tlhIngan-Hol Archive: Wed Sep 27 11:41:56 2000
[Date Prev][Date Next][Thread Prev][Thread Next]
yInwIj wanI'mey
- From: Eric Andeen <[email protected]>
- Subject: yInwIj wanI'mey
- Date: Wed, 27 Sep 2000 11:41:19 -0700
jIvumqu'nIStaHqu', 'ach rut loQ jIyevlaH.
wejHu' jIH'a' lut vIbej. 'oHvaD "Almost Famous" (tlhoS noy) ponglu'. ja'wI'
Qup qel lut. lengtaHbogh *nagh QoQ* muchwI'ghom "Stillwater" (bIQ jot)
tlhejtaH ja'wI', 'ej tlhejtaHvIS paqHom "Rolling Stone" (pumbogh nagh 'ej
DIngbogh) noyvaD lut qon. lengtaHvIS nom nenchoH QupwI', 'ej 'eyqu' lengDaj
lut. HochvaD vIchup, 'ach charghwI'vaD vIchupqu' - QupwI'vaD "William
Martin" ponglu'.
cha'Hu' Qe' chu'Daq 'uQ vISop. *Mexico* Qe' 'oH, 'ej bIQDep jab. chIS bIQDep
vISopbogh, 'ej 'oH pID qettlhupHey Doq. 'ey 'ej tlhorghqu' - jISoppu'DI'
qaStaHvIS wejmaH tup meQlaw'taH wuSDu'wIj, jatwIj je. Sojvam tIvlaHbej
tlhInganna'.
wa'Hu' DujwIj taQbang chovlu'. Hoch DIS wa'logh qaS wanI'vam 'e' poQ Sep
vIDabbogh chut. chovwI' yaHDaq jIpawDI', jav loSbogh Duj tlhegh vIlegh. wa'
vIwIv 'ej jIloSchoH. ngo'mo' DujwIj, jIloStaHvIS bIrmoHwI' vIlo'qangbe'. vaj
jItujqu'choH. va. tagha' jIruch net ra'. DujwIj chovlu'. luj. loQ 'Iq
*Carbon Monoxide* tlhuDbogh. Qu'vatlh! DaH tI'wI' yaH vIjaHnIS, 'ej chovwI'
yaH vIjaHnISqa' jay'. muD watlhHa'moH DujwIj vIneHbe'bej, 'ach chovmeH Qu'
vISIQ 'e' vIpar.
pagh 'utlh