tlhIngan-Hol Archive: Wed Apr 09 20:10:22 1997
[Date Prev][Date Next][Thread Prev][Thread Next]
lIy lut
- From: DaQtIq <[email protected]>
- Subject: lIy lut
- Date: Wed, 09 Apr 1997 23:10:18 -0500
lIy vIbejlI'. maQmIgh 'oS lIy 'e' luHar tIQwI'. vIleghDI' loQ
vIyajchoH 'ej lutvam vIqon. - D
lIy lut
ben law'qu' wo' che'taHvIS qeylIS'e' lIjlaHbe'bogh vay', mangghomDaq
SuvwI' Qup tu'lu'. Dagh 'oH pongDaj'e'. tInbe' Dagh. HoSbe' 'ach
val 'ej reH batlh DataH.
yoS Hop ghoStaH mangghom. qaStaHvIS jaj puS, leng 'ach jaj law'
poQlu'. qaSDI' choS, raQ lucher. Sop Hoch 'ej Doy'qu'mo' Qong.
Doy'qu' je Dagh 'ach QonglaHbe'taH. pIjHa' Qong vaj roD juppu'Daj
'av 'ej ram chal vIbej.
ram wejDIch Qongbe'taHvIS Dagh, chalDaq vay' leghlaw'. mach. wovHa'
'ej jum. loQ bItchoH Dagh vaj jup matlh vemmoH.
<loch!> tlhup Dagh. jupDajvaD loch pong Dagh, tIqqu'mo' loch.
<jIQongtaH jay'> jang loch.
<bIQongpu'. DaH yIQam 'ej vay' yIlegh.>
<QI'yaH,> ja' loch, QamtaHvIS.
<yIlegh!> tu'meH loch, nItlh lo' Dagh. <ghochwI' mIn retlhDaq
vay' Dalegh'a'?>
<pagh vIlegh.>
<mInDu'lIj tIpoSmoH!>
<pagh vIlegh, pagh tu'lu'mo' jay'.>
chal bejqu' Dagh 'ej Qotqa' loch. qaSpu'DI' lup law', ja' Dagh,
<lIy vIleghlaw'.>
<bImaw',> ja' loch, Qongqa'taHvIS.
loch qImHa' Dagh 'ej chal bejtaH.
*
***
*
lengtaHvIS mangghom, HochvaD lIy Del Dagh. Hagh neng 'ej vaq 'ach
mang puS ghIjlaw' lIy. Hatlh HopDaq bogh mang law' 'ej lIy luHaj
lutlhwI'. maQmIgh 'oS 'e' luHar. vengDaq bogh Dagh. maQmIgh HarQo'
'ach bItchoHbej 'IwDaj.
*
***
*
qaSDI' choS, raQ lucher. Sop mangghom 'ej Qong. 'a QonglaHbe'qu' Dagh
'ej QonglaHbe'law' je mang law'. HurghDI' chal, lIy leghba' Hoch.
wovchoH 'ej tInchoH. chalDaq vIHpu'. ghochwI'vo' mej 'ej DaH latlh
HovghomDaq nargh.
lIy lubejtaHvIS, ja'chuq QonglaHbe'wI'pu'. maQmIgh 'oS'a'? qeylIS
jeylu''a'? Dej wo' 'e' 'oS'a' lIy?!
qaSpa' po, lIm mang puS 'ej mej 'e' lunID. lImwI' luHoHlu'.
*
***
*
lengtaHvIS mangghom, QongwI'pu'vaD lIyna' luDel QonglaHbe'wI'. loQ
Hagh negh. vaq mang puS 'ach loQ Hoch ghIjlaw' lIy. rejmorgh luDachoH.
Dagh ghoS bu' 'ej mangghomvo' chev chaH. Sagh bu' 'ej QeHlaw'.
pe'vIl jatlh bu': <bIqay'moH jay'!>
<pagh vIta'neSpu'.>
<'oHvaD Dagh lIy ponglu'. bIqay'moH SoH!>
<chalDaq lIy vIlanbe'neS.>
moghmo' jach bu'. jotchoHDI' bu', tamtaHvIS ja': <'arghtaH ghu'maj.
jeQHa'choH neng lIymo' 'ej wa'leS may'yotlhDaq mapaw.>
qaStaHvIS lup law', jatlhbe'. pIch ghajbe' 'e' Sovchu' Dagh 'ach
loQ ngoy' 'e' Har. <chay' chora', bu'?>
<yIjeQ, mang. chaq DughIjbe'chugh lIy, jeQqa' latlhpu'.>
<jIyajchu',> jang Dagh 'ach ghIjbej lIy.
