tlhIngan-Hol Archive: Thu Nov 21 16:06:44 2002
[Date Prev][Date Next][Thread Prev][Thread Next]
tagha'!
- From: "d'Armond Speers" <[email protected]>
- Subject: tagha'!
- Date: Thu, 21 Nov 2002 15:09:14 -0700
tagha' nIteb jI'orpu'. wanI' vIDel.
wa'Hu' DuSaQ vIghoS. jI'orlaHpa' Duj patmey vISovchu' 'e' vItobnIS. muchov
ghojmoHwI'. yap SovwIj.
jI'orpa', Duj vInuDnIS. Qapchu' Hoch Duj pat 'e' vI'olDI', mutlhej
ghojmoHwI'.
qach runHa'Daq vum SeHwI'. Duj lolmoHpa' 'orwI', chaw'nIS SeHwI'. yavDaq
vIHbogh Duj jIH "yav SeHwI'". muD Dotlh vIqelpu'DI', yav SeHwI' vIrI'.
SaqmeH He vIghoS 'e' chaw', vaj maghoS.
matlheDpa', Duj vIchovqa'. jonta', SeHlaw je vIchov. puvtaHvIS Duj
QapHa'chugh vay', qay'qu' ghu'. Qap Hoch 'e' vI'olnIS.
matlheDrupmo', "chal SeHwI'" vIrI'. vergh mIch wImejbe'; SaqmoHmeH mIw
wIqeq neH. wejlogh Duj vISaqmoH. jotchu'mo' SuS, ngeDqu' Duj vISaqmoHmeH
mIw. Duj vIvergh, 'ej yongHa' ghojmoHwI'. SeHwI' qachDaq ghoS, mubejmeH
muQoymeH je.
muD Dotlh De' vISuqqa'; choHbe'. jotchu' SuS, Huv chal. HurghchoH chal,
cholmo' choS. nIteb jI'orlaHchugh, qul DIr vISopnIS 'e' vISov. yav SeHwI'
vIrI'qa', 'ej SaqmeH He vIghoS. jItlheDrupDI', chal SeHwI' vIrI'. SIbI'
ghoghDaj vIQoyDI', pum tIqwIj. tlhIbqu' SeHwI'vam. chaDvay'Daj vIwIvDI',
'orwI'pu'vaD bo'Degh ghom Daq Del ('ach, bo'Degh Segh Sovbe' ghaH 'e' chID).
potlhbe' De'vam, poH natlh neH. HurghchoHmo' jIboHchoH.
tagha' jatlh 'e' mev. vIrI', 'ej jItlheD 'e' chaw' tlhIbwI'. SIbI'
puvchoHDI' DujwIj, chaDvay' chu' munob tlhIbwI'; latlh chal SeHwI' vIrI'laH!
jIjangDI' jot ghoghwIj, 'ach yabwIjDaq jIlop.
le'be' wanI': jI'or, jIghoS, (wejlogh) jISaq, Duj vIvergh. SaqmeH He
vIghoSDI', tlhoy jIjen 'e' vItlhoj. DujDaq SaHbe'mo' ghojmoHwI', tISchoH
Duj. tISmo', nom ghIrbe'. qay'be': nom ghIrmeH mIw vISov, 'ej ngeD Duj
vISaqmoHmeH mIw. ghu' choHbogh vIma'laH.
DuSaQ vIcheghDI', loSlI' ghojmoHwI'. yIvbeHwIj thlap. pe' 'ej 'ay' teq.
tugh jIHvaD 'ay' tatlh, 'ay'Daq DIjDI'. qa'vIn HIvje' munob je. "nIteb
jI'orpu'" maq. Dunqu'!
--Holtej 'utlh
[email protected]
_________________________________________________________________
The new MSN 8: smart spam protection and 2 months FREE*
http://join.msn.com/?page=features/junkmail