tlhIngan-Hol Archive: Wed May 02 11:47:56 2001
[Date Prev][Date Next][Thread Prev][Thread Next]
chaq jIDogh
- From: Eric Andeen <[email protected]>
- Subject: chaq jIDogh
- Date: Wed, 2 May 2001 11:47:24 -0700
juHwIj, yaHwIj jojDaq *gym* QaQ tu'lu', 'ej jIpIvtaHmeH 'ej jIHoSchoHmeH pa'
vIjaH. Hoch Hogh loSlogh vIjaH 'e' vInID, 'ach HochHom Hogh wejlogh neH
vIjaHlaH. pa' jImI' 'ej Dochmey 'ugh vIpep.
jImI'meH cha' jan Segh vIlo'. wa' SeghvaD *Stairmaster* (letlhpIn) perlu'.
vIlo'taHvIS letlh vItoSlaw'taH, 'ach not jIvIH. Sech cha'DIch vIlo'taHvIS,
cha' naQDaq jIqam 'ej jIqetlaw'. vIHmo' naQmey, jIvIHbe' jIH.
jIqetlaw'taHvIS, gho beQ He ghoStaH qamDu'wIj, vaj janvamvaD *Elliptical*
perlu'. jan Segh cha'DIch vIlo' 'e' vImaS, 'ach puSmo' roD Hoch janmey lo'
latlhpu' 'ej letlhpIn vIlo'nIS. Doghbej qeqvam 'e' Qub bejwI', 'ach vIta'mo'
HoSchoH tIqwIj, taghDu'wIj, 'uSDu'wIj je. jItlhetlhbej: QIt mI'meH poHmeywIj
vInI'moH, 'ej rut jan vIlIS 'ej qeq vIQatlhmoH.
jImI'ta'DI', Dochmey 'ugh vIpep. rut jan Qatlh vIlo', 'ej rut 'ughbogh Doch
nap neH vIlo'. HochHom SomrawwIj vIlo' 'e' vInID. wa'logh 'uSDu'wIj vIlo';
ghIq cha'logh rowIj, DeSDu'wIj vIlo'; ghIq 'uSDu'wIj vIlo'qa'.
jIHoSchoHlaw'taH, 'ej ghurtaH chebmey vIpeplaHbogh, 'ej loQ nup je chebmey
vIngI'bogh.
wejmaHHu' jIropchoH. qaStaHvIS cha' jaj, QongDaqwIjDaq jIQot neH. qaStaHvIS
wa' Hogh naQ jImI'laHbe'. jIberghqu'. jImI'qa'DI' jIpuj 'ej nom jIDoy'choH.
va. cha'maHHu' jIropqa' jay'. muHIvqa' rop mIgh. DaH jIpIvqa'chu'pu' 'ej QaQ
ghu'.
pagh