tlhIngan-Hol Archive: Sun Jan 21 19:39:23 1996
[Date Prev][Date Next][Thread Prev][Thread Next]
*rIyval* QonoS 'ay' cha'DIch
- From: [email protected]
- Subject: *rIyval* QonoS 'ay' cha'DIch
- Date: Sun, 21 Jan 1996 22:38:51 -0500
QonoS 'ay' cha'DIch (qaSpu' wa' Hogh)
Qobbogh Sepvam 'elmeH 'ut nuH'e'. ghopDap *'ISqo'to*Daq 'oH nuHqach ngo''e'.
'oH bavchoH, tugh wo' HeHvo' mejpa'. ben'a' 'oH choS nov no' ghom, 'e' lujoS
tlhInganHolHom jatlhwI'. 'a Do' ghaytan law'qu'mo' nuH'e' ngaSbogh qach,
SuchmeH nablI' la', yoHqu'taHvIS. Dach Ha'DIbaH yInroH, ghor chovmeH ja'
noch. pu'beHmey rIH, leghwI'qoq jo luvoqbe'mo', 'ej ghIbchu' la',
voqbe'ghach'a' yoj Qochqangbe'mo', ghaHDaq Duj yoj je yol'e' qImHa'taHvIS.
vaj qachDaq jol'egh. naDev tI neH 'oH nuHqach loHwI''e'. 'ach tIDI bIngDaq
SaH wa' ghot, 'ej yon jo voqbe'pu'bogh la''e'. jo 'olHa' Duj'e', yoj'e' joq;
mISvam qImHa' je ghaH.
'a wa' SaHwI'vam tu'lu'DI', "wejpuH" jatlhmoH, Dap qellaw'taHvIS. maw' ghaH,
'ej taQ yInDaj. vaj bong jovaD yInroHna' 'angbe'ba'. Hab Quch ghajbogh; ghaH
boghmoH cha'na' tlhIngan, vaj net Hon. jaS 'oH HabmoHlaH joy'wI' vay': chaq
HomDu' gheghHa'moHmeH pey ngoHlu'. 'a SanDaj luloypa', maw'wI'vaD ja'chuqmeH
nID la''e'.
l <'eH, HIjatlh. toH, De' ghoja'. nuqDaq nuHmey, wISov wIneH.>
m <toH jay'... toH jay'qu'... 'eH, HIjatlh SoH. qaStaHvIS DIS
vItoghlaHbe'bogh, latlh qabDu' vItu'be', qoj qab latlhDu' vItu'be'; qaS wanI'
qab, tuSuchDI'. SuchwI' vIqIch 'e' vIpoQ.>
l <Ha', yISuv, toDSaH puj. batlh bIHeghbe'. nuH law' Daghaj 'a chay' bIH
Dalo'. Ha', SoHvaD yu'wI' vIDa.>
m <ghuy'cha', lo'laHbe' mInDu'wIj, may' Qav vISuvta'DI'. DaH QovpatlhSajpu'
vItlhej. toH, nuHpu'wI' vIQorghtaH je.>
l <nuHpu'? mIS QIch. jatlhbe' Dochmeyvam. 'a DujatlhmeH ghoghjan lo''a'
De'wI' vay'?>
m <ghobe', jImob 'e' muqIch. 'ach Dochpu'vammo' teSDu'wIj DuQ wa'SanID mu',
qaStaHvIS je wa' lup. nom lo'laHbe'choH teSwIj; tugh mIn rur je. nochDu'wIj
vIvoqbe'.>
l <nochDu' Davoq 'e' DamevDI', toj Duj. Qu'vatlh! 'ej SoHvo' meq yoj je
nge'pu' maw'taHghach.>
m <SuH, batlh vISuqpu' 'a vIpolbe'. QottaHvIS Hegh pujwI' neH. wanI'vammo'
jI'It. HIquvmoH 'e' yIQaH.>
l <Qo'! batlh qamol DaneH'a'? butlh vISuqQo', batlh SuqmoHbe'chugh je. jIH
Hem law', SoH Hem puS. bIpujmo', nuH nIHmeH, ngeDqu' Qu'. 'eH, nuH tIlIq
tlhIH.>
*jIm* 'oH pongDaj'e'. Hujmo', "maw'wI'" lupong vaj jaS 'e' lumaS nuH
lIqwI'pu'. vaj SepDaq luSovbe'lu'bogh QojlaHqu'.
tugh wo'vo' tlheDchu'pa', jabbI'ID lI'pu' QumpIn 'ej ja', "HeSpu' *rIyval*,
lotlhmo' 'ej Hejmo' 'ej beq Hat muvmoHmo'. qopmeH wuqta' 'ej ngIvlI' yo''e',
ngeHpu'bogh yejquv". juntaHmeH Dup Qub la': Duj ghochlI'meH, ghaytan
taQbang'e' bejmo' qopwI' yo', 'oH lIng 'e' mevmeH, chuyDaH chu'Ha', 'ej
ghopDap tlhammo' Do ghurmoH, bavtaHvIS. pay' nom tlhammoy'bI'Heyvo' lurgh'e'
SovlaHbe'bogh qopwI' yo' lughoSchoHtaH. mIwvam 'ong luta'ta'DI', DujvaD pong
nobmeH *nomdok* jatlh la'. HolHom pongvam lo' QutwI', nIjbogh 'Iw qelDI',
puqpoHvo' 'e' qaw je la'.
Qavbogh wa' Qu''e' rInnISmoH: *'ISqo'to* maw'wI' luyu' qopwI' 'e' botmeH,
nuHqachDaq Qab jeD SoDmoHbogh peng'e' baH matHa', ra'DI' la'. yInroH lojmoH
Qab, 'ej yIntagh QapHa'moH.