tlhIngan-Hol Archive: Wed Mar 26 09:38:46 1997
[Date Prev][Date Next][Thread Prev][Thread Next]
HoghwIj vIDeltaH
- From: [email protected] (Alan Anderson)
- Subject: HoghwIj vIDeltaH
- Date: Wed, 26 Mar 97 10:30:19 EST
DaH tagh jaj loSDIch QonoS.
mavemtaHvIS jIH be'nalwI' je 'eqqu' rep.
loS vatlh rep Hurghqu' chal 'ej tamqu' veng.
lupwI'Hommaj ru'Daq tep wIpoQbe'bogh vIghoD.
qaStaHvIS cha' ram maDach 'ach mebqach retlhDaq verghtaH lupwI'Hom.
lIy vIleghqa'meH chal vInuD. Hurghbej chal, 'ach vengmo' wew muD.
cha' Hov neH vIleghlaH; narghbe' lIy.
lupwI' wIloSlI' maH cha' latlh je.
maba'. majatlhbe' -- maHobtaH. :)
paw lupwI' 'ej wItIj. ghoSqa'.
qaStaHvIS rep qach SarDaq QIt tIj latlhpu'.
"Miami"-Daq mapawtaHvIS, qaSchoH jajlo'.
lupwI'vo' matIjHa' 'ej qach Dal wI'el.
navmaj lunuDlu' 'ej bIQDuj tIjmeH chaw' DISuq.
chalDaq SallI' pem Hov. boch bIQ'a'. Say'law' bIQDuj.
Dun muD. leng wItIvrupbej.
matIjDI' SIbI' nIQ wISopchoH.
nIvbej nIQvam'e'. nIQ'a' 'oH.
wejlogh HIvje'wIj teb naH bIQ jeD!
naH Ha'DIbaH tIr je lujablu'.
Sojmo' mayonchu'.
Duj 'o'Daq maQot 'ej maleS. tuj po 'e' wItIv.
ghoSchoH bIQDuj 'ej verghvo' tlheD.
jatlh HoD: jav rep poQ leng 'e' vIpIH.
Dungvo' QoQ Qoylu'. wItlha' 'ej tachHom wItu'.
Habqu' bIQ. vIHbe'law' Duj.
SuSna' tu'lu'. rut loQ yIQchoH SuS.
DujDaq manej. Qat SuDmeH pa'.
cha' tach, wa' tachHom je ghaj Dujvam.
machbe' SopmeH raQpo' pa' 'ach Hoch ngaSlaHbe'.
vaj <ba'neSghach 'eq> <ba'neSghach paS> je cherlu'.
vaS wISam. pa' QoQ luchenmoH cha' ghot.
va, "dance" vImughlaHbe'mo' jImogh. qay'.
ma-"dance" jIH be'nalwI' je neH. nutlhej pagh.
nunaDmo' latlhpu' mamIS. maQaQ'a'? Huj ghu'.
tugh megh'a' wISop. maSoptaHvIS "Freeport"-Daq verghchoH bIQDuj.
tIj nuDwI'pu'. qaStaHvIS wa' rep loSnIS Hoch matenHa'laHpa'.
Dujvo' matenHa'DI', qach tIn wI'el 'ej tepmaj wISamnIS.
qo' pIm wISuchlI'mo' wInuDlu' 'ej wIyu'lu'.
pItlh -- "Bahamas" wI'el net chaw'.
ghom'a' wImojpu'. lupwI'meyDaq wIghoDlu' 'ej mebqachmey wIluplu'.
nI'choH QonoSvam. jIyev.
-- ghunchu'wI'
(taghwI'pu': QonoSwIj bomughtaH'a'?)