tlhIngan-Hol Archive: Tue Jun 22 19:03:52 1999
[Date Prev][Date Next][Thread Prev][Thread Next]
Re: pabpo'
- From: "William H. Martin" <[email protected]>
- Subject: Re: pabpo'
- Date: Tue, 22 Jun 1999 22:05:20 -0400 (Eastern Daylight Time)
- In-Reply-To: <[email protected]>
- Priority: NORMAL
On Tue, 22 Jun 1999 15:50:52 -0400 David Trimboli
<[email protected]> wrote:
> choquvHa'moHpu'be'. *weekend* QaQ vItIv je jIH, vaj chotIchlaHbe'
> QaghlIj. qay'be'.
>
> SuStel
> Stardate 99473.8
maj. toH juppu'vaD *weekend*meymaj DIDelnIS. jItagh.
loSHu' wa'maH vaghvatlh wejmaH rep yaHvo' jImej. qaStaHvIS jav
rep jIleng. 'uQ vIbuSHa'. nom jaH DujHomwIj. tlhoS mujon He
'avwI''a'. nom jIjaHqu'mo' jIbIvba' 'e' leghba' 'avwI''a'vam.
wovwI' SuD chu' ghaH 'ej He Dopvo' mughoS. poSDaq jIchIj. nom
mujuSqu' 'ej jaHtaH. HopchoHmo' ngab. tugh vIlegh. latlh maSlaw'
jonmo'.
jIQuchtaH.
jImI'chu'. jIQong.
wejHu' po 'eq jIvem. jISay''eghmoH. jItuQ'eghmoH. nIQ'a' vISop.
chu'chu'wI'pu' vItlhegh 'ej QoQ 'ey wImuch. jIpaSmo' megh
vIpIHbogh vISopbe'. nargh 'eb, 'ach paw 'eb chu'. mutlhob be'
'IHqu'. jatlh <<Ha'! megh yISop. HItlha'!>>
jIghung. jIghoHQo'. maSop.
pongDaj 'oH *Paula*'e'. tIq jIb 'ej Doq.
machegh 'ej mamI' Hoch. Hur 'uQ le' wISop. mamI'qa'.
mamI'lI' ramjep 'e' wImev. lopno' pegh vISam. *sushi* HIq je
lujablu'. 'ey.
*sushi* vISopqu' 'ej *champagne* vItlhutlh. vItlhutlhqa'.
HIvje'a'Daq jIHvaD *saki* jablu'. HoSghaj. vItlhutlh. loQ jIDoy'
'ej loQ jIchech vaj pa'wIj vIghoSrup. *elevator* vIloSlI' 'ej
HIq Doq tlhutlhbogh nuv vIlegh. jIjatlh <<HIq Doq? HIq Doq?
lopno'Daq HIq Doq vItu'be'! nuqDaq HIq Doq 'oHtaH?>>
lopno'Daq jIchegh. HIq Doq mujab *Chuck*. jItlhutlhtaHvIS HIqvam
naD *Chuck*. qar. naDna' qotlh HIqvam.
rInDI' HIq Doq *tawny port* vItlhutlhnIS 'e' chup *Chuck*.
jItlhutlhlI'. 'eychu'.
HIq'a'vam vItlhutlhtaHvIS paw *Paula*. yuch'a' [truffles] qeng.
*tawny port* tlheghchu' yuch'a'vam'e' vutta'bogh *Paula*. QaQ
yIn.
HIq Qav chup *Chuck*. *port* le'qu' 'oH. law' pugh. pugh teqmeH
nav *towel* lo' *Chuck*. QIt lIch. nIv HIqvam.
loSvatlh rep pa'wIjDaq jIchegh. jIQongchu'.
chorghvatlh rep jIvemchoHchu'. jIloprupqa'bej. motlhbe' ghoghwIj
'ach jIpIvba'. jISay''eghmoH. jItuQ'eghmoH. nIQ vISop.
wa'maHvatlh rep jImI'qa'. megh vIbuSHa'. jImI' wa'maH vaghvatlh
rep 'e' vImev. qaStaHvIS jav rep juH vIghoS.
jIlengtaHvIS SISmo' 'ej jImobmo' loQ jI'IQtaH, 'ach jIQuchtaH
vIneH 'ej yabwIjDaq jIghob. jIQuchqa'.
pItlh
charghwI'