tlhIngan-Hol Archive: Mon Aug 26 13:28:14 1996
[Date Prev][Date Next][Thread Prev][Thread Next]
Re: jIghIQta' 'e' vIDelqang
- From: Alan Anderson <[email protected]>
- Subject: Re: jIghIQta' 'e' vIDelqang
- Date: Mon, 26 Aug 96 14:39:53 EST
chu' jaj. jIghItlhqa'nIS.
bIQtIQHom HeHDaq naghHommey tu'lu'.
naghHommey lIS puqloDwI' 'e' tIv.
reHmeH loQ bIQ He choH.
He chu' wIv 'ej Hevetlhvo' naghHom lel.
HuvchoHpu'bogh Daq SoD bIQ.
tInmo' bIQtIQHom, choHbe'chu' Hena'Daj.
potlhbe' choHHommeyDaj.
'ach reHtaHvIS puqloDwI' tIvbejtaH.
rep law' reH 'ej chen HeHom Doj.
"Thursday" ngengHey cherlu'ta'bogh wIlo'.
tujbej bIQ, 'ach tujqu'be'.
cha' ben bIQ tuj law' DaHjaj bIQ tuj puS.
peDqu'pu'mo' motlhbe' ghu' net QIj.
tetlI'mo' peD bIrqu' HuD 'elbogh bIQ'e'.
'elHa'pa' tujqu'choHbe'.
"Friday" paw vavwI' SoSwI' je.
vIHbogh juHHom ghaj. "Winnebago" 'oH.
chaq juHHomchaj ru' Doj law' juHHommaj ru' Doj puS net maq.
'ach juHHomchaj ru' waH law' juHHommaj ru' waH puS net tembe'!
pawpa' raQHey teblu'pu'.
Daqmaj bID lulo' 'e' wIchaw'.
Sojmaj wIbIrmoHlaHtaHmeH maHvaD chuch lunob.
tlheDDI' vay' Daq pImDaq vIHlaH.
vaj "Saturday" vIH chaH. maSuch 'ej pa' wItIv.
qaS wanI' ramqu'. mabuDlaw'.
"Sunday" Sutmaj wISay'moH "Jackson"-Daq maleng.
Soj Sar wIje'. "Chuckwagon"-HeyDaq 'uQ wISop.
maSoptaHvIS "Teton" HuDmey DIleghlaH.
qaStaHvIS choS raQHeyDaq machegh.
chal wIbejchoH. chunDab DIlegh 'e' wIpIH.
chal Huv potlh meq vIQIj 'e' vIlay'.
chunDab DIlegh wIneHqu'mo' maghIQmeH poH wIwIvta'.
"Perseus"-vo' SISlaw' chunDabmey.
maQapchu'ta'! "Sunday" ram chunDab law' DIlegh.
"Monday" ram chunDab law'qu' DIlegh je.
wa'leS lutwIj vItaHmoH.
-- ghunchu'wI'