tlhIngan-Hol Archive: Fri Aug 23 07:57:08 1996
[Date Prev][Date Next][Thread Prev][Thread Next]
Re: jIghIQta' 'e' vIDelqang
- From: Alan Anderson <[email protected]>
- Subject: Re: jIghIQta' 'e' vIDelqang
- Date: Fri, 23 Aug 96 07:54:01 EST
tlhIHvaD raQHey vIDelnISchu':
raQHeyvamvaD pongmeH "Granite Creek" lo' "National Forest Service".
wa' rep "Jackson, Wyoming"-vo' HeDaq lenglu'.
cha'maH tup naghHom lan je HeDaq cha'DIch lenglu'nIS.
pI'Ha' Hevam ghegh cha'DIch. pIj qoj HeH Don.
HevamDaq lengtaHvIS Duj, lamqu'choHbej.
lutlh raQHey. "shower" HoS ghap tu'lu'be'.
SaH bIQ vIHbogh, 'ej bIQ lo'bogh puchmey'e' puS lutu'lu'.
ngech 'IHDaq 'oH raQHey'e'.
Dech ngemna'. Dat Sor lutu'lu'.
retlhDaq bIQtIqHom tlhol tu'lu'. watlh bIQ.
Dech je HuDmey. wa' HuD naghvaD <lojmIt poS> ponglu'.
Dat qettaH Ha'DIbaH mach. law'qu' "squirrel"-mey.
"mouse"-mey lutu'lu' je.
qaStaHvIS choS rut yoS luSuch Ha'DIbaH tIn.
pIj "deer"-mey "elk"-mey luleghlu'pu'.
loS ben pa' "moose" Sum wIlegh. Sumqu' jay'! Daqna'majDaq yIt!
loQ chuStaH bIQtIqHom. vIQoy 'e' vItIv. jIjotchoH 'e' qaSlaw'.
qoj ghom bIQtIqHom. pa' pum bIQ. chuSqu'taH Daqvam.
bIrqu' bIQ, 'ach bIQ tuj tu'lu' je.
bIQ qoj bIng retlhDaq yav 'elHa' bIQ tuj. chenpu' ngengHom machqu'.
tujqu'mo' bIQDaj tlhol, bIQ bIr chelnISlu' 'oHDaq ba'lu'pa'.
"hot tub" rur. chorgh nuv ngaSlaH.
mobbe' bIQ tuj Halvam. latlh tIn law' wa'DIch tIn puS.
latlhvamDaq ngengHey tlholHa' cherlu'ta'.
bIQ ngaS veHnagh jen vaj bIQ bIngDaq QamlaH vay'.
"swimming pool"-na' 'oH.
Do'Ha' ngengHey 'ellu' net DIlnIS.
langqu'mo' HuD muD 'ej QaDqu'mo' pa' 'IH chal.
qaStaHvIS pem, SuDchu'. puSqu' 'eng.
qaStaHvIS ram, law'qu' Hovmey jay'! SIbDoHmey law' leghlu' je.
potlhqu' chalvam Huv. tugh meq vIQIj.
-- ghunchu'wI'