tlhIngan-Hol Archive: Tue Mar 25 10:23:35 1997
[Date Prev][Date Next][Thread Prev][Thread Next]
HoghwIj vIDeltaH
- From: [email protected] (Alan Anderson)
- Subject: HoghwIj vIDeltaH
- Date: Tue, 25 Mar 97 12:31:43 EST
[vIlabqa' 'e' vInID]
loQ qutlh lengmaj.
matlhongpu' malja'Hey maH.
QongmeH pa'maj DIl, 'ej <ghIQmeH vengHom 'IH>-qoq [1] wInuD 'e' wIlay'.
"Ft Lauderdale"-Daq mavem.
<ghIQmeH vengHom 'IH>-qoqDaq machIj.
nuja'pu': Hut vatlh rep Supawchugh, tlhIHvaD nIQ lablu'.
reH QaQqu' nIQ wIDIlnISbe'bogh qar'a'?
vaj Hut vatlh rep mapawchu'.
wejpuH -- QIv nIQqoqvam 'e' wItu'.
qa'vIn lablu', 'ach 'oH vItlhutlhbe' jIH.
naH Doq bIQ jeD [2] lablu' je -- maj, 'oH vIparHa'.
'ach machqu' HIvje', 'ej cha'logh vIteb net tuchlaw'.
Sojna' tu'lu'be'. *ghochabmey [3] neH tu'lu'.
vaj maSop 'e' wInID, 'ach tugh maghungqa' 'e' wISov.
much wIbej 'e' wInID 'ach ghor HaSta luch.
vaj vengHomDaq mayIt.
jIHvaD Dojbe' -- tuj muD 'e' vIpar.
Sumqu' SeS pa' qach tIn, 'ach vIpar je.
Sumqu' je Quj yotlh.
Qujvam vIQIjnIS:
ghorDaq HIvje'Hey 'oH DoS.
QujwI' DoSDaq moq mach lannIS QujwI'.
moq baHmeH naQ lo'.
tInqu' Quj yotlh. 'oHDaq yItlu'.
yotlhDaq QobHom Sar tu'lu'.
moq lungabmoHlaH ngengHom.
loQ moq jonlaH lam le'.
Sar naQmey; chenmoH baS Sor ghap.
Qujvam'e' vItIvbe' je.
vengHomvam vIpar.
pa' wa' Hogh wIje' luneH muchwI'.
maje'Qo'. QIt luwaHHa'choHmoHlI'.
maje'be'taH.
waHHa'qu' moj Hogh bID.
loQ wIqel 'ach wIje'be'.
va, wej rep wIlo'Ha'pu'.
mamej 'ej megh wInej.
maSoppu'DI' pa'Daq machegh 'ej tepmaj wIlIS.
qaStaHvIS cha' ram "Bahamas"-Daq wIQong, 'ej 'aHmaj wImachmoH wIneH.
"Ft Lauderdale"-vo' "Miami"-Daq lupwI' wIlIgh.
"Freeport"-Daq "Miami"-vo' bIQDuj tIn wIlIgh.
maDachnIS lupwI'Hommaj ru'Daq ratlhlaH 'aHmaj chuv.
po 'eqqu' maHvaD paw lupwI' 'e' wIpIH.
ja' DevwI': loS vatlh loSmaH vagh rep petlheDrup.
loQ maQonglaHbe'...
-- ghunchu'wI'
[1] ghIQmeH vengHom 'IH: "vacation resort"
[2] naH Doq bIQ jeD: "orange juice"
[3] *ghochabmey: "donuts"