DaHjaj chegh be'nalwI'!

[Alan Anderson <aranders@netusa1.net>]

qep'a' vIghoSmeH, Hut Hu' juHwIjvo' jItlheD.  lalDan DuSaq ghoSmeH 
be'nalwI', jaj veb juHvo' tlheD je ghaH.  lalDan yaSHom mojmeH HaDlI'
qaStaHvIS chorgh jaj.  wej Hu' loQ ghaH vISuch.  veng Hop vIghoSmeH
qaStaHvIS wej rep jIleng.  qaStaHvIS wej rep matay'.  juH vIghoSqa'meH
qaStaHvIS wej rep jIlengqa'.  jImaw' qar'a'?  'ach le'qu' jajvetlh. 
cha'maH ben qaSpu'mo' "kiss"-maj wa'DIch, maghom wIneH.  poHDaj jonlI'
DuSaq vaj Do'Ha' ngajnIS wanI'.  DaHjaj rInmo' DuSaq DaH juH cheghlI'.
jISeybej.  tugh maqatchuqqa'laH...

jImob, Dachpu'mo' je puqloDwI'.  qaStaHvIS Hogh SoSnI'Daj juHDaq
DablI'.  juHwIjvo' pa' ghoSlu'meH wa' rep poQlu'.  cha'Hu' murI'. 
jatlh <vavoy jIQuchbe'.  jIQonglaHbe'.  jI'IQ.  naDev qetlhchoHpu'
Hoch.  juHDaq jIHtaH vIneHqu'.>  ghaH vItungHa' 'e' vInID.  wa'Hu' 
ghaH vISuch.  matay'taHvIS ghaH jIH SoSnI'Daj je 'uQ wISop.  ghaytan 
DaH pa' pawta' be'nalwI' 'ej SoSDaj SuchlI'.

DachtaHvIS be'nalwI' jIQongchu'be'.  DaH jIDoy'qu'.  loQ jIroplaw', 
jIQongta'be'mo'.  jIQotrupchu' ma'uchchuqtaHvIS.  jInajchoH...

-- ghunchu'wI' 'utlh