tlhIngan-Hol Archive: Thu Feb 20 19:35:48 2003
[Date Prev][Date Next][Thread Prev][Thread Next]
RE: tlhoy Qap yotna'
- From: Eric Andeen <[email protected]>
- Subject: RE: tlhoy Qap yotna'
- Date: Thu, 20 Feb 2003 18:45:16 -0700
ghunchu'wI':
> mapaw. mayot. maQap...law'.
> maghomchuqDI', maQuch. tay'DI' juppu', QaQba' wanI'. lopmeH
> 'eb jonlu'. 'ach loQ Qapbe'law' muvmoHmeH ngoQ. Dajqu'
> tlhIngan Hol 'e' luHarlaw' nuvpu' puS. tlhIngan Hol yejHaD
> muvqangbe' HochHom.
>
> 'ach naDev maloptaHvIS, pe'vIl peD. Hemey waQlu'chu'.
> mamejlaHbe'. qaStaHvIS cha' ram maratlh 'e' wInab. DaH
> qaSlI' ram wejDIch. tlhaQ ghu'. mebpa'mey DIcharghta' 'e'
> rur: DaH QI' qum wIchermeH maSaHtaH.
>
> <poQ 'ar> luQuj nuv law'. nav Dochmey Doj chenmoH nuv puS.
> bom be'Hommey. taQchoH Hoch. jIDoy'mo' jIQublaHbe'.
>
> naDev jIHtaHqu'mo' QuchHa' be'nalwI'. ghaH vIpIchbe'.
> jIQuchHa'rup je jIH, wanI' QaHchugh, 'ach pagh choHmo'
> DotlhwIj Sanmaj vIlaj. tugh rura' pente'vo' manargh 'e' vItul...
wa'Hu' tagha' juHwIj vIchegta' jIH. muDDuj vIlIghmo', 'ej Qapbe'chu'taHmo'
*BWI* muDDuj vergh'a', lenglaHbe'wI' Qav jIH. loSHu' jImej net Hech, 'ach
cha'Hu', Qapbe'chu'taHvIS muDDuj vergh'a', muDDuj malja' DIvI' vIrI' 'ej
DaHjaj jImej 'e' luchaw'. jIbep 'ej jIghoH, 'ej wa'Hu' jImej 'e' luchaw',
'ej ghu' DublaH pagh. vaj jIloSnIS. 'ach wa'Hu' po, 'eqqu'taHvIS rep, jIvem,
jIHu', jISay''eghmoH, DochmeywIj vIboSqa', 'ej ghIq jItlheD.
*BWI* muDDuj vergh'a' vIghoSmeH, *MTA Light Rail* lupwI' vIlIgh 'e' vInab.
cha'Hu' ram lupwI' tIjmeH Daq vIjaH, 'ej pawDI' lupwI', wa'Hu' po
jIlenglaHbej 'e' vI'olmeH lupwI' 'orwI'vaD jIjatlh. Qap lupwI'mey 'e' maq
ghaH. maj. vaj wa'Hu' po lupwI' tIjmeH Daq vIjaH 'ej pa' lengwIj vIDIl 'ej
lupwI' vIloS. tugh paw, 'ej lupwI' ghoch vI'olta'DI' SIbI' jItIj. loQ jIloS,
'ej vIHchoH lupwI'. vIHchoHpu'DI' lupwI', jatlh lupwI' 'orwI' <*North
Avenue* neH ghoS lupwI'vam. pa' SutIjHa'nIS, 'ej *bus* botIjlaH.> Qu'vatlh
ghuy'cha' baQa' jay'!!!!!! Qap *light rail* lupwI'mey net maq, 'ach
Qapchu'be'. vaj jIlIghtaH, 'ej *North Avenue*Daq mapawDI' jItIjHa'.
*bus* vIlIghchugh vaj ghaytan muDDuj vergh'a'Daq jIpawDI' jIpaSqu' 'ej
muDDuj vIlIgh net chaw'be'. wanI'vetlh vIcherghQo'qu'. vaj *taxi*
vISamnISlaw'. Do' Qapqa' QumwI'wIj (mebpa' qachDaq Qapbe'), vaj ghaytan
*directory assistance* vIrI'laH, 'ej ghIq *taxi* vIrI'laH. 'ach tagha'
jIDo'qu'choHbej. *taxi* vIlegh, 'ej tIjHa' *taxi* raQpo'. SIbI' *taxi*
vIghoS 'ej vI'el. tugh muDDuj vergh'a' vIghoSlI'. nom jIpaw, 'ej Do' waghbe'
leng.
muDDuj vergh'a'Daq jIpawDI' tagha' DalchoH lengwIj. nom tIjmeH chaw'wIj
vISuq. Hung yaH vIjaH, 'ej jIloSnISqu'be'. jIloS. muDDuj vItIj. mamej. loQ
mapuvchoHmeH maloSnIS, 'ach qay'be'. matlheD. mapuv. majQa'!
pagh