tlhIngan-Hol Archive: Tue Oct 28 11:36:08 1997
[Date Prev][Date Next][Thread Prev][Thread Next]
yabwIj Hotlhlu'
- From: [email protected] (Alan Anderson)
- Subject: yabwIj Hotlhlu'
- Date: Tue, 28 Oct 97 12:58:08 EST
<buSlaHbe'ghach/vIHnISghach yabrop>* DaSov'a'?
yabropvammo' loQ qay' puqloDwI'.
yab Hergh Soppu'be'chugh, qImlaHbe'. HaDlaHbe'.
reH vIHqu'taHmo', pIj latlhpu' nuQchu'.
DIng. DeSDu'Daj joqmoH. quSDaq yoy. yeqQo'.
chuS. ghItlhlaHbe'chu' -- ghItlhwI' jaDtaH.
DuSaqDaq HaDwI'pu' Suj. ghojmoHwI' nIS.
valbej ghaH. Doch law' ghojlaHba' 'ej qawlaHchu'.
'ach yabropDajmo' SovDaj toblu'be'. Dajlu' neH.
vaj Hoch po yab Hergh SopnIS. "Ritalin" DaSov'a'?
Dojqu' Herghvam. 'oH ghup puqloDwI'. qaS wa'maH tup.
jotchoH ghaH. qImlaHchu'. ba'laHchu'. jIjchoH.
tamchoH. ghItlhlaH. Do' QIpchoHbe'.
'ach loQ SenglaH je Herghvam. ghungbe'moH. Qongbe'moH.
vangchoHpu'DI' Hergh, Sopqangqa'pa' puqloDwI', qaSnIS loS rep.
QongchoHlaHpa', qaSnIS jav rep. vaj motlh DuSaqmo' neH wInob.
Qap Hergh 'e' mevDI', HaDmeH ghaH wI'avchu'.
vIHnIS 'e' wIchergh. pIj mamogh jIH ghaH be'nalwI' je.
vavmo' SoSmo' joq chen yabropvam 'e' Qub 'op yab Qel.
ngervam lutob 'e' lunIDmeH, qorDu'mey chov luneH.
jInmolvaD QaQlaw' qorDu'wIj.
cha'Hu' nab Daj wISIQ. wa'leS 'oH vIDel.
-- ghunchu'wI'
* Attention Deficit/Hyperactivity Disorder