tlhIngan-Hol Archive: Mon Sep 09 14:11:44 1996
[Date Prev][Date Next][Thread Prev][Thread Next]
tlhoraQ puqloDpu' lut, 'ay' wa'
- From: Terry Donnelly <[email protected]>
- Subject: tlhoraQ puqloDpu' lut, 'ay' wa'
- Date: Mon, 9 Sep 1996 16:11:25 -0500 (CDT)
(pong: tlhoraQ)
Qo'noS HatlhDaq qaStaH jajlo'. QIt chalDaq Sal juHHov. DungDaq loQ
chISchoH 'engmey puS Doq. tujchoH muD. loQ vIH SuS mach. tIr yotlh
leghchoHlu'.
tIrDaq QIt yIt wamghom. wamghomDaq loS wamwI'pu' tu'lu'.
qoghmeychajDaq HuStaH nuHmey lutlh: naQjej taj je. Sut puS tuQtaH 'ej
jIbchaj Sevbe' choljaHmey. tamqu' chaH yIttaHvIS. pay' tlhup wa':
"toH! gheD wIghos! pa', Sor ngemHomDaq." ghopDaj joqtaHvIS qochDajvaD
ra' ghaH: "SoH, nIHDaq. SoH, poSDaq. SoH, 'o'Daq. nom, nom." nuHmey
'uchchoH, 'ej Sormey DechmeH ghomHa' latlhpu'.
vIHbe'lI' wamghom ra'wI', loStaHvIS. gheD lunejlI' ra'wI' mInDu'.
vIHtaHvIS latlh wamwI', Seyqu'choH. "yItuv..., wej...," tlhup'egh ra'wI'.
DaH Sor ngemHom luDechchu'ta' latlh wamwI'. "wej, wej," tlhupqa'. pay'
DeSDaj pep ra'wI' 'ej latlhvaD jach, "Ha'! gheD jev!"
jachqu'choH Hoch 'ej nom SormeyDaq qet. Sorvo' Sup gheD: chemvaH tIn
naS. boch chemvaH Ho'Du' jej 'ej yav luHabHa' pachDu'. wamghom ra'wI'
leghta'DI' chIch ghaHvaD yov chemvaH qu'. nIteb Qam vIHbe'bogh ra'wI'.
chonnaQ pep ghaH 'ej yavDaq qamDu'Daj lIS. jachtaHvIS chemvaH, ghaHvaD Sup.
tut HoS rurtaH ra'wI', chonnaQ 'uchtaHvIS. HIvtaHbogh chemvaH loStaHvIS,
jotqu' ghaH. loQ mon.
DaH Sumqu' chemvaH. qaSDI' wa' lup, chaq ra'wI' porgh luSIjchu'
chemvaH pachDu'. 'a SIbI' qIp ra'wI'! chemvaH mong jeD mup chonnaQ 'ej
yavDaq SoDchoH chemvaH 'Iw. DopDaq chonnaQ luH ra'wI' 'ej pum chemvaH.
"yay!" jach ra'wI'.
(wej rIn lut)
-- ter'eS