"Las Vegas" lengwIj wa'DIch

[Alan Anderson <aranders@netusa1.net>]

wa'maHHu' Las Vegas ghoS qorDu'wIj.  tlhetlhmeH leng, "Atlanta"-Daq
mayevnIS.  "Delta" lIghlu'DI', reH "Atlanta" SuchnISlu'law'.  pa' 
maloStaHvIS, jup vIqIH.  De'wI'mo' jupvam vISov.  pIj "TinyTIM"-Daq
mareH.  ja'chuqmeH "MUSH" 'oH "TinyTIM"-'e'.  Quv DaSov DaneHchugh, 
HIrI'.

"Las Vegas"-Daq chol qorDu' law'.  ghomqa' tuq.  javmaH nuv maH, vaj 
roD wa' pa'Daq matay'be'.  wa'logh neH ghomchu' Hoch:  Wednesday 'uQ 
wISopmeH, Qe' ghommeH pa' wIDan.

motlh reH qorDu'wIj mach.  rut nutlhej latlh qorDu' mach.  cha' puqpu'
ghaj be'nI'wI'.  puqloDwI' luparHa' puqpu'vam vaj pIj nutlhej luneH.

much'a'mey DIbejpu'be'.  bIQ Duj may'qoq wIlegh.  vaHbo' ngeb 
tlhuDbogh HuDHom ngeb wIlegh.  "Tiger" chIS wInej 'ach wISambe'. 
"Circus" muchHommey DIlegh -- Doj 'ach le'qu'be'.  bebHey ghaj wa' He 
'ej He DungDaq choS much Daj wIbej.  cha'choH wewwI' nguv.

"Star Trek: The Experience" vItIvqu'.  bey' law' vIlegh.  Dajqu' 'e' 
vIQub jIH.  Sut luch je vItIvbej.  wa' mu'tlhegh jatlhDI' "Commander 
Riker" jImon, 'ej ghaytan luQoy'DI' Suchbogh tlhInganpu' Haghchu'. 
toH, chaq Haghbe' -- chaq jach. :-)

loQ jISuD.  janvaD DeQ vInob.  leQ vIchu'.  DIng cha'bogh ghomey.
mevDI', chaq jIQap.  roD jIluj.  jIreHtaHvIS cha' DeQ vInob.  rut 
DeQHom puS vIHev 'ej vInobHa'.  jImevDI' chuv wa' DeQ.  qay'be' -- 
wa' DeQ neH vIlon, 'ej qaStaHvIS wa' rep wanI' vItIvqu'.

tuj "Las Vegas" muD.  wovqu'.  not chalDaq 'engmey vIlegh.  pa' bIQ
poQbej yItwI'.

latlh De' vInob net tlhobDI', jIjangbej.

-- ghunchu'wI'