tlhIngan-Hol Archive: Tue Oct 29 23:34:48 2002
[Date Prev][Date Next][Thread Prev][Thread Next]
cha' qo'mey pIm
Here is a proofed reprint of Chapter One of Leo P. Kelley's "Worlds Apart"
cha' qo'mey pIm
qaravaD Degh
De'wI' tlhopDaq Qam loD. HaSta jabbI'ID ‘anglu'bogh laD. ‘ejDo'
vengvo' ghaHvaD jabbI'ID ‘oH.
leQ QonHay' tuq:
lutlIj wIlaDmeH DaHIjmo' majangneS. lut Seghvam wIlo'laHbe'. vaj SoHvaD
wIHIjHa'.
‘ejDo' veng paqmey lIngwI'pu'
laDtaHvIS loD, SIbI' Doy'law' qabDaj. laDpu'DI', De'wI'vo' raSDaj
ghoSmeH yIt. ghIq ba', ghopDu'DajDaq nachDaj ‘uch, ‘ej mInDu'Daj SoQmoH.
yabDajDaq jabbI'ID mu'mey laDpu'bogh ghaH leghtaH ghaH.
nachDaj pep leQ. mInDu' poSmoH. ghaHvaD lutDaj HIjHa'lu'pu'mo', chay'
ruch? SIv ghaH. lIngwI' pImvaD lut HIj'a'? vagh lIngwI'pu'vaD HIjta'. ‘ej
ghaHvaD luHIjHa' Hoch. lutDaj je'qang ‘ej lIngqang pagh, qar'a'?
<<lo'laHbe',>> ‘e' Qub leQ. <<qen lutmeywIj vIngevlaHbe'law'.>> paq'e'
qonta'bogh ghaH buS ghaH. lIngwI'pu'vaD paqvam ngeHpu' je, ‘ach ghaHvaD
lungeHHa' Hoch. paqvam bup ghaH. jegh. <<DaH nuqDaq ‘oH paqvam'e'?>> SIv
ghaH. <<voghDaq ‘oHbej.>> ‘e' Qub.
<<chay' ‘argh ghItlhmeywIj? tera' vIDabtaHvIS lutmey law' vIngev. ‘ach
‘o'rIn qIb Hov jav vIDabchoHpu'DI' pagh vIngevlaH. choH nuq?>>
<<jIchoHpu' jIH,>> ‘e' wuq.
DISmey law' ret tera'Daq loD Quch ghaHpu'. qara tu' ‘ej Saw. ngugh Qup
leQ. <<jIQuptaH,>> ‘e' Qub.
<<jIQupchugh pagh jIQupbe'chugh, ramqu'.>> ghIq Qu' ghajbe'choH.
nI'taHvIS Qu' chu' Sambe'. Qu' chu' nej ‘e' mev ‘e' chup qara. chav Data'
DaneHchu'bogh, yIruch ‘e' pon qara. bIbajmeH lutmey tIqon! Huch law'
lIngbogh Qu' ghajtaH qara. qontaHvIS leQ batlh Suqbej ghaH ‘e' Harchu' qara.
QaQbej Hoch ‘e' Har.
vaj Qu' nej leQ ‘e' mev. lutmey qonchoH neH. lut wa'DIch lut cha'DIch
je qonpu'DI' ghaH, ngev ghaH. lutmey nIv bIH ‘e' maq qara.
taghDI' wanI'vam, Quch chaH. juHDaq ratlh leQ ‘ej qonmeH Hoch poH lo'
ghaH ‘e' tIvchu'. qara Qu' tIvchu' qara. logh Hubbeq gheS. batlh vum qara,
‘ej tugh bu' moj. ngugh ‘o'rIn qIb Hov javDaq vumchoH qara net ra'.
vaj Hov jav luDabnISchoH leQ qara je. tlhoS qaSpu' wa' DIS. Hov javDaq
vumchoHpu'DI' qara, ngajtaHvIS poH, logh Hubbeq HoD moj qara.
pay' vulHa'chu' leQ. QeH. qaramo' QeH. qatlh? <<qatlh qaramo' jIQeH?>>
Sovbe' leQ. vulHa'ghachvam qIl ghaH neH ghaH. ‘ach luj. QeHchu'mo',
vay' qIp ghaH neHbej ghaH.
