tlhIngan-Hol Archive: Fri Apr 04 17:15:20 1997
[Date Prev][Date Next][Thread Prev][Thread Next]
lengHomwIj
- From: "David Trimboli" <[email protected]>
- Subject: lengHomwIj
- Date: Sat, 5 Apr 97 01:12:02 UT
cha'leS *Theodore Roosevelt* mol Such DaQtIq. juHwIjvo' Sum Daqvam. vaj
DaQtIq vIja' <qaghom!>. cha'leS maghom jIH DaQtIq lo'rel je.
jIHvaD Sumchu' *Roosevelt* juH (juHDaq Hegh), 'ach not pa' jIjaH! pa' jaH
DuSaQ puqpu', 'ach jIjaHbe'. wa' DuSaQDaq jIghojtaHvIS, wej juHDaj wISuch.
juH chu' wISuq, 'ej latlhDaq jIghojtaHvIS, juH Suchta'qu'. vaj not vISuch.
'ach cha'leS paw DaQtIq. *Roosevelt* juH ghoSmeH, He vISovchu'be'. ghaytan
tu'meH ngeD Qu'. 'ach "car" vIghajbe'. reH "bicycle" vIlIgh ("car" vIpoQ
'ach "car" vIneHbe').
vaj, jIvumpu'DI', *Roosevelt* juHDaq jIlIghchoH!
HuDHomDaq yInpu' *Roosevelt*. 'oHvaD *Sagamore Hill* ponglu'. HuDHommey puS
tu'lu', 'ach tIn. "bicycle" vIlIghmeH, pe'vIl jIlIghnIS. 'ach jItIv.
'IH leng. HuDHom vItoSchoHpa' ngeng puS vIjuS. *Cold Spring Harbor*Daq ngeng
wa'DIch tu'lu'. pupbe' <ngeng>; bIQ'a' ngengvam ja rarba'lu'. pIj ngengvam
vIlegh, 'ach motlh "car"-vo' vIlegh. DaHjaj HurDaq jIH, 'ej vIleghchu'laH.
vIlarghlaH. juHwIjvo' bIQ'a' vIleghlaH, 'ach pIm ngengvam. tI vIlarghlaH.
ghewmey vIQoylaH. 'IH, 'ach jImevbe'. DaHjaj jIHvaD Do potlh law' Hatlh 'IH
potlh puS.
*Cold Spring Harbor Labs* vIjuSta'. DaH *Moore's Hill* HeDaq jIlenglI'.
tInchoH HuD! jIyItnIS. jISaltaHvIS jIlIghlaHlaw', 'ach jIlIghchugh
jIDoy'choHbej. wej *Roosevelt* juH vItu'ta' 'ej juHwIjDaq jIcheghnIS!
tugh jItoS 'e' vImev, 'ej *Oyster Bay* vengHom vI'el. 'IHqu'. Sormey law'qu'
tu'lu'. Doj juHmey qachmey je. mIpqu' nganpu'. 'ach jImevbe'. DaHjaj
jIHvaD Do potlh law' He 'IH potlh puS.
tugh He per vIlaD: *TR Sanctuary*. He chu' vI'el. not HevamDaq jIleng.
jISey.
SaS He. tugh Sormey vIjuS, 'ej bIQ vIlegh. 'IHqu'qa'! lang He. poSDaq bIQ
tu'lu'. bIQ lubejtaHbogh ghotpu' puS'e' tu'lu'. rIHDaq yotlhHom tu'lu'.
Sormey puS tu'lu'. ghewmey chuSqu' vIQoy. 'ach jImevbe'. DaHjaj jIHvaD Do
potlh law' Hatlh 'IH potlh puS.
tugh jItoSqa'. jIyItnISqa'. 'ach tugh ngoQwIj vIlegh: *Roosevelt* juH
vIleghlaH! tIn. Doj. ngo'. vIparHa'. juH DechtaH yotlh.
SuchwI' qachDaq De' vISuq. SaH pagh, 'ach ram. qaStaHvIS tup puS yoS vInuD.
Qu'wIj vIta'ta'!
DaH jIcheghchoH. jI'elnISbe': cha'leS jIchegh. cheghmeH, ngeD leng. He
vISovchu'. chuq vISovchu'. jIcheghtaHvIS ghIrlI' juHHov.
*Huntington*Daq jIchegh. juHwIjvo' *Sagamore Hill*Daq jIlengmeH, wa' rep
vIpoQlaw' "bicycle"-wIj vIlIghtaHvIS. 'ej lengvam vItIvqu'!
DaH jImev. 'ach cha'leS leng 'IH potlh law' Do potlh puS!
--
SuStel
Beginners' Grammarian
Stardate 97259.5