tlhIngan-Hol Archive: Fri Nov 14 11:42:30 1997

Back to archive top level

To this year's listing



[Date Prev][Date Next][Thread Prev][Thread Next]

Re: peDtaH 'ej jIQuch



wa'maH cha' Hu' peDchoH muD.
peDtaHqu' 'e' buq chal.
loQ taDchoH Hemey.
'ach ngaj wanI'.
qaStaHvIS wej rep jISey.
'ach qaSpa' choS qetlhqa' muD Dotlh.
nom tet Hoch.  SIbI' ngabchu' chuch.

wa'Hu' choS peDqa'taH.
vI' qutHommey.
(qutHommey bIH 'e' vIHar.  
 napHa'ba', 'ach bIH ram law' qutna' ram puS.
 motlh 'IH je, 'ach 'IHnISbe' qut.
 Sub qutna'.  ngI'be' qutHom.)
nom yavDaq pormey vIbI'pu'be'bogh luSo'.
DaHjaj jajlo', wejmaH vatlhvI' 'uj Saw' ngupHey chIS tuQtaHbogh yuv.
pa'na' 'oHbe'mo' DujwIj vergh'e', Duj Som vIHuvmoHnIS.
jIbepbe' -- Dun ghu' 'e' vIHar jIH.

DuSaQ ghoSmeH puqloDwI', lupwI' lIgh.
lupwI' ghoSmeH, yavDaq yItnIS.
DaHjaj chuchDaq yItnISlaw'.
ghaH vIQorghmeH, He mach vIHuvmoH.
Qu'vam vItaghpa', DujwIj QuQ vIchu'.
vaj tujchoHlI' Duj qoD, chuch vIbI'taHvIS.

pov loQ choHpu' muD Dotlh.
QIt tetqa'taH chuch qutHommey.
'ach DaHjaj, wa'leS, cha'leS je peDqa' net pIH.

jIQuchbej.  DIS 'ay'vam vIparHa'!
qul vISuqchugh, 'ej tlhutlhmeH yuch tuj vISuqchugh, vIparHa'qu'.
be' 'IH vIghaj; latlh vIpoQbe'. :-)

-- ghunchu'wI'



Back to archive top level