tlhIngan-Hol Archive: Wed Oct 29 09:54:53 1997

Back to archive top level

To this year's listing



[Date Prev][Date Next][Thread Prev][Thread Next]

Re: yabwIj Hotlhlu'



wejHu' yab QelHey wISuch qorDu''a'wIj.

maSaH jIH, be'nalwI', puqloDwI', vavwI', SoSwI', vavnI'wI', be'nI'wI',
be'nI'wI' loDnal, be'nI'wI' puqloD Qup, be'nI'wI' puqbe' Qupqu', 
be'nI'wI' cha'DIch je.  
SaH neH be'nI'wI' wa'DIch puqpu'.  yabDu'chaj luHotlhlu'be'.

pImba' be'nI'wI' loDnal 'Iw.  yabDaj Hotlh neH Qel 'ach meq vISovbe'. 
'ach qay'be'; maDIlbe'taH maH. :-)

mapawpa' wanI' QIjchu'be'ta' SoSwI'.  ropyaH wISuch 'e' vIpIH. 
<yab Hotlh> jatlhtaHmo', jan tIn lo'nISlu' 'e' vIpIH.  "PET scanner" 
vIpIH.  'ach mapawDI', jImer.  jIyajHa'ba'.  ropyaHDaq maHbe'taH. 
qach machDaq maHtaH.  [wejlogh nom mu'tlheghvetlh yIjatlh! :-)]

yabmaj Hotlhqu'be' QelHey.  yab 'ulHom juv neH neH.
nachwIjDaq cha' baS rarwI' lan.  qoghwIjDaq wa' rarwI' lan je.
jan mach chu'.  jan SeH De'wI' motlh.  De'wI' jIHDaq yab De' Hotlh.
"EEG" lutlh 'oH neH.  qaStaHvIS vagh tup nach DIr Say'moHlI' 'ej
jan rarlI'.  rarchu'meH taS jeDqu' lo'.  Humbe', 'ach ghIHqu' jay'.
qaStaHvIS wa'maH tup yab De' qonlI' 'ej chovlI'.  qaStaHvIS vagh tup
rarHa'lI' 'ej nach Say'qa'moHlI'.  jatlh QelHey 'e' tIvlaw'.
pIj lumlaw'taHvIS pagh ta'lI'.  poH lo'Ha'law'.

malaw'mo' rep law' poQ mIw.  chorgh nuv chov QelHey.  cha'logh
puqloDwI' yab juv.  po yab Hergh ghuppa' ghaH juv.  pov QaptaHvIS yab
Hergh juvqa'.  Daj De'; yab choHmoHba' Hergh.

vavwI' yab rurchu' yabwIj.  loQ rur be'nI'wI' wa'DIch yab.
rurbe'qu' SoSwI' yab!  (pImqu' je be'nI'wI' cha'DIch, 'ach ngoDvam pIH
Hoch.  taQ ghaH. :-P)  loQ quplaw' vavnI' yab, 'ach Qapchu'taH. :-)
pImchu' be'nI'wI' loDnal yab.  yab SIghba' no'.

vaj mIw wISIQta'.  chaq ghu' luyajlaH Qelpu' 'e' boQ.  chaq boQbe'.

-- ghunchu'wI'



Back to archive top level