tlhIngan-Hol Archive: Mon Jun 29 17:22:36 1998
[Date Prev][Date Next][Thread Prev][Thread Next]
qepHom vIDevpu'
- From: "Andeen, Eric" <[email protected]>
- Subject: qepHom vIDevpu'
- Date: Mon, 29 Jun 1998 17:16:34 -0700
loSHu' qepHom vIDev. Qaplaw'mo' jIbel.
*Arizona State* DuSaQ'a'Daq qaS. majeS jIH, jav latlh je. DuSaQ'a'Daq
vum qoj HaD HochHom jeSwI'. HolQeD HaDtaH *Teresa Wells*. ghaytan naDev
ghaH qawlu'. chaq HolQeD luHaD latlh; jIqawbe'. yInQeD luHaD cha'.
yaHwIjDaq vum wa' jeSwI' 'ej jeSmo' ghaH loQ jImer. *Teresa* yaHDaq
maghom.
raSDaq jIba'. jItaghmeH, tlhIngan Hol qun vIDel. paSmo' cha' jeSwI'pu'
cha'logh jItaghnISqa', 'ach qay'be'. *Marc Okrand* ghItlhmey vI'ang.
tamey vIqembe' 'ach vIDel. tlhIngan Hol yejHaD vIDel 'ej HolQeD, jatmey,
Hamlet je vI'ang. qaSpa' qepHom <tlhIngan Hol ghojmeH jo> ghItlhHom
vIqon 'ej HochvaD vInob.
tlhIngan Hol QIch vIDel. pa'Daq chISbogh nagh beQ tu'lu' 'e' vIpIH, 'ej
vItu'be'mo' loQ jImogh. jIghItlh 'e' vIHechpu', 'ach jIghItlhlaHbe'.
qay'be'. jItaH. rut muQaH *Teresa*. pupbe'bej QIchwIj, 'ach Qaplaw'. <Q>
vIDelDI', <veD moQ rur> jatlhlu' {{:-)>
loQ pab vIDel. OVS vIQIj. moHaqmey puS vImuch. muqun wa' jeSwI'. <puq
qIp vay'> lurur HochHom chovnatlhmeywIj. reH puq qIplu'. vaj puqvaD pung
vInob. mojaq <-vaD> vIQIjmeH, <puqvaD paq vInob> vIwIv. 'ach puq
vIjoy'qa': mojaq <-Daq> vIQIjmeH <puqDaq pu'wIj vIbaH> vIwIv.
romuluS HIqHey qaghHey je ghaq *Teresa*. matlhutlh 'ej jIjach <'IwlIj
jachjaj>. <'oy' DaSIQjaj> <reH HIvje'lIjDaq 'Iwghargh Datu'jaj>
<QuvlIjDaq yIH tu'be'lu'jaj> je vImuch. Hoch HaghmoH mu' <yIH>.
qaSpu'DI' qep'a' latlh qepHom vIDev 'e' vIpIH. jeS luneH cha' HolQeD
HaDwI'pu', 'ach Dach. cheghqang 'op jeSwI'pu' 'e' vItul.
pagh