tlhIngan-Hol Archive: Tue Feb 08 16:43:40 1994
[Date Prev][Date Next][Thread Prev][Thread Next]
Re: HIlaD!
- From: Captain Krankor <[email protected]>
- Subject: Re: HIlaD!
- Date: Wed, 9 Feb 94 03:45:49 -0700
Nick Nicholasvo":
>choja', HoD trI'Qal:
>
>=HoD Qanqoroy quvvaD ~markoy quvvaD je jItlhIj; jIpaS.
>
>wa' HoDvaD "-oy" mojaQ Dalo'. wanI'vammo' jIyay'. ghaH'a' qorDu'lIj ghot'e'?
>SutlhIvqang'a'? jIyajbe'ba'.
qarqu', bIyajbe'chu'ba'. 'ej Dutlhobta' 'Iv jay'? vay'vaD "-oy"
lo'qang vay', chay' bIrIQ SoH? jatlhwI' yoj 'oH neH. woQ bepmeH
Daghajbe' SoH. jIH chomuStaH net Sovchu', peghbe', ('ej jISaHbe',
jaghlI' jIHvIpbe') 'ach vuDlIj lajbe' Hoch, 'ej, DaHarchugh pagh
DaHarbe'chugh, juppu' 'Il law' vIghajtaH. jIH choSovbe' 'ej trI'Qal
DaSovbe' 'ej SoHvaD qay'chugh ghu'maj, 'o'lIjDaq DayuvlaH. naDev
qaSIQtaH jIH, 'ach juppu'wI' yItIchQo'.
>=SuquvHa''eghmoHlI'.
>
>mu'qaDmeyqoqlIjmo' yIyep. ne' maHbe'. negh maHbe'bej. 'utlh DaqaDchugh,
>vaj batlh ghajjaj nuHlIj. batlh ghajbe'chugh, vaj HeghtaH SuvwI', HeghtaHvIS
>qoH.
>
>
>=nIteb naDev quv lughaj Qanqor ~mark je.
>
>qatlh 'e' Damaq? mumer meqtaHghachqoqlIj. naDev Dachpu' Qanqor, qaStaHvIS
>poH nI'. vaj, naDev batlh 'anglaHbe' ghaH, DachtaHvIS. ghu'mey DabeptaHbogh
>ta'pu' je ~mark 'e' vIHar. ghorgh tlhIngan Hol lo' ~mark, qaStaHvIS wej jar
>nung? pab ja'taHbe''a' ~mark, DIvI' Hol lo'taHvIS? 'ej quvHa' Qanqor ~mark je
>nopbogh Hoch'e' 'e' Damaq. naDev pabpo' chaH Qanqor'e' ~mark'e' je neH 'e'
>maqlu'. vaj 'ajvaD pagh 'utlh latlhvaD je bImatlhlaw'. vaj, Qu'mevaD
>Dutay'bogh 'utlhpu' DatIchlaw'pu'. 'ach quvlaH'a' SuvwI', SuvwI' Hoch latlh
>tIchchugh, 'ej cha' 'ajvaD neH matlhchugh? quvlaHbe' 'e' vIHar. vaj yIyep.
qoH. machqu' yajghachlIj. mu'tlheghmey DalaD 'ach jabbI'ID naQ
DaqImHa'. pagh tIch trI'Qal. qaD neH.
>='ach HolDaq Sujatlhbe'qu'taH jay'!
>
>qar'a'? pa' 'oH'a' Hol? "Hol Dalo'taHvIS Sujatlhbe'". 'ej Hol 'oHbe''a' DIvI'
>Hol? wejpuH! HatlhDaq qech Huj ghajlu'law'. "tlhIngan Hol Dalo'taHvIS
>Sujatlhbe'" Dajatlhqangpu', 'ej 'e' DaHechtahvIS, bIQaghba'. mughtaHghachmey
>law'qu' lablu', qaStaHvIS jarvam. wa' ghItlhvam neH DalaDta''a'? *rIchaD* Zen
>Sutra je quv DalaD'a'? chaq *veDHor'ayn* bommey DaqIm'a'? *SeQpIr*wIj *HenrIy
>vagh* joq Datu''a'? DalaDchugh, qatlh DachovmeH pagh mu' Dajatlhpu''a'?
>DalaDbe'chugh, jupIm qatlh 'e' DangIl? chay' tlhIngan Hol lo'nISlu', ramchugh
>ghItlhvetlh? yIQIj, pagh yItam!
toDSaH SoH reH 'e' vISov 'ach pawpa' lupvam bIQIp not 'e' vIHar. Hol'e'
Hechta'bogh ghaH yajchu'pu' Hoch. bIyajHa'pu' SoH neH. naDev "in
language", "in a language" Hechbe'ba'-- "context" law' wIghaj. "in
the language" 'oHba' pIch nejlu'chugh. "the" ghajbe' tlhIngan Hol;
yajlu' net pIH. yIyaj bIlughchoHmoHpa'.
'ej HechghachDaj DayajHa'chu'qa'. nuq jatlhpu'? "jatlh" ghItlhta'.
"mugh" ghItlhta'be'. QaQ mughghachmey' 'ach jatlhghach bIHbe'.
yIyaj bIbepchoHpa'.
pagh DatojtaH. bIyajbe' bIyajqangbe'mo'. HIvmeH bIyajbe' 'e' DawIv.
