tlhIngan-Hol Archive: Thu May 28 10:57:28 1998
[Date Prev][Date Next][Thread Prev][Thread Next]
jIqughta' 'e' vIDel
- From: [email protected] (Alan Anderson)
- Subject: jIqughta' 'e' vIDel
- Date: Thu, 28 May 98 12:27:07 EST
SochHu' qaS tlhoghwIj qoS. wa'maH vagh ben jISawta'.
Hoch vagh tera' DIS poH malopmeH jIH be'nalwI', maqugh.
vaj puqloDma' luQorgh SoSma' 'e' wIpon 'ej lengmaj wInab.
wa'maH ben "Western Caribbean"-Daq maqugh.
vagh ben "Alaska"-Daq maqugh.
"Eastern Caribbean"-Daq maqughnIS 'e' wIwuq.
pIm DISvam wanI'. maqughmeH Richard Simmons wItlhej.
lutlhej je wejvatlh vaghmaH latlhpu'.
wa'SaD raQpo' qeng qughDuj 'ach Richard Simmons SaHbe' HochHom.
vISaHbe' je jIH 'ach ghaH parHa'mo' be'nalwI' 'oy'Hey vISIQ.
lengvaD "Cruise to Lose" ponglu'.
Hoch jaj ngI' 'e' lujuv jeSwI'pu'.
tenDI' cheb law' law' tenHa'DI' cheb law' puS 'e' luHechlaw'.
Qap ghot law'. Qapbe' ghot puS. QapHa' pagh.
Hoch po mI' Simmons pabwI'pu'. Hoch pov pe'vIl mI'.
Hoch jaj lurDechDaj luQoy. SoptaHvIS qIm 'ej yep.
wej puH DISuch. "Puerto Rico"-Daq pagh wIta'.
"St. Thomas"-Daq ma-"snorkel". pa' 'IHqu' bIQDep!
"St. Maarten"-Daq lupwI' wIlIgh.
machbej puHvetlh -- wIbavta'meH cha' rep neH poQlu'.
DuSaQDaq jeStaHvIS be'nalwI', DujDaq jIyIt.
rut ravDaq Huch vItu'. jISuDmeH Huchvetlh vIlo'.
pagh DeQwIj vInatlh. cha' DeQ vISuq.
-- ghunchu'wI'