tlhIngan-Hol Archive: Thu Sep 23 13:42:13 1999
[Date Prev][Date Next][Thread Prev][Thread Next]
Rome
- From: [email protected] (Christiane Scharf)
- Subject: Rome
- Date: Thu, 23 Sep 1999 22:35:53 +0200
*Rome* veng vISuchpu'. jav Hu' jIchegh 'ach Qu'meywIj law'mo' wej leng
vIDellaH. toH, DaH yapba' poHwIj. vaj bIQoy DaneHchugh yI'Ij!
wa'maH cha' Hu' lupwI' wItIj jIH latlh HaDwI'pu' je. qaStaHvIS ram *Rome*
lurgh ghoS lupwI'.
wa'maH wa' Hu' pemjep vengDaq mapaw. lupwI'Daq jIQonglaHbe'mo' loQ jIDoy'.
mebpa'meyDaq tepmaj wIlan. loQ veng botlhDaq mayIt. mebpa'mey DIghoSqa' 'ej
pa'mey DIDabchoH. QIvbe' pa'mey. nIvbe', 'ach QIvbe'. mamejqa'. letlh
*Spanish* *Trevi* ngengHomHey je DIlegh. 'uQ wISopmeH *Pizzeria* wISam jIH
jupwI' puS je. le'be' ram. chuSmo' Hur jIQongbe'qa'.
wa'maH Hu' veng botlh wInuDchu' 'ej maHvaD *Roman* qach chuvmey QIjlu'.
paSDI' rep *Piazza Navona* wIghoS. Hoch tI'lu'law'taHmo' Dojqu'be'. letlh
*Spanish* wISuchqa'. 'op nuvpu' DIqIH. majatlh. 'uQ wISopmeH Qe' wISam. 'ey
Soj 'ach wagh. qaStaHvIS ram Do' jIQonglaH.
Hut Hu' wutlh lupwI' (Metro) wIlo'. *Ara pacis* wIghoS. latlh Dochmey je
DIlegh. *Tiber* bIQtIq retlhDaq mayIt. *Tivoli*Daq nuqeng lupwI'maj.
*Hadrian* voDleH juH'a' chuvmey DISuch. tInqu' qachvam. pa' 'IH Hatlh.
macheghpu'DI' letlh *Spanish* wIghoSqa', wa' jupwI' vuQchu'mo'. mebpa'mey
DI'elqa'DI' paSqu' rep. Do' bepbe' ghojmoHwI'pu'. ghom Quch lucherpu' chaH
latlh HaDwI'pu' je. mapawDI' qaSlI' ghomvam. pa' loQ maba' 'ach tugh
QongDaqDaq maQot.
chorgh Hu' *Therme di Caracalla* *Domitilla* wutlh mol Daq (catacombs) je
DISuch. Doj mol Daqvam. tlhoS wa' ghojmoHwI' wIchIl: He muj ghoSchoH ghaH.
Do' (Do'Ha'?) HeDaj botlaH latlh ghojmoHwI' 'ej He lughDaq Dev. vaj jajwIj
DalmoHlaHtaH ghojmoHwI'vam wa'. pov *Ostia* veng tIQ wISuch. Hemey ngo'
DIghoS. letlhmey ngo' DItoS. Daj Daqvam. tugh bIQ'a' retlhDaq maH. HoSqu'
SuS. *Rome*Daq maSaHqa'taHvIS 'uQ mach wISop. pay' SISqu'choH. bIQ'a'
SISlaw'. vaj mebpa'meyDaq maHtaH. latlh He DopDaq mebpa'mey lutu'lu' je.
QorvaghDaq maQamtaHvIS mebpa'meyvetlh mebpu' puSvaD majatlh. nuSuch 'e'
luwuq. *Denmark* luDab chaH. letlh pa'Daq maghom, pa'meymaj 'el chaH 'e'
chaw'be'lu'mo'. pa' maba'taHvIS 'ej majatlhtaHvIS paw mebpa'maj mebpu'
DISovbe'bogh. *Wacken* QoQ yupma' yIvbeH tuQmo' wa', ghaHvaD jatlhchoH
jupwI'. vaj letlh pa'Daq ratlh je yIvbeHvam tuQwI' juppu'Daj je. *Germany*
nganpu' chaH. tInchoH ghommaj taQ. paSchoHmo' rep Do'Ha' paw wa'
ghojmoHwI'maj. jatlh <naDev Sughom 'e' yImev. ghoghoS.> vaj mebpa'mey
'ay'maj wIghoS. pa' ghom Quch tu'lu' je. vaj majeS. nI' ram.
Soch Hu' mebpa'vo' mamej. lupwI'majDaq tepmaj wIlanta'DI' *Vatican* wISuch.
tInqu' chIrgh. law'qu'mo' SuchwI'pu' chIrgh rurbe'; *airport* rur. qaStaHvIS
pov Suy Daqmey DIghoS. qaSpu'DI' rep puS maghomqa' Hoch 'ej lupwI'maj wItIj.
juH yoS wIghoSqa'.
jav Hu' juHDaq mapaw.
pItlh.
HovqIj