tlhIngan-Hol Archive: Wed Mar 10 09:33:54 1999

Back to archive top level

To this year's listing



[Date Prev][Date Next][Thread Prev][Thread Next]

muD Dotlh



qaStaHvIS jajmey law'qu' ngachtaH cha' qabDu'.
Holvam wItIv 'e' nISba'.  vaj jIbup.  DaHjaj jIghoHQo'.
wej jIQochbe', 'ach jIghoHbe'.

pab chutHey vIbuSHa'chugh, DaH nuq vIqel?
toH, yoSwIjDaq DajchoHpu' muD Dotlh.
tlhIHvaD vIDel.

cha'Hu' ram peDchoH.  nom vI' chuch qut chIS.
nom ngab yav.  tugh chIS Hoch 'ej Hab.
wa'Hu' po pagh vI' jav 'uj Saw' chuch.
jIvemDI', loQ DujwIj mollu'pu'.
mejmeH He lubotchu' vI'pu'bogh chuch qutmey.
vaj yaHwIj vIghoSmeH chuch vIbI'nIS.
'ugh chuch qutmey yIQ.
ngeDbe' bI'meH Qu', 'ach qut vIbI'pu'bogh cheghmoHbe' SuS.
qaStaHvIS wejmaH tup jIbI'lI'.  Do' mach juHwIj vergh.

HuvDI' mejmeH He, yaHwIj vIghoS.
ghay'cha'!  yaHwIj vergh yotlh tebchu'taH chuch qut jay'.
bI'ta'be' ngoy'wI'pu'.  ghIHqu' yotlh.  
chuchDaq ngaDHa'law' Hoch Dujmey.

wa'Hu' pov chuch qachHom luchenmoH be'nalwI' puqloDwI' je.
tInbe' qoD 'ach puq ngaSlaHchu'.  
latlh vIchenchoHmoH.  tInchoHpu'pa' jIDoy'choH 'ej jImev.
chaq DaHjaj vItInqa'moH.

wa'Hu' verghDaq tetchoH chuch.
DaHjaj ghu' QaQ law' wa'Hu' ghu' QaQ puS.
Huv chal.  Dach 'eng.  pe'vIl wew pem Hov.
bIrtaH muD 'ach loQ tujmo' Hemey QaDchoHlaw'lI'.

muD bIr vIparHa'.  Soj wIHutlhbe'.  tuj juHmaj.  maropbe'.  QaQ yIn.
('ej chaq muyaj Hoch.  ghaytan Qap Hol.)

-- ghunchu'wI'



Back to archive top level