tlhIngan-Hol Archive: Tue Oct 29 23:38:43 2002

Back to archive top level

To this year's listing



[Date Prev][Date Next][Thread Prev][Thread Next]

cha' qo'mey pIm



Here is the proofed reprint of Chapter Four of Leo P. Kelley's "Worlds Apart"

qo' HujDaq

    pa' ghaHlI'bogh qara'e' Sovbe'ba' ghaH.  qaSpu'bogh wanI' yajbe'ba'.  
qaStaHvIS wa' tup bI'raQ luQaHmeH latlh loD ghaH je, chIch loD tlha' ghaH, ‘
ach qaSDI' tup veb naDev ghaHchoHpu'.  Qub qara, <<nuqDaq ‘oH naDev'e'?  
ghuy'cha'.  jISovbe'.>>
    tlhe''eghmoH ‘ej He ngo'Daq cheghchoH.  baq.  naDev SIchbogh He Sovbe' 
jay'.  veng rurbogh Doch tu'lu'be'.  bI'raQ pong jach.  jangbe' bI'raQ.  
jachqa'.  jangbe'.
    Dung chalDaq meQqu' bochbogh ‘ej Doqbogh Hov'a'.  ‘ach naDev Qambogh 
ghaH, Sormey tu'lu'be'.  tI SuD luHutlhchu' Hoch Daqmey leghlaHbogh qara.  
letqu' yav.  Dat yavDaq naghmey tu'lu'.  vIH pagh.  wab lIng pagh.  Qub qara, 
<<Heghlaw' qo'vam.>>  tugh poS lurgh ghoSchoHmeH yIt.  veng cheghmeH He Sam ‘
e' tul.  HIchDaj HottaH.  HIchmo' Qorgh'eghlaH ‘e' Qub.
    pay' wabHey Qoy.  pe'vIl buS.  loQ chuSchoH wabqoq.  vaj Heghbe' qo'vam.  
lurghwIj ghoS vay'!  ‘ach nuq ‘oH?  HIchDaj HottaHvIS qara, loS, ‘ej loS.
    ghIq Daq HopDaq vIHbej wa' Doch.  ghobe'.  wa' ‘oHbe', law' bIH.  
choltaHvIS bIH, Ha'DIbaHmey Huj bIH ‘e' tu' qara.  not Ha'DIbaH Seghvam 
rurbogh vay' tu'pu' qara.  langbe'qu' roDu'chaj.  wej ‘uSDu' ghaj.  ‘emDaq 
cha' ‘uSDu' ghaj ‘ej ‘o'Daq wa' ‘uS ghaj.  wa' rItlh rur ‘uS wa'DIch; rItlh 
pIm rur ‘uS cha'DIch; latlh rItlh pIm rur ‘uS wejDIch.  qettaHvIS Dopvo' Dop 
pImDaq joqtaH Hoch Ha'DIbaHmey tlhuQ tIq.
    qara lurgh lughoSmo' qetbogh Ha'DIbaHmeyvam, loQ DoH ghaH.  Dat bej qara, 
‘ach So''eghmeH Daq Sambe'.  qaraDaq lughoSchu' Ha'DIbaHmey.  wa' DuH neH 
SeHlaH qara.  Ha'DIbaHmey bach.  bachDI', nomHa' qetchoH Ha'DIbaHmey.  wab 
lulIngchoH.  loQ SaQbogh ghu rur.  ghIq qara lurghvo' ghoSchoH ‘ej qetqa'.  
mejmo' Ha'DIbaHmey, Quch qara.  Ha'DIbaHmey ‘omnISchugh, ‘Iqmo', vaj qay'.  
qara lughoStaH ‘e' luwuqchugh Ha'DIbaHmey, vaj ghaH lujeybej bIH.
    pay' HurghchoH chal.  Dung bej qara.  Hov'a' Doq leghtaHbe'.  HuvHa'moH 
vay'.  ghIq wab pIm Qoy.  qaSchoHDI' ngu'laHbe' qara.  ‘ach tera'Daq 
ghaHtaHvIS qara'e', wab Qoypu'bogh ghaH ‘oH wabvam'e'.  qaStaHvIS tup nI', 
