tlhIngan-Hol Archive: Mon Mar 24 03:14:38 1997

Back to archive top level

To this year's listing



[Date Prev][Date Next][Thread Prev][Thread Next]

<chemvaH mughato' je>



Following up to my translation of a very short passage from Chapter 7
of `Through the Looking-Glass and What Alice Found There', here are
several longer passages from the same chapter.  Enjoy!  --'Iwvan

[...]
     <Hoch vIngeHta'!> jang ta', _Alice_ leghDI'.  Quch ghaH
'e' 'ang ghoghDaj.  <negh DaleghneS'a', ngem botlhDaq
choghoStaHvIS?>
     <HIja',> ja' _Alice_, <loSSaD vIleghpu'.>
     <loSSaD cha'vetlh Soch 'oH mI'chaj pup'e',> ja' ta',
'olmeH QonoSDaj loDI'.  <Hoch Sarghmey vIngeHlaHba', QujDaq
jeSnISmo' cha'.  cha' QumwI' vIngeHpu'be' je.  vengDaq
ghoSpu' chaH.  He yIbej 'ej wa' Daleghchugh HIja'.>
     <HeDaq pagh vIlegh,> ja' _Alice_.
     <nIv mInDu'lIj,> jatlh ta', beplaw'taHvIS.  <pagh
DaleghlaH jay'!  Dubotba' je chuq!  DaH Hurghmo' chal,
ghotna' vIleghlaHchu'be' je jIH!>
     Hoch mu'meyvam SaHbe' _Alice_.  mInDu' DungDaq wa' ghop
lanta' ghaH 'ej QIbDaq He bejchu'taH.  <DaH vay' vIlegh!>
jach.  <'ach QIt nughoStaH -- 'ej Damo' Hujqu'!>  (joDtaH
ghoSbogh QumwI' 'ej noghmo' bIQghargh rur, poSDaq nIHDaq je
ghopDu'Daj tIn joqtaHvIS.)
     <Hujbe'bej,> ja' ta'.  <tera'ngan QumwI' ghaHmo',
tera'ngan Da.  HoS 'e' 'angmeH neH Da.  _Haigha_ 'oH
pongDaj'e'.>
     <HoSmo' bangwI',> bong jatlhchoH _Alice_, <{H}mo'
vInaD.  Hujmo' ghaH, {H}mo' vImuS.  SopmeH ghaHvaD -- Hommey
'ej -- Hurgh vInob.  _Haigha_ 'oH pongDaj'e', 'ej juHDaj -->
     <juHDaj 'oH HuD'e',> ja' Quj muv 'e' tlhojbe'qu'bogh
ta', wej veng pong lI' tu'taHvIS _Alice_.  <QumwI' cha'vaD
_Hatta_ ponglu'.  ghoSmeH 'ej jaHmeH cha''e' vIghajnISbej.
ghoSmeH wa', jaHmeH wa' je.>
     <jItlhIj --> jatlh _Alice_.
     <not tlhIj tlhInganpu',> ja' ta'.
     <vIyajbe' neH,> ja' _Alice.  <qatlh ghoSmeH wa', jaHmeH
wa' je tu'lu'?>
     <qaja'bej,> ja'qa' ta' boH.  <qemmeH 'ej qengmeH
cha''e'' vIghajnIS.  qemmeH wa', qengmeH wa' je.>
     lupvam paw QumwI':  wa' mu' jatlhlaHbe', narghpu'mo'
tlhuHDaj, 'ej ghopDu'Daj joqtaH neH 'ej ta' Do'Ha' 'etDaq
qabDaj moHqu'moHtaH.
     <{H}mo' DunaD be'Homvam quv,> jatlhtaHvIS ta', ghaH qIm
'e' mev QumwI' 'e' tulmo' _Alice_ lIH -- 'ach Qapbe' --
tera'ngan Daqu'choHtaH ghaH, pe'vIl wa' Dopvo' latlhDaq
SuptaHvIS mInDu' tIn.
     <chojotHa'moH!> jatlh ta'.  <jIroplaw' -- Hom HInob!>
     vaj mongDajDaq HuSbogh ngaSwI' poSmoH QumwI' (tlhaQqu'
ghu' 'e' tu'taHvIS _Alice_) 'ej ta'vaD Hom nob.  'oH SIbI'
pe'vIl Sop ta'.
     <Hom HInobqa'!> jatlh.
     <DaH chuv Hurgh neH,> ja' QumwI', ngaSwI' nuDtaHvIS.
     <vaj Hurgh HInob,> jatlh ta' ghogh Doy'.
     bel _Alice_, vorchu' 'e' leghmo'.  <ropchugh vay',
Hurgh rur pagh,> ghaHvaD ja' ta', yIvtaHvIS.
     <roDajDaq 'oy'naQ ghoSlu'chugh,> chup _Alice_, <qoj
ghaHvaD Dargh wIb jablu'chugh, mIwmeyvam qaq law' mIwvetlh
qaq puS 'e' vIQub.>
     <<mIwvam qaq law' Hoch Herghmey qaq puS> vIja'be',>
jang ta'.  <<mIwvam rur pagh> neH vIja'.>  ngoDvam temlaHbe'
_Alice_.
     <jughoStaHvIS, 'Iv DajuS?> jatlhtaH ta' 'ej QumwI'vo'
HurghHom tlhapqa'.
     <pagh,> ja' QumwI'.
     <HIja',> jatlh ta':  <ghaH legh je be'Homvam quv.  vaj
yItbogh pagh Do mach law' DolIj mach puS net tu'.>
     <batlh jIyIt,> ja' QumwI'.  'It ghoghDaj.  <pagh Do tIn
law' DowIj tIn puS.  DIch vIghaj!>
     <laHbe',> jatlh ta', <teHchugh, bIpawpa' paw ghaH.>
[...]
     <taghqa' 'Iv?> yu' yoH _Alice_.
     <toH, chemvaH mughato' je chaHbej,> ja' ta'.
     <ta' Degh luneHmo' ghobchuq'a'?>
     <HIja',> ja' ta', <'ej DeghwIj 'oHtaH Deghvam'e' --
ngoDvam tlhaQ law' Hoch tlhaQ puS!  Ha', DIlegh.>  'ej nom
mej.  qettaHvIS bom ngo' mu' ja''egh _Alice_:--

