tlhIngan-Hol Archive: Mon Mar 19 22:03:50 2001

Back to archive top level

To this year's listing



[Date Prev][Date Next][Thread Prev][Thread Next]

be'nalwI' vav rop'a': DaH Saja'laH



vagh wen ropHom SIQlaw'lI' be'nalwI' vav.  ghaH nuD Qel.  'oy' meq Sambe'.
loS wen nuDqa'.  Seng'a' nubchoH Qel.  nuDnISqa' 'e' wuq.  ghIQ be'nalwI'
vav SoS je 'e' lunabmo', mIm.  wej wen vav lunuDchu' Qelpu' 'ej rop'a' Sam:
Hugh "cancer" ghaj.

qarchu'be' <Hugh>.  Hugh 'och Hur Dan "tumor".  tlhoS burgh Hot.  Do' nom
Seng'a'vam tu'pu' Qel.  vagh wen vav 'oy'moHlaw'pu' SengHom pIm.  meq
nejtaHvIS bong "tumor" legh.

"cancer" buSHa'lu'chugh, pIvqu' ghaH.  vaj Hergh HoSghajqu' cherghlaH 'e'
wuq Qel.  'aDDajDaq taS SuQ Qaylu'.  motlh Hoch jaj qaStaHvIS cha' rep QIt
Herghvam SuQ noblu', tlhetlhtaHvIS cha' Hogh.  'ach porgh HoS ghaj ghaH 'ej
vaQlaH vorwI'.  cha' wen qaStaHvIS wej jaj Hergh tlhoQ SuqtaH.  wa' wen mIw
nIb SIQqa'.  "tumor" machmoH mIw 'ej "cancer cells" tlhab HoH 'e' Hech Qel.
tugh nachDajvo' pumchoH jIbDaj; nom loj 'ej chIm nach yor.  (<Hab vavlI'
nach> vIQub 'ach be'nalwI'vaD vIjatlhQo'.)

wa'maH cha' Hu' be'nalwI' vav Haqlu'.  machchoHpu' "tumor" 'ej yon HaqwI'.
bID 'uj Hugh 'ochDaj teq.  loQ roplaw' 'op "lymph nodes" Sum.  bIH chovmeH
teq je.  burghDaj pepqu'; DaH lungDu'Daj joj DungDaq 'oHtaH.  ropbe'qu'
"lymph nodes"; bIHDaq SaHbe' "cancer".

qaStaHvIS chorgh jaj ropyaHDaq ghaH rachlu'.  burghDaq Soj qeng chach 'och.
SoplaHbe'.  pIvqa'taHvIS tlhutlh net tuch.  chaw'lu'pa' tlhutlhchugh, chaq
nIj HughDaj.  jatDajDaq "sponge" yIQ lanlaH 'ach ghup net tungchu'.  jav
Hu' tlhutlhqa'.  nIjbe' Hugh.  loQ Sojqa'.

loS Hu' juHDaq chegh.  DaHjaj ghaH puj law' cha' wen ghaH puj puS 'ach
pIvlaw'.  nay' mach SoplaH.  HurDaq yItlaH.  cha' Hu' wISuch 'ej pov wItIv.
motlhchoHlaw'pu' nachDaj boch.

(Qatlh je be'nalwI' SoS ghu'.  QuchmeH Hergh lo'lI'.)

ghaH vorpu''a'?  maloSlaH neH.

-- ghunchu'wI' 'utlh




Back to archive top level