ngu'chu'be'.  ‘ach Sov.  laqbogh telDu' wab ‘oHbej.
    pay' puvbogh Depmeymo' buy' chal.  Hov'a' Doq luHuvmoHmo', Depmey 
leghlaHchu'be'.  ‘ach telDu' ghajbogh Depmey leghlaH  wej ‘uSDu' ghajbogh 
Ha'DIbaHmey.  wabchaj lIngqa' ‘ej SaQwI' wab rur.
    bejtaHvIS qara, chalvo' ghIr telDu' ghajbogh Depmey.  HochHom 
Ha'DIbaHmeyvam ‘uchchoH ‘ej chalDaq qeng.  ghaH ‘emDaq laqbogh telDu' Qoy 
qara.  wej tlhe''eghmoHpa' qara, ‘uchlu'!  ghIq yavvo' SalmoHlu' ‘ej chalDaq 
qenglu'.
    qara jonpu' telDu' ghajbogh Depmey wa' Dep. ‘ej pagh SeH qara ‘e' Sov.  
HIchDaj ‘uchtaH. ‘ach Depvam Huj bachlaHbe'.  bachchugh, yavDaq pum.  pum je 
qara.  QID, chaq Hegh.
    vonlu' ‘e' Sov.
    ghaH bIngDaq nom vIHlaw' yav.  lujuS telDu' ghajbogh latlh Depmey ‘ej 
Ha'DIbaHmey jonpu'bogh bIH ‘uchtaH bIH.  SaQ Ha'DIbaHmey.  pagh wab lIng 
qara.
    tugh yavDaq DIS chong lulInglu'pu'bogh lupaw telDu' ghajbogh Depmey.  DIS 
chong lurgh lupuv.  DIS chong retlh yavDaq qara lan jonpu'bogh Depvetlh.  
ghIq loQ yuv.  DIS chongDaq pum qara.  Dat qara luDech Ha DIbaHmey jonpu bogh 
telDu ghajbogh Depmey.
    maHpIn tIn rur DISvam chong ‘ej taHbogh Dopmey ghaj.  beQ rav.  pe'vIl 
DIS chong Dopmey taHqu'Daq toS qara.  ‘ach reH pumqa'.  DIS chongvo' Sup ‘op 
Ha'DIbaHmey ‘e' lunID.  ‘ach pumqa' je bIH.  qaSDI', jach qoj SaQ.  Haj bIH ‘
e' Sovbej qara.  ghaH lu'oy'moHbe' ‘e' Sov je.  ‘op ret telDu' ghajbogh 
Depmeyvo' Haw' bIH.  qara lutlha'be'.
    DIS chong yor paw telDu' ghajbogh Depmey wa' Dep.  bochlaw'.  jIb 
Hutlhchu'bogh loS Dop ghajbogh nach ghaj.  wa' mIn SuD ghaj.  tInqu' porghDaj 
‘ej yav Don ‘oH porghDaj'e'.  tInqu' telDu'Daj.
    pay' DIS chong bIS'ubDaq puv Depvam.  wa' Ha'DIbaH ‘uchchoH.  ghIq DISvam 
chong HeSDaq ‘oHtaHbogh ngaSwI' tIn'e' pawmeH, Ha'DIbaHvam qeng Dep.
    ngaSwI'vam qoD leghlaH qara.  HIvje' Hap Som ghajlaw'.  ngaSwI' qoDDaq 
Ha'DIbaH lan Dep, ghIq ngaSwI' lojmIt SoQmoH.  loQ DoqchoH ngaSwI' qoD, ghIq 
Doqchu'.
    ngaSwI'Daq ‘oHbogh Ha'DIbaH'e' bej qara.  Haw' ‘e' nID. ‘ach rInDI' 
tupmey puS, mev.  pum ‘ej vIHbe'.  tugh DoqtaHbe' ngaSwI' qoD.  ngaSwI' 
lojmIt poSmoH telDu' ghajbogh Dep ‘ej Ha'DIbaH lel.  DaH qIj Ha'DIbaH porgh.  
ngaSwI' HujDaq Ha'DIbaH vutpu'bogh telDu' ghajbogh Dep SopchoH Depvetlh.