DaH pa' ‘el qara. Hurghbe' jIbDaj ‘ej chal lurur mInDu'Daj. loQ qara
jen law' leQ jen puS. jatlhlI' leQ loQ ‘e' tIv leQ, ‘ach qaravaD Dajchugh
wanI', vaj jatlhtaH qara ‘e' tIvchu' qara.
pa' Dopvam ghoSchoH qara. ‘ach De'wI' HaSta jabbI'ID leghDI', mev.
jabbI'ID laD.
laDpu'DI', jatlh, <<leQoy. Do'Ha'. lutvam Dangev DaneH ‘e' vISovbej.>>
jatlh leQ, <<potlhbe'.>> ‘ach potlhqu' ‘e' Sov. ghaHvaD potlhchu'.
jatlh qara, <<paq lIngwI' pImvaD lutlIj yIngeH! QaQ lut; Dangevba'.>>
ghel leQ, jatlh, <<'e' DaQub'a'? wejpuH, DuH pIm vIghov jIH! QaQbe'
lutwIj.>>
jatlh qara, <<teHbe'. vIlaDpu' jIH. Dun lut ‘e' vIQub jIH.>>
jatlh leQ, <<wejpuH! toH, qaqaD! QaQchugh lutmey pagh qabchugh lutmey,
chay' SovlaH Hubbeq nuv?>>
jach qara, jatlh, <<leQ!>>
qara qabDaq ‘oy' leghchoHDI' leQ, SIbI' Hu'. qara luDech leQ DeSDu'.
jatlh leQ, <<yIqIm! jIqoS. jIjatlhDI' muHIvqa' veqlargh. SoHvaD jItlhIj.>>
jang qara, jatlh, <<jISov. tugh lutmey Dangevbej ‘e' vISov. paqlIj
Dangevbej. vISov jIH.>>
ba'qa' leQ ‘ej jatlh, <<chaq bIlugh. nInIDtaH jay'. ‘ach Do'Ha'taH
ghu'.>>
jatlhchoHlaw' qara ‘ach jatlhbe'.
jatlhqa' leQ, <<'op ret jInoy vIneH, ‘ach qaSlaHbe' wanI'vam ‘e' vIpIH.>>
jatlh qara, <<bIQap ‘e' vIHar.>>
jatlh leQ, <<Dap DaSovba'.>>
leQ bej qara, ghIq jatlh, <<qaSpu' nuq, leQ?>>
ghel leQ, jatlh, <<chay'?>>
jang qara, jatlh, <<bISovba'. ‘arghpu' tlhoghmaj Dotlh. DaH maQuchbe'.
reH maqaDchuq. reH vay'mo' bIQeHlaw'. qay' nuq, leQ?>>
jatlh leQ, <<jIvumHa'mo' jIDoy'. loQ jIleS ‘e' vInab.>>
leQ bejchu' qara. ghIq jatlh, <<bItlheDrupbe' ‘e' vItu'. qep wIpawmeH,
mapaSchugh, jIlajQo'.>>
jatlh leQ, <<jIjaH vIneHbe'law'.>> mInDu'Daj So'bogh jIbmey yuv ghaH.
jatlhqa', <<qatlhejbe'chugh, bISaH'a'?>>
SaHchu' ghaH ‘e' QIJ qara neH ghaH. jeSbe'chugh leQ, mo' Sovlaw' qara.
