tlhIngan-Hol Archive: Thu Mar 17 21:37:05 1994
[Date Prev][Date Next][Thread Prev][Thread Next]
qaD vIjang: leng'a'
- From: Captain Krankor <[email protected]>
- Subject: qaD vIjang: leng'a'
- Date: Thu, 17 Mar 94 19:36:46 -0700
[muqaDpu'mo' charghwI', naDev 'oH lut'e' --HoD Qanqor]
leng'a'
wa'maH wa'Hey ben qaSpu' lutvam. Brandeis UniversityDaq (Waltham,
Massachusetts) qaSchoH pa' jIHaDtaHvIS.
lut vItaghlaHpa', lalDanqoqmaj SaQIjnIS. lalDan wIchenmoHpu' jIH
juppu'wI' puS je. joH'a'qoqma' pong 'oH "Amoukamouki"'e'.
Amoukamouki tIn law' joH'a'qoq Hoch tIn puS, 'ach QaQbejbe'. rut
QaQ, rut mIgh-- not Sovlu'. "arbitrary" lupong tera'nganpu'.
qaStaHvIS javmaH loS'uy' cha'vatlh Soch jaj tera' chenmoHta'
Amoukamouki, 'ej qaStaHvIS jaj javmaH loS'uy' cha'vatlh chorghDIch,
leSta'. vaj reH pawDI' jaj javmaH loS'uy' cha'vatlh chorgh "jaj'e'"
wIlop. "jaj'e'" lopmeH Soch jaj poQlu': loprupchoHmeH wej,
"jaj'e'", 'ej wanI''a'vam Dojqu'vo' ghIrmeH wej.
pIj Amoukamouki tay law' wIta'. "altar" wIghajpu' 'ej
AmoukamoukivaD "sacrifice" law' DInob. "glass bowl" chIS tupu'bogh
vay' 'oHpu' "altar"maj'e'. 'oHDaq "sacred scroll"mey
DI"sacrifice"-- "paper towel" rur bIH chIch net jech. rInDI'
BrandeisDaq DISmaj wa'DIch, "altar"maj'e' wI"sacrifice"pu' ("window"
jenvo' wIchaghta'). [NOTE: Boy, Klingon sure doesn't have the
vocabulary to talk about Amoukamoukian ritual items!]
toH, qaStaHvIS cha' DISHey Amoukamouki tay wIlopbe' "altar"
wIghajbe'mo'. vaj pay' "altar" chu' tu'pu' jupwI' Rob. naDev
qaSchoH lutwIj.
*--------<<<=======[#####]=======>>>--------*
"altar" chu' taghmeH 'utbej tay'a'. qaStaHvIS wa' ram naQ pa'wIjDaq
maloppu' jIH, Rob, bangDaj Nancy je. Dunqu' tayvelth. pawpa'
jajlo' mevlaHbe' tay; "The Priests Who Bring The New Day"
DIghomnISbej. (jaj chu' luqem lo'taHvIS "truck"mey-- ghaytan
boleghpu' 'ach "milk truck" "garbage truck" joq bIH 'e' boHar.
SuQagh. "The Priests Who Bring The New Day" chaHbej)
HeDaq TPWBTND DIloStaH Rob jIH je, 'ach pa'wIjDaq QongchoHta' Nancy
(pujmo' jay'-- 'ach jISaHbe'; Nancy DoHDI' Rob ghaH vItIvghach law'
law' tay'DI' chaH vItIvghach law' puS. tay'DI' jaS Da Rob; maw'be'
'ej tlhaQbe', yaj'a'?) paw jajlo' 'ej paw "truck"mey 'ej
"priest"pu' DIrI' 'ej QaQ Hoch 'ej rInchoH tay'a'.
DaH pona' 'oH, 'ej not maQong Rob jIH je, 'ach maSop wIneH
vaj "Dunkin Donuts"Daq maghoS 'e' wIwuq. mamejpa', nutlhej neH'a'
Nancy 'e' wIghojmeH, pa'wIjDaq machegh, 'ach vemmoHDI' Rob,
QuchHa'qu' Nancy-- chay' chuS 'e' vIQIjlaHbe'. vaj Qongqa'taHvIS
mamejta'. DujwIjDaq maghoStaHvIS, jupma' Erik ("poker" lutwIjvo'
Erik'e') wIghom-- qaStaHvIS ram naQ De'wI'Daq vumta' 'ej not Qongpu'
je ghaH-- 'ej chabHom ghomey ("donuts") SuqmeH nutlhej. vaj Soch
rep Sunday po'Daq Dunkin DonutsDaq malengchoHta'.
