tlhIngan-Hol Archive: Thu Jul 29 14:20:14 1999

Back to archive top level

To this year's listing



[Date Prev][Date Next][Thread Prev][Thread Next]

qep'a' vIqaw



toH. qep'a'vo' jIcheghta' 'ej DaH tlhIngan Hol vIjatlhqa'laHchu'pa' wa' DIS
vIloSnIS. 'ach jI'ItQo'. Dun Holmaj, 'ej lo'meH 'ebmey law' vItu'bej.
jIbuDbe'chugh vaj 'ebmey vIqaSmoHlaH.

wej qep'a'meyDaq jIjeSta', 'ej Dun Hoch. yInchu'lI' Holmaj 'e' vIleghDI',
muDuQ ghu'. 

wa' jaj, megh nejlI' ghom tIn (wa'maH cha' ghotpu'). mebpa' qachDaq
*Italian* Qe' tu'lu' 'e' wIHar ('ej 'e' lu'ang mebpa' De' navmey), 'ach
Qe'vam wISamlaHbe'. jabwI' vISam 'ej vIghel. jIjatlh <nuqDaq 'oH *Di Napoli*
Qe''e'?>. mujangmeH jabwI' jatlh "Di Napoli? Oh, that's closed.". ghay'cha'.
vaj qa'vIn Qe' wISam 'ej pa' maSop. Qe'mey DIqeltaHvIS, tlhIngan Hol neH
wIjatlh. DIvI' Hol wIlo'be'. nIvbe' megh wISambogh, 'ach wISammeH tlhIngan
Hol neH wIlo'mo', Dun wanI'.

*Star Trek Experience* wItIvqu'. tlhInganpu' DIDamo' taQ. DIvI' DawI'pu'
DImerqu'. nuleghDI' wa', yay'chu'mo' jatlhlaHbe'law'. be'nalwI'vaD tlhIngan
*teddy bear* vIje'.

Qujmey DIQuj, qaDHommey DISIQ, bommey DIbom, maja'chuq 'ej wItoblu'.

rInDI' qep'a', muDDuj ngIp Qov 'ej puvmoH. ra'bogh DeghwI' Da. cha' raQpo'
lup 'e' noH. jIH, ghunchu'wI' je juwIvmo' maDo'ba'. Hoch ta'taHvIS Qov,
qu'bej, 'ej puvtaHvIS, po'qu'. leng vItIvqu'.

SKI: pagh had fun at qep'a'.


pagh
Beginners' Grammarian

tlhIngan Hol Mailing List FAQ
http://www.bigfoot.com/~dspeers/klingon/faq.htm



Back to archive top level