tlhIngan-Hol Archive: Fri Jan 25 00:06:48 2002

Back to archive top level

To this year's listing



[Date Prev][Date Next][Thread Prev][Thread Next]

Heghpu' be'nalwI' vavnI'



chorghmaH chorgh ben boghpu' be'nalwI' vavnI'.  qaStaHvIS DISmey QIt
ropchoHtaH ghaH.  QopchoHlaw' porgh.  wa' wen QopchoH je QoghIj.  'ay'Daq
jaHbe' 'Iw; "stroke" SIQ.  Christmas po Louisville ropyaHDaq ghaH wISuch
be'nalwI' puqloDmaj jIH je.  pujba' ghaH 'ach 'oy'be'law' 'ej Hublaw'
yabDaj.  'ach Duy' yab qawHaq; DIS Sovchu'be'.  nughel: <tuSuchmeH,
SuyIt'a'?  "streetcar" bolIgh'a'?>  DaH vengDajDaq "streetcar"
tu'lu'be'bej.  mISbe' ghaH; SovHa' neH.

QongDaqDaq Qot ghaH neHbe'mo', rachwI' wIrI'.  quS ba'choH vavnI' 'e' boQ
rachwI'.  maSuchtaHvIS QaQ wanI'.  loQ bItlI' puqloDwI', 'ach SIQ.
ropyaHvo' maghoS 'ej Florida wIghIQmeH malengchoH.

jaj veb ghaH luSuch latlhpu'.  Sabpu'law' ghaH; buSlaHchu'be' 'ej reH
QongchoHtaH.  nom 'argh ghu'.  maja'chuqlaH maH ghaH je maDo'ba'pu'.

cha'Hu' QIn Hev be'nalwI'.  <ropqu' vavnI'.  tugh Hegh net pIH.  chaq vagh
jaj.>  ghu' wIqel 'ej loQ ma'IQ, 'ach yIn wanI'mey DIbuSnIStaH.  Friday
noSmeH Soj chernIS be'nalwI'.  Saturday DungluQ bIghHa'Daq qaS nentayqoq.
Saturday pov naH yupma' lop lalDanghommaj.  Sunday DuSaq ghojwI'pu' ghojmoH
be'nalwI', juHmaj ngo' wIngevmeH <juH poS> cherlu', qepHom vIqaSmoH...buy'
yInmaj.  mImchugh Hegh, mabepbe'bej.

wa'Hu' QIn Hev be'nalwI'.  <Heghpu' ghaH.  wejHu' Louisville-Daq wImol.
Friday yIpaw.>  vaj wanI'mey DIbuSHa'nIS; cherwI' lIw DISamnIS.  tuq
wISaHnISchu'.  Friday tay' qorDu''a'.  Saturday po qaS nol.  ghaytan
Saturday ram macheghpu'.

-- ghunchu'wI'


Back to archive top level