Hubbeq qepDaq van Degh Hev qara. nIteb chotwI' vonpu' ghaH ‘ej jonpu'. qara
Qu' Qapla' nIv law' leQ Qu' Qapla' nIv puS ‘e' Qub leQ ‘e' SIv qara. chaq
meqvammo' jeSbe' leQ neH ghaH.
jatlh qara, <<maj. rInDI' qep, qaleghqa'.>> ghIq Sut SeQ tuQchoHmeH
pa'vo' mej.
cheghDI' qara, mer wanI'. Sut SeQ tuQ je leQ. jaHrup ghaH.
jatlh leQ, <<jIwuqqa'. vanlIj qep tamlaHbe' mIp law'. Degh Hev
be'nalwI' ‘e' vIleghbej.>>
juH lumej; Duj luyong; tugh qep Daq lupaw.
qara pong jachlu'DI', Degh HevmeH qara, Hu' ‘ej vIH. Hubbeq yaS yoHqu'
ghaH qara'e' ‘e' maq qara SutDaq Degh rarmoHbogh la'wI'vetlh. la'wI'vaD
tlho' qara ‘ej leQ retlh quS chegh.
qaravaD jatlh leQ, <<QaQ Deghvam.>>
jang qara, jatlh, <<ghaytan. Dururbogh vumchu'wI'pu'vaD van nobbe'mo'
vay', Do'Ha'.>>
Hurghchu' leQ qab.
jatlhHa' SIbI' ‘e' Sov qara. qID ghaH neH ghaH. ghaHvaD potlhqu'be'
Degh ‘e' ‘ang ‘e' nID. potlhbe' Deghmey ‘e' Qub leQ neHbej qara. ‘ach luj.
ngajpu'DI', juHchaj lucheghtaHvIS, Dujchaj jIH chu' qara. leS qara ‘ej
HaSta loD bej ghaH. Hov javDaq ‘o'rIn qIbDaq je qaSpu'bogh wanI'mey Qum
loDvam ‘ej Qoy qara.
jatlh loDvam, <<DaHjaj Hov cha' mup SuS HoSqu'. ghotpu' law' HoH ‘ej
latlhpu' QIH. DaH Hov jav Dotlh vImaqrup.>> ‘ach jatlh ‘e' mev. ghaH Dung
HaSta bejchoH.
ghIq jatlhqa', <<qIbmaj vegh lIy'a' tInqu' qelbogh De' DaH ‘e' vIlab.
Hov jav ngeQlaw' ‘e' luchov ‘op tejpu'. Hov jav juS ‘ej ngeQbe' ‘e' luchov
tejpu' pIm. pe'IjtaH! choltaHvIS lIy, tlhIHvaD De' chu' wIlabbej.>>
jIH chu'Ha' qara. ghIq Hubbeq QumwI'Daj chu'. Hubbeq yaH rI'.
jatlh qara, <<QonHay' HoD jIH. yuQmaj chol lIy ‘e' vIQoy.>>
jatlh jangbogh yaSvetlh, <<QonHay' HoD. bIrI'mo', jIQuch. qarI'rupta'
jIH. SIbI' yaHmeyraj tIchegh, Hoch beqpu'! peruch! ngeQlI'chugh lIy,
maSeHnISrupbej.>>
jatlh qara, <<tugh jIpaw.>> leQvaD jatlh, <<yaHwIjDaq jIyongHa' ‘e'
yIqaSmoH!>>
jatlh leQ, <<wejpuH! chay' jIlobbe'? qen tlhoS juHlIj moj yaHlIj.>>
jatlh qara, <<leQ! lIyvetlh qelbogh jabbI'ID DaQoypu' SoH. yuQmaj
ngeQlaw'chugh lIy, SeHrupbe'chugh Hubbeq, vaj qaS lot'a'.>>
Duj tlhe'chu' leQ ‘ej qara yaH lurgh ghoSmoH. yongHa' qara. pagh jatlh
leQ, ‘ach mejmeH raQ.