*--------<<<=======[#####]=======>>>--------*
Hopbe' Dunkin Donuts vaj tugh mapaw. chabHom ghomey DISuq 'ej maSop
'ej matlhutlh 'ej matIvchuq 'ej QaQ Hoch. nIQHomvam wIrInmoHpu'DI',
DujwIj wItIjqa', 'ach DuSaQDaq machegh neH pagh. 'IHqu' po vaj
maleng wIneH 'e' wIwuq. vaj Dochmey DIleghlaHbogh DIleghmeH majaH.
'ej majaH 'ej majaH 'ej matIvqu' 'ej 'IHqu' po vaj malengtaH. 'ej
Dajbogh Daq chu' DItu', vaj malengtaH. HuD jenDaq matu'egh 'ej
jenHa' 'engmey, vaj chISghach neH wIleghlaH. wItIvqu' vaj
malengtaH. pay' ghomHa'egh 'engmey 'ej Hatlh Dun leghlu' 'ej
wItIvqu'. "pov!" wIQub vaj malengtaH.
'ej pa'wIjDaq QongtaH Nancy.
toH, malengtaH 'ej matIvtaH. qaSpu'DI' rep puS He rarwI' ("bridge")
jen wItu', 'ej Dop HopDaq He retlhDaq leSmeH DaqHom tu'lu', vaj pa'
mavergh. qaStaHvIS poH'a' He rarwI'Daq mareHtaH. nav puvwI'mey
DIchenmoH 'ej puvmoHmeH Daqvam jenvo' DIwoD. bIQtIQDaq (He rarwI'
bIngDaq) maghIr 'ej pa' mareHtaH. QaQ Hoch 'ej matIvchuqqu'.
DujDaq macheghDI' leSmeH DaqDaq lengwI'pu'vaD "map" tIn
lanpu'lu'bogh wItu'. nuqDaq maH 'e' wItlhoj wIHaDDI': Massachusetts
tIqghach javmaH jav vatlhvI' wIlengpu'! numer De'vam! toH, John
Lipinski jup'e' ponglu'bogh wIghaj, (pIj "Lippy" wIpong) 'ej North
AdamsDaq yIntaH qorDu'Daj-- "state" Dop HopDaq-- 'ej "weekend"vetlh
qorDu' SuchtaH net Sov. "wISuchnIS!" wIjach, vaj Duj wItIjqa' 'ej
malengtaH. DaH Sunday povna' 'oH.
'ej nuqDaq ghaH Nancy'e'?
*--------<<<=======[#####]=======>>>--------*
North AdamsDaq lengna' nI' law' lengHey wIpIHpu'bogh nI' puS. 'ach
'IHtaH Hatlh 'ej DuntaH jaj 'aj QaQtaH Hoch. Nancy rI' 'e' nIDmeH
Rob rut mamev, 'ach not tu'laHbe'. ('ej mubelbej ghu'vam; Nancy
nutlhejbe'mo' matIvchuqchu' jIH Rob Erik je. yIH ghajbe'bogh ram
rur Nancy ghajbe'bogh jaj. toH, chaq jImaybe'; lo'laHbe'chu' ghaH
not 'e' vIHar. 'ach Dubbej Rob NancyvaD jatlhlaHbe'taHvIS)
toH, North AdamsDaq mapaw, 'ach Lippy mI' Sov pagh. 'ach qay'be'
wIQub, rI'Se' paq wISuqlaH. "Lipinski" 'ar ngaSlaH?
wej.
qarbej, wej "Lipinski" ngaS North AdamsvaD rI'Se' paq. wIHarlaHbe'.
DaH nuq? mawuqlI'vIS [Yeah, yeah, I know], ghung vay' vaj Burger
KingDaq maghoS. pawDI' Soj ngevbogh be''e' wIghom, 'ej tlhob Rob
"John Lipinski DaSov'a'?" jang "toH! Lippy! HIja' vISovbej!" 'ej
Lippy juHDaq ghoSmeH Hemey nuja'. Do'qu'! maSeyqu' 'ej maQuchqu'!
wItlho', Soj je' vay', 'ej Lippy wISuchmeH mamej.
'ach juH wIpawDI' maDo'be' 'e' wItu'. Lipinski lughbe' juH 'oH! Qu'vatlh!
"cousins" chaH. vaj He chu' nuja' 'ej Lipinski lugh juH wISammeH
majaHqa.
*--------<<<=======[#####]=======>>>--------*
DaH pov paS 'oH, 'ej not maQongtaH. maDoy'qu'mo' maDoghchoH 'ej
machechchoHlaw'. "Lippy vengvamDaq yInbogh Hoch ponglu'law'!" wIwuq
'ej reH yItwI' wIjuStaHvIS Dujvo' "Lippy! Hey, Lippy!" wIjach.
