tlhIngan-Hol Archive: Wed Aug 27 17:42:09 1997
[Date Prev][Date Next][Thread Prev][Thread Next]
wa'Hu' ram malop qorDu'wIj
- From: "Andeen, Eric" <[email protected]>
- Subject: wa'Hu' ram malop qorDu'wIj
- Date: Wed, 27 Aug 1997 17:43 -0700
chorghleS juHmajvo' mej be'nalwI', <Sarah>, 'ej qaStaHvIS chorgh jar,
<Bir Zeit> DuSaQ'a'Daq vumlI', 'ej <Ramallah, Israel (West Bank)>Daq
DabtaH. Qu'Daj ta'ta'DI', juHmajDaq chegh. tugh mejmo', wa'Hu' ram malop
qorDu'wIj.
<31 August, 1991> <Sarah> vISaw ('ej munayba'), vaj Hoch DIS qaSDI' <31
August> malop. <15 September> 'oH <Sarah> qoS'e', 'ej <17 September> 'oH
qoSwIj'e' (bogh <Sarah>. qaS cha' jaj. jIbogh). vaj wa'Hu' ram meq
law'mo' malop.
malopmeH, Qe'Daq maghom. maSop 'ej matlhutlh. maghom jIH, be'nalwI',
vavwI', SoSwI', be'nI'wI', loDnI'wI', loDnI'wI' nem be'nal je. 'ey Soj,
'ej wanI' matIv Hoch.
chechchoH loDnI'wI' nem be'nal, <Sue>, 'ej Doch 'ej Dogh. 'ach qay'be';
malop 'e' wItIv Hoch.
Qe'vo' mamejta'DI' Hoch, juHmajDaq machegh jIH <Sarah> je. vutpa' retlh
vI'elDI', loQ mubot <Sarah>. <vutpa' vI'el DaneHbe''a'> <Sarah>vaD
jIghel. <ghobe'> jang, 'ach loQ vIHarbe'. vutpa' vI'elbe'. qaSpu'DI'
wa'maH tup, lojmIt qIplu'. lojmIt vIpoSmoHDI', vavwI', SoSwI' be'nI'wI'
je vIlegh. jImer. Qe'Daq maloptaHvIS, not jIHvaD <Sarah>vaD joq <qoSlIj
bItIvjaj> jatlhlu', 'ej DaH meq vIyaj.
vutpa' ghoS <SaraH>, 'ej cheghDI', chab qem. <Baskin Robbins ice cream
cake> 'oH chab'e'. chab DungDaq meQbogh naQHom tu'lu', 'ej <QoSlIj yItIvj
pagh> ghItlhlu'. Hu' puS, <Seqram>vaD jabbI'ID ngeH <SaraH>. "How do you
say 'Happy Birthday' in Klingon" ghel. <DuQuchmoHjaj qoSlIj> <qoSlIj
bItIvjaj> <qoSlIj yItIv> joq jang <Seqram>. loQ qaghba' chab ghItlhwI',
'ach ramqu'. le'qu' chabvam 'ej <Sarah> vItlho'qu'.
meQbogh naQHommey vISuS. chab 'ay' DISop. pItlh.
pagh