*
***
*
qaSDI' choS, raQ lucher. Sop pagh. Qong pagh. HurghchoH chal 'e'
luloS Hoch. nom lIy wov luleghlaH. tInqu'. chalDaq ngoH DaQ tIq.
tamqu' HochHom mang. lIy lubej neH.
ja'chuq Dagh loch je. tlhob Dagh: <wa'leS bISuvvIp'a'?>
loQ Hagh loch. <ghobe' jay'. jISuvrup 'ej batlh jIHeghrup.> 'a
mInDu'DajDaq qul tu'lu'be'. <qeylISvaD maQmIgh 'oH.>
<qatlh?>
<SuvvIpmo' latlhpu'. bISuvvIp'a', Dagh?>
<ghobe' jay'.> jeQqu' 'e' nID Dagh. <mupujmoHbe' lIy. muSoy'moHbe'
lIy.> roplaw' burghDaj. <batlh jIHeghrup.>
*
***
*
wa'leS qaSchugh may', roD lop neng. 'a ramvam ba' Hoch 'ej lIy
lubej. ramjep raQDaq yIt ngup qIj tuQbogh SuvwI''e'. qabDaj So'
QIb. lIy qImHa'. neng mInDu' bej. Dagh loch je ghoS SuvwI'vam.
<qatlh Sulopbe', neng? wa'leS maSuv.> ja' SuvwI'.
jang loch: <bIleghlaHbe''a'? lIy tu'lu'!>
chal legh SuvwI', <'IH. maQmIgh 'oS net Har.>
<qar,> ja' loch, tamtaHvIS.
Dagh legh SuvwI'. <'e' DaHar'a'?>
Dagh merlu'law'. <jISovbejbe'.>
qu'taHvIS, ra' SuvwI' Hurgh, <jang, mang! Har'a'?!>
nom Qam Dagh. <ghobe', qaH!>
qabDaj 'ang SuvwI'. qeylIS ghaH! nom Qam Hoch 'ej lubuS.
chuStaHvIS, ja' qeylIS: <yIja'qa', mang.>
jach Dagh: <ghobe', qaH! maQmIgh 'oSbe'!>
<bImuj,> jang qeylIS 'ej yay'qu' Hoch mangpu'.
qeylIS qevtaHvIS neng, chaHvaD jatlhqu'. <SuvwI'pu'! maQmIgh
'oSbej lIyvam. yIlegh! chalmaj yot HujwI'vam. qaStaHvIS ram law'qu',
Hovmey bIngDaq maQong. Hovmey DIvan SuvwI'pu'. ram chal wISovchu'.
'a pIm chalvam. jumqu'. nunuQ choH 'ej nughIj choHvam. choH wIHaj.>
yev qeylIS 'ej lIy legh. <'a 'IHbej. 'ej 'IH choH. nuSeymoH choH.>
ghom'a' leghqa' qeylIS. <'Iwmaj lumeQmoH Dochmey chu'! yoS chu'
DoQlu'. be' chu' charghlu'...>
Haghpu' neng 'e' loS qeylIS. <'ej jagh chu' jeylu'!>
chuSchoH qev 'ach jatlhtaH qeylIS. <qaD chu' wIpoQ. wIpoQqu'!>
jachtaH mangghom. chalDaq batlh'etlh pep qeylIS 'ej tamchoH Hoch.
<maQmIgh 'oH Dagh lIy'e'... maQmIgh 'oH... jaghma'vaD!>
jachqa' Hoch mangpu'. jach qeylIS. jachlaw' qo' naQ, <tlhIngan maH!>
SIbI' raQvo' mej neng 'ej ramvetlh jagh luHIv. lIy bIngDaq Qap
qeylIS mangghom 'ej DaH wo' jaghvaD neH maQmIgh 'oS lIy.
pItlh!