>=mu'mey law' Sujatlh, 'ach pagh'e' luHech mu'meyraj!
>
>qar'a' jay'! wejpuH bIjatlh! "mu'mey law' *bo*jatlh" Dajatlh 'e' DaHechpu'.
>'a potlhbe'.
'ej chay' Qovpatlh SoH DaH 'e' wIleghchu'. Qaghpu'mo', ghaH
Da*tIch*?!?!? ghojmoHwI' qabqu' SoHbej. ghojmeH naDev maH Hoch, 'ej
ghojmeH taH "list"vam. po'meyvaD neH 'oHbe' 'ej naDev ghojlI'wI'
nIDvIpmoH pagh. 'e' poQ pabmey.
tlhIngan Hol lo'taHvIS qay'be' tIchghachmey. 'ach pab QaghmeyvaD
bIHchoHDI', qay'choHbej.
'ej: bIpupbe' je SoH. trI'Qal DalughmoHtaHvIS cha' pab Qagh
DaHeSpu' SoH. pu'DaHDaj baHbe'nIS yoDmey ghajbe'bogh Duj.
>=<<"punctuatIon" lulo''a' tlhInganpu'?>> Sutlhobchuq.
>="punctuatIon" SaHqu' 'Iv jay'???
>
>SaH 'Iv, 'e' Dayu'. SaH 'Iv 'e' vIQIj. SaH tlhIngan lurDech quvmoHwI'.
>SaH ghot, chay' qar tlhIngan wIyajtaHghach 'e' SaHchugh ghot. SaH ghot,
>tlhIngan ghItlh laD ghojwI', chay' 'e' ngeDmoHlaH 'e' SaHchugh ghot. SaH
>ghot, "canon"'e' Qorghqangchugh.
SaH pagh. Heghbej ngachghachvam rIntaH. "punctuation" lo' PK.
>=nuqDaq jaHpu' SuvwI'pu'na'?
>
>naDev SaH 'ej Holmaj SaH.
po'ghach 'angDI' jaghwI' vIchIDnIS. pov mu'tlheghvam. tlhIngan Hol
poD 'oHba' (poDbe'chugh vaj "Holmaj luSaH" 'oHnIS), 'ach
vImuSHa'qu'. majQa'!
>=tlhIngan Hol'e' wIngachmeH naDev maSaH!
>
>jIQoch. "Startrek" 'u' nov Hoch wIngachlaH 'e' vIHar. 'e' Harlaw' je HaDwI'
>quv Schoen. vulqan Hol romuluS Hol je ngachlu', qaStaHvIS cha' jar nung.
>qaStaHvIS, vIngpu' pagh. qatlh DaH bIvIngchoh? ghoqwI' SoH'a'? Agent
>Provocateur SoH'a'?
bIQochlaH 'ach bImuj (tera'ngaH Hol lo'lu'chugh-- SuvwI' Hol lolo'taHvIS vay'
vay' lungach net chaw'. ngachvamvaD Hol lulo'pu'bogh nuv 'e'
vISovbe' jISaHpu'be'mo')
>=tlhIngan Hol lujatlhbe'ba'qu' verenganpu' jay'!!!
>
>chay' 'e' DaSov? mechwI' chaH verengan'e', vaj Hol law' lo'laHnIS chaH. not
>tengchaH DaSuchlaw'.
bIyajHa'qa'ta'. HechghachDaj Dayajchu'.
>=DaplIjvaD poH vIghajbe'qu' jay'!
>
>vIjatlhqa'. Hoch wIngachbogh DalaD 'e' raD pagh.
veQ 'oH janghachvam'e'. naDev jabbI'ID law'qu' Hevlu' 'ej laDlu'
neHlu''a' 'e' wuqmeH Hoch nuDnIS 'ej 'e' poQ poH rorqu'. Do'Ha'
ghu'vammo' numuvHa' nuv law'.
>=HIjang... 'ach Hol'a'Daq HIjang neH!
>
>HolwIj vIquvmoH. DaneHchugh, vaj tlhIngan Hol vIlo'. 'ach chonaD not vIneH.
>chonaDmeH vIghItlhbe' 'ej chonaDmeH tlhIngan Hol vIQulbe'.
>
>yaj'a'?
bIDo'qu'. ghu' DaneHbogh DaHev. DuQuchmoHchugh, qanaDQo' jIH je.
bIHujqu'. qaDDaj Datem 'ach Data'.
>=qaDwIj lajrup 'Iw?
>=jIloSlI'.
>
>yIloSQo' 'ej yIvIngQo' 'ej HolmajvaD lo'laHbogh vumtaHghach yIvumchoH.
HutSaDlogh vIja'pu' 'ej vIja'qa': vumqoqvamvaD Qapbe' "list"vam.
ghojmeH 'ej qeqmeH maSaH. lo'laHbej ja'chuqghach mughghach je, 'ej
taHbej bIH, 'ach bIHvaD taHbe' "list"vam. maychu' ghu' neHbogh
trI'Qal. Daparchugh, numuvHa'meH bItlhab. 'ach "list"vam Qu' DachoHlaHbe'.
--HoD Qanqor