tlhIngan-Hol Archive: Mon Apr 07 11:22:48 1997
[Date Prev][Date Next][Thread Prev][Thread Next]
"Long Island" vIghoS
- From: DaQtIq <[email protected]>
- Subject: "Long Island" vIghoS
- Date: Mon, 7 Apr 1997 14:21:52 -0400
wa'Hu' "Long Island"Daq maghomqa' jIH SuStel lo'rel je.
Hutvatlh cha'maH rep juHvo' jImej 'ej qaStaHvIS wej rep jIleng.
lo'relvaD jIja'pu' <wa'maH wejvatlh jIpaw 'e' yIpIH!> vaj jI'eq.
(roD jI'eq. juHlIj vISuchchugh, jI'eq 'e' yIpIH!)
malengtaHvIS, maqeq jIH lo'rel je. "Theodore Roosevelt" juH wIghoS.
Hoch che'wI' molmey vISuch vIneH. qaSpa' wa'Hu', cha'maH javlogh
che'wI' mol vISuch. jI'eqmo', SuStel wIloSnIS 'e' vIpIH 'ach maH
nuloS SuStel!
"T.R." juH ghoSmeH, "Bicycle" lIgh SuStel. Dojbej. "T.R." juH yoSDaq
HuD law' tu'lu' 'ej toSmeH Qatlh. (Qupba' SuStel 'ej pIv.) 'IHqu'
Hatlh. Sum bIQ'a'. Sormey qan tIn law' tu'lu'.
juH'a' wISuch. Dojqu'. mIp "T.R." 'ej 'IH juHDaj 'ej tIn. pa' 'aH
law' tu'lu'. Ha'DIbaH law' HoH "T.R." 'ej nachmey pol. nach ghoDlu'bogh
law' wIlegh.
juH'a' wISuchpu'DI', latlh qach vI'el. qachvamDaq "T.R." yIn chav je
Dellu'. woQ'a' neHqu' "T.R." 'ach reH batlh vanglaw'. puqpu'Daj SaHqu'
'ej Qorgh. ghobtaHvIS qu' 'ej mul. SuvwI'na' ghaH.
mol wISuchmeH, loQ malengnIS. vaj che'wI' molwIj cha'maH SochDIch vISuch.
Qu'wIj vIchavta'mo' malop. SuStel juHveng wIghoS 'ej Qe' machDaq 'uQ
wISop.
maSopta'DI', SuStel juH wISuch. Doj je. juHDajDaq maSaHtaHvIS, bIQ'a'
wIleghlaHchu'. Dun! 'ach Do'Ha' jImejnIS.
juHDaq jIcheghtaHvIS, SIS 'ej QIt jIleng. cha'maH cha'vatlh rep jIchegh.
jaj le' vItIvqu'.
SuStel, lo'rel: Satlho'!