     chemvaH qIj ghobtaH mughato', ta' Degh luneHmo' chaH,
     veng naQDaq Haw'taH mughato', ghaH tlha'lI'mo' chemvaH.
     chaHvaD 'Iwghargh nobta' yej 'ej qagh ror nobta' qum;
     ro'qegh'Iwchab nobDI' QaS, vengvo' chaH ghImmeH ghum.

     <Degh Hev'a' -- yay -- chavbogh -- ghol?> yu'.  qetmo'
tlhuHchu' 'e' mev.
     <va, ghobe'!> ja' ta'.  <not Dogh tlhInganpu'!>
[...]
     vaj yev Hay'bogh gholpu' 'ej ba' nom tlhuHbogh chemvaH
mughato' je.  jach ta': <qaStaHvIS wa'maH tup maSop!>  SIbI'
vumchoH _Haigha_ _Hatta_ je; 'Iwghargh qagh ror je qeng
chaH.  nuDmeH wa' tlhap _Alice_, 'ach Heghpu' qagh.
     <rInlaw'pu' DaHjaj may',> _Hatta_vaD ja' ta':
<ghumlu'meH yIra' yIruch>.
[...]

-- 
"reH Sov yInej 'ej Dap yImuS,          <dOstI bA mardom-e dAnA nEkO-st,
 jagh val qaq law' jup QIp qaq puS"     do^sman-e dAnA beh az nAdAn dOst>
                 (Sheikh Muslihuddin Abu Muhammad Abdullah Saadi Shirazi)
Ivan A Derzhanski                             <[email protected]>
H: cplx Iztok bl 91, 1113 Sofia, Bulgaria <http://www.math.acad.bg/~iad/>
W: Dept for Math Lx, Inst for Maths & CompSci, Bulg Acad of Sciences


Back to archive top level