu'! bIjatlhchu'be'mo', choquvHa'moH.
> wa'DIch, DubelmoHchugh *pIntIn* HIpong. *Glen* vIpar 'ej "pIntIn" tlhIngan
> ponwIj vImaS. Dalqu' tera'ngan pongmey, qar'a'?
/wa'DIch/ Dalo'Ha', 'ach qalughmoHQo'. qatlh? bIngDaq 'e' vIjang.
pong 'oH'a' /pIntIn/'e'? pagh patlh 'oH'a'? pInwI' SoHbe'bej.
> cha'DIch, tlhIngan Hol lo'lIj nIvmo' qaHoy' vIneH. wa' Qagh ram neH
> tu'lu'.
/cha'DIch/ Dalo'Ha', 'ach qalughmoHQo'. qatlh? bIngDaq 'e' vIjang.
choHoy' 'e' vIneHbe'. vIlajQo'. qaStaHvIS DIS law' bIquvHa''eghmoH, jIH
juppu'wI' je juvuvbe'mo'. *KLBC* DamuvHa'DI', bIquvHa''eghmoH 'ej
juvuvbe'. *David Barron* 'aH DangevDI', 'ej Huch DapolDI',
bIquvHa''eghmoH 'ej juvuvbe'. *Hamlet* DamughDI' (wanI' Da'angbe'bogh),
*Hamlet* wImughtaHvIS, bIquvHa''eghmoH 'ej juvuvbe'. jutIch, jutIchqa',
jutIchqa' je; DaH pIlajnIS'a'? not maqIH, 'ach bIvangmo' qaSovbej. 'ej
qavuvbe'.
> "ngaqbogh" DaghItlhta'. (DIvI' Hol: which supports.) qay'ba'
> mu'tlheghvetlh DIp Damo' ngaq. not wot loSlaH "ngaq". DaQochbe''a'?
qatlh qalughmoHQo' DaH 'e' vIQIj. pabwIj yIlughmoHQo'. {pabpo'} SoHbe'
net Sov. [yIta': jabbI'IDghomvamDaq, {pabpo'} 'oH {grammarian}'e'. mu'
mujba', 'ach net laj]. jabbI'IDghomvam DajeS DapoQchugh, yIpab.
chutHommey ghaj ghomvam. jabbI'ID ghojmoHbogh Hev Hoch muvbogh ghot'e'.
bImuvbe'mo', jabbI'IDvam DaHevbe'. 'ach bIpabbe'meH yapbe' meqvam. pab
lughmoHlaH pabpo' neH.
> choHaghmoHpu', "jIbyab" chopongDI. DIvI' Hol=Hairbrain. "harebrain"
> DaHechta' qar'a'? targhyab 'oH tIchbogh mu' 'e' vImaSqu'.
choyajHa'ba'. mu'tlheghvam vIghItlhta': /jIbyab qechDaj
'oH neH./. qaperbe'; qechlIj vIper. (naDev 'oH jabbI'IDwIj'e':
http://www.kli.org/tlhIngan-Hol/1997/Feb97/0141.html).
/hairbrain/ /harebrain/ joq laj mu'ghomwIj. 'ej /hare/ Hechbogh mu''e'
ghajbe' tlhIngan Hol. 'ach, /targhyab/ DamaSchugh, jIbepQo': targhyab
qechlIj 'oH neH. [chaq jImaybe'. 'ach pe'vIl jIjatlhta' vIneH.
jabbI'IDwIjDaq, jabbI'IDghomvam DajeSmeH qaqaD.]
> DaH vay' qatlhob vIneH. puqloD bolIngta' SoH be'nallI' je 'e' vIyaj.
> tlhIngan Hol 'oH juHHolDaj 'e' vIQoy. teH'a'? mughIj lutvetlh. ben 'ar
> boghpu' loDHomra'?
puqloD wIghaj jIH be'nalwI' je. bIyajchu', ghaHvaD tlhIngan Hol
vIjatlh. bIghIj 'e' vISaHbe'.
> nInuQmo' jabbI'IDmeywIj jIQoS. jabbI'IDghom vImuvlaHbejbe', De'wI'
> vIghajbe'mo'. 'uSdu' ghajbe'boghchugh loD qetmeH Dara'laHbe'
> qar'a'?
choyajHa'qa'. munuQ nuq? jabbI'IDghomvam bIjeSbe'. Hoch DalaDbe'.
jeSbogh ghot DaSovbe'. 'ach qechmeylIj wIqelnIS, SoHvaD jabbI'IDlIj
ngeHmo' *Ken*. bIngoy'Ha'. qechlIj wIqelchugh bISaHbe'taHvIS, bIHIgh.
bIjeS DaneHchugh, yIjeS. bIjeSlaHbe'chugh, yIlaj 'ej yIjeSQo'. bIjeS
'e' DapoQchugh, qabotQo'. 'ach yIpabchu': chutHommey ghaj
jabbI'IDghomvam. bIpabbe'chugh, SujeS SoH *Ken* je 'e' vIbot. bIyajchu''a'?
> jabbI'IDmey chongeH DaneHchugh, jIHvaD QaylaH *qaqen*. wa' Doch Qav
> tu'lu'. DarSeQ ngeb tIlajQo'!
mu' 'oHbe'mo' */DarSeQ/, bIghItlhHa'mo', Dayajbe'lu'.
chaq naDev SoHvaD ghot matlh tu'lu'. 'ach qunlIj wISov, 'ej batlhHa'
bIvangmo', bIHub'eghnIS SoH. batlh Daghajchugh, bItobnIS.
jIjatlhchu'mo' yIQeHQo'; ghomvam Damuv DaneHqu'chugh, batlhlIj
Da'angnIS.
pItlh.
--Holtej