    DIS chongDaq mInDu'Daj SoQmoH qara.  DISvam chongvo' narghbe'chugh qara, 
SanDaj yajchoH.  telDu' ghajbogh DepmeyvaD Soj mojbej ghaH, Soj'e' lumojbogh 
Ha'DIbaHmey jonta'bogh Depmey rur.  DIS chongvo' toSlaHbe' qara ‘e' Sov ghaH. 
 ‘ach wa' ‘eb ghajtaH.  ghaH DungDaq ‘oHtaHbogh telDu' ghajbogh DepvaD jatlh 
qara ‘e' nID.  DIS chongDaq qara lutlhejbogh Ha'DIbaHmey rurbe' qara ‘e' 
luyaj Depmey chaq ‘e' chavlaH qara.
    DepvaD jach qara, jatlh, <<HI'Ij!  naDevvo' HImejmoH!  maja'chuq ‘e' 
yIchaw'!>>
    Ha'DIbaH Sop rIntaH Dep.  qara bejmeH wa' mInDaj SuD lo'.
    jach qara, jatlh, <<qo' pImvo' jIH.  choyaj'a'?>>
    SoQchoH Dep mInvetlh, ghIq poSqa'.  puv ‘ej mej.  yajbe' Dep ‘e' Sov 
qara.  ngajDI' cheghmo' Dep, qara merlu'.  Depvam lutlhej latlh.  DIS chong 
botlh lubej Hoch.
    Dung lurgh jach qara, jatlh, <<lIyajlaH'a'?>>
    mIqta' mach ‘uchtaH telDu' ghajbogh wa' Dep.  nachDaj retlhDaq mIqta' 
lan. ghIq muDDaq pep.  mIqta'Daq ja'law'.  qaSpu'DI' wa' lup, mIqta'vo' 
narghchu' mu'mey yajlaHbogh qara.
    jatlh mIqta', <<'Iv SoH?  nuqDaqvo' SoH?  not Ha'DIbaH Darurbogh 
wIleghpu'.>>
    qaSpu'bogh wanI' loylaH qara.  mu'mey yajlaHmeH qara mughpu' mIqta'.  
ghaytan mu'meyDaj yajlaHmeH Deppu' mughlaH je mIqta'.
    jach qara, jatlh, <<Human jIH.  Hov javvo' jIH.>>
    <<Hov jav?  not Daqvetlh pong wIQoypu'.>>
    jatlh qara, <<pImchuq qo'vam qo'vetlh je. pa' mururbogh ghotpu' law' 
tu'lu'.>>
    nI'be'taHvIS ja'chuq Deppu'.  ghIq mIqta'Daq jatlhqa' wa' Dep.  <<qo'lIj 
He yI'ang!>>
    ra'mo' buQ qara.  meq Sovbe', ‘ach Deppu'vam voqbe'.  bIrlaw' Hoch Dep 
wa' mIn ‘ej chImlaw'.
    pawqa' mu'mey, jatlh, <<qo'lIj He yI'ang!>>
    ghel qara, jatlh, <<qatlh qo'wIj He boSov boneH?>>
    jatlh mIqta', <<qo'majDaq puSchoH Ha'DIbaHmey.  bIjatlhpu' qo'lIjDaq 
Dururbogh Ha'DIbaHmey law' tu'lu'.  qo'lIj wIghoSbej.  latlh Soj wIpoQmo', 
qo'lIj Hoch Ha'DIbaHmey DItlhap.>>
    roplaw' qara.  Deppu'vaD jatlh, <<naDev vIpawmeH He vISovbe'.  vaj 
tlhIHvaD qo'wIj He vI'anglaHbe'.>>
    jatlh wa' Dep, <<bInep.  tugh qo'lIj He Da'angnIS.  bIHeQbe'chugh, 
ngaSwI'vamDaq SoH pIlan ‘ej SoH pIvut!  Ha'DIbaH veb wIvutbogh SoHbej.  
maghungqu'pa', maloSlI'.  ngugh ‘uQ'a' tIn wIneH.  SoH ‘oH.>>
    ghIq puv Hoch telDu' ghajbogh Deppu' ‘ej mej.


Back to archive top level