"East Street"Daq 'oH Lippyna' juH'e' 'e' wIghojpu', 'ej wInejlI'
'ach wItu'laHbe'. "East Street" wItu', qay'be', 'ach mI'Daj
ngaSbe'law'. qaStaHvIS poH nI' wInejlI', 'ej mamoghchoH. nuqDaq
'oHlaH? 'ej tlhaQmeH vIjatlh jIH "chaq East Street East Road je
tu'lu'!"-- 'ej vIjatlhDI', East Street East Road je rar DaqDaq
mapaw! maHaghqu'. toH, nuq He, poSDaq nIHDaq ghap? nIHDaq
maghoS-- vaj poSDaq 'oH'ba' juH. 'ach "cow"mey wIleghpu' 'ej 'IHtaH
jaj, vaj qay'qu'be'. qaSpu'DI' poH machegh 'ej poSDaq maghoStaH
'ej-- Qapla'!-- juH wItu'ta'!
pa' chaHtaH pagh'e'.
DaH pov paSqu' 'ej Brandeis cheghmeH mejta' Lippy.
vaj Sormey bIngDaq maba' 'ej "acorn"mey mabaHchuq 'ej loQ maleS.
'ej nuq ta'taH Nancy'e'?
*--------<<<=======[#####]=======>>>--------*
toH mamejrup. "map"HomwIj vIHaD; nom macheghmeH "Mass Pike" vIlo'
vIneH. He''a' 'oH. Qaplaw'bogh He' vItu' 'ej maghoS.
'ej maghoS.
'ej maghoS. 'ach Mass Pike wItu'be'taH.
'ej maghoS.
'ej "sign" tIn wIlegh: "Welcome to Connecticut"
*--------<<<=======[#####]=======>>>--------*
Connecticut cha'be' "map"HomwIj. nuqDaq maH 'e' wISovbe'chu'.
chImbej Connecticut yoS maHbogh; pa' pagh tu'lu'. 'ach maghoStaH
'ej He mI'mey DIlo' chIjmeH 'e' wInID. 'ej machIllaw'taHvIS tlhIch
wIlarghchoH.
*--------<<<=======[#####]=======>>>--------*
Duj vImevmoH 'ej wItIjHa' 'ej, HIja', Duj bIngvo' Haw' tlhIch law'.
pIvHa'ba' DujoywIj! 'ach nuq wIta'laH? chIm yoS 'ej Sunday paS 'oH
vaj poS pagh tI'wI'pu'. wItIjqa' 'ej wIghoSqa'.
Do' Massachusetts wItu'qa' 'ej Mass Pike wISamlaH. 'ach pIvbe'ba'
net tu'bej. Qapchu'be'qu' "transmission". matul. maghoStaH. DaH
Mass PikeDaq maHmo' nom maghoSlaH.
vaj Duj Degh vISeH 'ej QaQ Hoch. pupbe' Duj 'ach QaptaH 'ej
DuSaQDaq macheghlI'. nI'pu' jaj 'ej matIvqu'.
Cadillac wImuppa' nom muvemmoH Rob.
*--------<<<=======[#####]=======>>>--------*
toH, qaStaHvIS poH Degh SeHtaH Rob.
*--------<<<=======[#####]=======>>>--------*
Pike wImejDI' Brandeis wISum 'ej Degh vIQorghqa'. DaH loQ QaptaH
neH "transmission"; ropqu'bej. DuSaQ wI'el 'ej Nancy juHDaq maghoS.
not rI'laHpu' Rob, 'ej DaH Soch rep ramDaq 'oH. Dunkin Donuts
jaHmeH wa'maH cha' rep! Nancy juHDaq mapawDI' mejlI', vaj
nuDoHlaHbe'meH DujDaj 'o'Daq DujwIj vIlan. 'ach QeHba' 'ej nuDoH
neHqu'law' ghaH 'ej DujwIj mupta' 'e' nID jay'! jotchoHmoHmeH nom
tIjHa' Rob, 'ej nom mamej Erik jIH je!
(qaSpu'DI' jaj puS De' Dajqu' wIghojpu' Erik jIH je:
"anniversery"chaj 'oHpu' jajvetlh! qaStaHvIS wa' DIS tay' chaH!
HIja', QeHchu'pu' Nancy)
vaj juHwIjDaq Duj vIqem 'ej vIchu'Ha'. Dunqu'pu' jaj!
*--------<<<=======[#####]=======>>>--------*
EPILOGUE:
pawDI' tlha'bogh jaj DujwIj vIchegh 'ej tI'wI'Daq vItlhapmeH vIchu'.
chu'chu' jonta'. 'ach chu'be'chu' "transmission". Qapchu' jonta'
'ach vIHQo' Duj. nucheghta' 'ej Heghpu'. batlh Qu'Daj ta'pu'.
batlh vIqawtaH.