tlhIngan-Hol Archive: Fri Feb 10 13:05:17 2012
[Date Prev][Date Next][Thread Prev][Thread Next]
[Tlhingan-hol] nuq bop bom: 'ay' wa'vatlh vaghmaH: <jaS mej>
Mahoun was describing his previous contact with the Federation,
including the fact that he once served on a Yelwitian-owned ship
under a hired Human captain.
150
SIbI' jatlhbe' 'eSSIm. Duj chIjbogh Human lujonpu'chugh tlhInganpu',
tepqengwI' HoD chun ghaH 'e' luHarbe'. Heghba'pu' 'ej 'oy''a' SIQpu'.
'a Mahoun 'IQmoHbe'meH QIjbe'. jatlh "Do'Ha'."
jatlh Mahoun, "wejmaH ben yuQwIjDaq Dochmey nov ngevmeH malja' mach
vIcherta'. verghDaq Dujmey vISay'moHpu'mo' Suy'pu' law' vISovpu' 'ej
chaHvaD Dochmeychaj vIngev. jIDo'pu'. qarpu' poH 'ej juppu' qar
vIqIHpu'. chepqu'taH malja'wIj. DaH DujwIj'e' vIghaj 'ej muboQbe'taH
DIvI'. yelwIyyItnganpu' chaH Hoch beqpu'wI''e'--HochHom, SaH wa'
'anDorngan toy'wI''a'."
DIvI' rewbe' ghaH 'anDorngnan'e'. DIvI' toy'wI''a' ghajchugh vay'
voqbe'bej DIvI'. jatlh, "ghoqwI' SoHbe' DaH 'e' vIHarchu'. 'ach
maqIHDI' qaghIjba'pu'. qatlh manga'chuq DaneHpu'?"
jatlh Mahoun, "SoH qaSeymoHlaw'mo', jIH choSeymoH ... 'ej tlhIngan
vIghatlh vIneHpu'. bortaSHey vISuq. ghIq qaSaHqu'choHpu'. qaSaHtaH
'ach tlhoy bIQob." Hung yaSpu' muchmeH ghopDaj joqmoH.
bortaS yaj 'eSSIm. meq QaQ 'oH. bortaS taQ Suqta' Mahoun 'ach taQtaH
novpu'. jatlhtaH Mahoun 'ach pagh De' chu' chel. poj'eghtaHlaw' 'ej
'eSSIm poj je. yevpu'DI' 'ach pagh ghelpu'DI' tlhe''egh 'eSSIm 'ej
yelwIyyItnganpu'vo' yItchoH.
HaghchoH Mahoun 'ej jatlh, "reH bImejDI' tlhIngan tIgh Dapabmo' bItlhaQ."
mIS 'eSSIm. mejtaHvIS Mahoun tIgh le' pablI' 'e' tu'be'. jatlh, "jaS
bImej'a'?"
jatlh Mahoun, "<matay'laHbe'> jatlhDI' bang, ja'chuqnISchoH bangpu'."
jatlh 'eSSIm, "tIghmeywIjvaD ja'chuqbe' bangpu'. ngagh pagh Suv pagh
mej. tay'taH pagh tay'be'. qaStaHvIS wa'maH vagh tup DebDaq
maQamtaHvIS majatlhtaHmo' tIghraj'e' vIpabtaH."
HungpInDajvaD jatlh Mahoun. jang HungpIn ghIq QumwI' lo' latlh yaS.
'eSSIm chol Mahoun. 'eSSIm nach DopDaq ghop lan Mahoun 'ej jIbDaj
yach. tlhup Mahoun. jatlh, "wa'leS qaleghqa', tujoy." tlhe''egh 'ej
Qol Hoch yelwIyyItnganpu'.
---
SKI: Essim gets fed up with standing in the sun talking about relationships.
_______________________________________________
Tlhingan-hol mailing list
[email protected]
http://stodi.digitalkingdom.org/mailman/listinfo/tlhingan-hol