tlhIngan-Hol Archive: Wed Dec 27 14:03:29 2000
[Date Prev][Date Next][Thread Prev][Thread Next]
qettaH yabwIj
- From: "William H. Martin" <[email protected]>
- Subject: qettaH yabwIj
- Date: Wed, 27 Dec 2000 17:03:00 -0500 (Eastern Standard Time)
- Priority: NORMAL
rut tlhIngan Hol vIqeltaHvIS qet yabwIj. QIt yItlaHbe'. nom
qetnIS. qechmey ram qechmey potlh joq vIqel. jISaHbe'. Hoch
vIQubbogh vIDel vIneHDI' tlhIngan Hol vIlo'. DIvI' Hol
vIlo' vIneHchugh jImughnIS.
ghu'vam vISeHlaHbe'. mujuS. pIjHa' qaS ghu'vam. poH
vIwIvbe'. vIwuqbe'. not vIwuqlaH. muwIv ghu'. ghu'
vIwIvlaHbe'.
ghaytan DalchoHpu'DI' ghu'wIj 'ej vay' wanI' joq vIloSDI'
DIngchoH yabwIj 'ej gho' ghoS yabwIj 'ej tugh tlhIngan Hol
lo'. buDQo' yabwIj 'ej ghu' Dalmo' buDnISDI' yabwIj
buDchoHqangbe'. ghu' Dalvo' narghmeH tlhIngan Hol lo'.
QI'lopHeymo' DalchoH yaHwIj. DaH Qu'na' vIHutlh. jImob. poH
vInatlh neH. vaj not qet yabwIj.
'op mu'mey vISamnIS 'e' vIchID. jatlhwI' vIHutlhmo'
jIja''eghlaH neH. mu'mey law' vIqelbe'. jatlhchugh latlh
vaj mu'mey law' vIqelnIS 'ach jIja''eghDI' mu'mey motlh neH
vIqaw. yap. 'ach mIwvam vIlo'DI' laHwIj vIDubbe' 'e' vIpay.
vaj naDev QIn vIqon 'ej vIlab. chaq QInvam laD latlhpu' 'ej
chaq loQ QubmoH. ghaytan ram.
qaStaHvIS wa' yIn qubqu' latlhpu' choHmeH 'eb. ngeDbe'
Qu'vam. chay' taghlu'? chay' ta'lu'?
DaH murI' parmaqqaywI' chu'. Soj ghaj 'ej muje'qang 'ej
lut'a' much wIbej neH ghaH. mubelmoHta'. vIbelmoH vIneH.
vaj DaH jImev 'ej jImej.
pItlh.
SarrIS