tlhIngan-Hol Archive: Mon Jan 01 16:40:33 1996
[Date Prev][Date Next][Thread Prev][Thread Next]
tlhIngan mu' wa'DIch
- From: [email protected]
- Subject: tlhIngan mu' wa'DIch
- Date: Mon, 1 Jan 1996 19:39:57 -0500
Su', qaStaHvIS DIS wa'SanID Hutvatlh HutmaH jav'e' lIchepmoHjaj ghu'raj.
"dspeers" puqloD HollaH vISovchoHDI' jIQuch. 'a wanI'vam parqu' nuv motlh,
'e' vItu' je jIH. "qatlh ghuvaD ngonglu'?" lutlhob. ngongbe'lu', vIja'.
taQbe' ghu', Holmey puS yajDI' ghu. yabDaj qalmoHbe', 'a yab tInmoHbej je
mIwvam'e' jeStaHbogh "dspeers". HolQeDmo', jochHa' ngongqoqvam, 'e' Sovchu'.
'ach nuQochba' jIvwI''e', napqu'mo' qechmey Harbogh.
tlhIngan Hol jatlhchu'wI' QupvaD lutmey DIghItlhmeH mavumchugh, vaj laDmeH
'ej ghItlhmeH ghojlaHtaH, 'ej valqu'choH povbogh je puqvam.
qep'a' wejDIchDaq vIqIHmeH 'eb vIghajchugh jIQuch.
jIHvaD Dajqu' wanI': loDnI' vIghaj jIH, 'ej loQ quq, boghDI' ghaH, "dspeers"
puqloD je. Donchuqlaw' HollaHchaj, DubtaHvIS. ('a DIvI' Hol neH yaj
loDnI'wI'.) toH, porgh'ay'Du' SamlaH cha', 'ej vangQo'meH "no" "Qo'" ghap
jatlhlaH cha'. DIvI' mu' "no" 'oH loDnI'wI' mu'na' wa'DIch'e'.
qaSchoH DIS 1996DIch 'e' loplu'meH wanI''e' vIjeStaH. juHwIjDaq Such jup
law', 'ej qaStaH SeymoHbogh 'ej QuchmoHbogh wanI' law'. qaSDI' ramjep
machuSqu'mo', lopmeH wanI'majvaD jIlpu''e' DImuvmoHlaw'. ghaytan DImuvmoH 'e'
luqeHbe' je chaH, tIvqu'moHmo' wanI'.
toH, DaH jIqon 'e' vImev, pIj Doy'moHmo' jabbI'ID tIq, 'e' muqeS charghwI'.
naDev vIqImHa'be'lu'chugh vaj jIghItlh 'e' vItaH 'ej tIq jabbI'IDwIj 'e'
vIghurmoH. leS tIqqu', 'ej Dubpu' je laDwI'pu'. vaj pItlh.
"Macht Rache den erlittenen Schmerz vergessen?" ('oy'wI'vaD 'oy' lIjmoH'a'
bortaS'e'?)
--ghuy'Do