tlhIngan-Hol Archive: Wed Dec 20 08:07:36 1995
[Date Prev][Date Next][Thread Prev][Thread Next]
qa'pu'
[...]
>>qatlh <lupwI'wIj> Dajatlh? qa'qoq ghajlaw' DujlIj. qatlh <lupwI'wI'>
>>Dajatlhbe'? Dumagh mu'meylIj.
>Hol lo'be' lupwI'wIj. Hol lo'be' targh je. qa' ghaj'a' targh?
[...]
mu'mey'e' qontaHbogh charghwI' ghunchu'wI' je vIlaD 'e' vItIv. Dajqu' SoQvam.
DaH qechvam qelbogh paq'e' vIlaDta'. qa' ngerHey yajmoH. ngervetlh vIQubDI',
loQ vIQochbe'. loQ qechmeyvetlh vIHar. yInwI'na' 'oH nuq'e', 'e' muSIvmoH
paq. ghaytan yInmoHlaw'bogh qa' ghaj Dochmey vay', 'ej bIHvo' pImqu'
yInwI''e' DIghovlaHbogh neH. yInwI' wIghovbe'chugh, yIn qa' joq ghajbe'ba'
'e' wIloyHa', 'ach lughbejbe'.
pIj qa' ghajwI' Dalaw' Doch vay': chaq yagh rur Duj, SojHey, leSHey je
poQlI'mo'. 'a "Soj" wIpongbe' neH, "nIn" 'oHmo' mu''e'. vaj yInHey ghaj.
chIjlu'taHvIS ra'lu'DI', loblaH 'oH. QIHmo' rIQ 'oH (vaj 'ut leH; tI'nISlu'
je). vaj qa'Hey ghaj. 'ach yInmo' qa'mo' je, nger tembogh latlh'e' buSmeH nID
HarQo'wI' mulqu': wIv ghajbe' Duj. reH lobnIS, 'ej not tlhIvqanglaH. 'a meq
qelchu'be' qechvam. reH lob 'ej toy' Duj, ghunmo' neH nuv. 'ach jaS ghunmeH
laH DIghajbej: wIvlaH qoj wuqlaH qoqpu', Sov'a'majmo' 'e' wIta'.
'ach pIm yInwI', yInbe'wI' je 'e' 'olchu'meH, nuq 'anglaH vay'? yInwI'
Dotlhmeymo' male'qu', 'a yIn ghajbe' porgh, tlhejbe'chugh je qa'. nuqDaq
yInbogh Hapvo' yInbe'bogh Hap'e' wavlu'? tay'chu' Hapmeyvam. taghDu' 'el
muDSIp, 'ej bIHvo' mejqa', 'a not yInlaw' SIp. burgh 'el Heghpu'bogh Soj, 'ej
Soj'ay' lI' pol burgh, Soj chuv noptaHvIS, taQbang mojDI' Sojvetlh. ghorgh
yIntaH Soj? 'ej yInqa''a' Soj'ay' lI''e' polbogh burgh? mISmoHbe' tlhobbogh
mu'vam. ngoD yIqel: tay' yagh, qo'Daj je, yagh Hoch latlh je. 'u' naQDaq 'ay'
bIH, 'ach luj wa' 'ay', 'u'vo' teqlu'chugh. yuQ luwuv ngan, 'ej yuQ luleHtaH
je chaH. jaS Qapbe' yInpat.
'ej SuH, yInbe'bogh qo'vo' yInwI' luchavlaHbe'mo' Hapmey, vaj 'u'vo' wa'
yInwI' le'moH wa' qa''e'. 'u'vo' tlhab qa', 'ej yInwI'mey chavchuqmeH qa'mey
ghaj Hoch. porgh yInmoHlaw' qa', pIj 'e' HarmoH lalDan, 'ej 'u' latlhDaq
tay'qu' qa' Hoch rut 'e' QIj je. 'a Qoblaw' qechvam, qaSmo' yol tay'taHvIS
QeD QubwI', lalDan HarwI' je. qechmeymo' neH Suvchuq chaH, 'ej yolvamvaD
ramlaw' batlh. vaj jeSbe' tlhIngan.
jIDoy'be': peDlu'pu'mo' juHmaj 'etvo' ngImbogh muDHap chIS vIteqnIS;
SomrawDu'wIj vIlo'qu'. jIyon.
SovlIj yIlaw'moHtaH!
--ghuy'Do